یونان صغیر

میں سوچینداں آخر تونسہ شریف کوں کیرھے جاہل یونان صغیر دا لقب ڈتا ہا اوکوں ایں پوری تحصیل ءچ کڈو شعور ڈسیا ہا اے لوک کیرھا انقلاب گھن آئے ہن ، اگر تعلیم کوں ڈیکھ کے یونان صغیر آکھیا گئے ول وی سراسر غلط ہے تعلیم شعور ڈیندی اتھاں تاں حالی شعور دی شین کائینی آئ

اُبھے تیں ڈیھداں تاں کھتران، پٹھانڑ، قیصرانی، سرادریں دی جُتی جُوڑ قوماں جیرھاں اج تک وی غلامی دا طوق گل ءچ پا سرداریں دے گاونڑ گاندے ودن، وہوا دے تھوڑا اگو ونجو تاں ایویں محسوس تھیندے جیویں دیھ پھیرا مار گیا ہووے ۔ میں پچھے ادا کون سردار ہن اتھو دے ہتھ بدھ کے آکھس کھتران ہن میں وی ہتھ بدھ کے آکھیے شالا سرداریں سودھے غرق تھیوو

تھوڑا پہاڑ تھوڑا میدان قیصرانی قبیلہ ۔۔ انھیں آپڑیں بہادری ہر ہینڑی قوم تے ہینڑے بندے تیں ڈیکھائ ہے کوئ میں جھئیاں بندہ ہتھیں آ ونجنے آپڑیں سردار دا آپڑیں محرومیں دا سارا بدلہ اوندی گچی مروڑ کے کڈھدن اے قوم وی شودی صدیاں توں ہکے گھر دی غلام ہے ہاں ایں قوم کوں اے مانڑ وی حاصل ہے ڈاکٹر جج پولیس دے فوج دے اعلی افسر ایں قوم دے لال ہن اے بی گال ہے انھیں آپڑیں قوم ءچ نویں سوچ دا ڈیوا بالنڑ دے بجائے صرف آپڑیں گھر ءچ انرجی سیور لائے،

تھوڑا تونسہ کنیں لمے تے جُلوں تاں ملغانی سردار آپڑیں پوری آب و تاب نال چمکدے کھڑن، انھیں دی سرداری محدود ہئ صرف سوکڑ ءچو وی کئ دفعہ ڈانگیں سوٹیں نال جیتڑاں پوندے نتاں لوگ باغی تھی ویندن یعنی امید دا نویں روشنی دا ڈیوا بلدا کھڑے، اگر شہر ءچ پانڑی نہ ہا روڈ ،سکول، ہسپتال، کشے کائینی وت وی سردار تاں پیو ماء ہوندے

تھوڑا پُوہادھو، بوہڑ، ہیرو پچادھی،مہندہ، پوہادھی ہیرو ، بنڈی دائرہ ،

اے سارے خواجگان دے جُتی جوڑ ہن انھیں دے پردھان ہوندن ممبر اُو ممبر انھیں وستیں دے بچیں کھاونڑیاں بلائیں ہوندن جنھیں اج تک بھولی عوام کنیں ووٹ گھن کے خواجگان دے قدمیں سٹیے آپڑیں قیمت وصول کیتی نے،

باقی وستیں دا وی حال ڈیساں اگر زندگی وفا کیتی،

جمیل بلوچ