ہک ہا بادشاہ
،،،،،،، ہک ہا بادشاہ ،،،،،
بادشاہ تاں رب دی ذات ھے پَر اُو ھک ٹُوٹے زمین جئیندا ناں افغانستان ھے اوندا بادشاہ ھا ناں اُوندا داؤد ھا. داؤد بادشاہ اصول دا پکا ھا آپڑیں زبان کوں پانڑی ڈیندا ھا جیرھا حکم کر ڈیوے ھا اوندے اُتیں سو فیصد آپ وی عمل کریندا ھا رعایا کنیں وی کرویندا ھا. ہک ڈیھاڑے اوندی دربار ءچ ہک غریب فریادی فریاد کیتی ،بادشاہ سلامت اساں غریب ٹانگے تیں سفر کریندے ھئیں تیں ٹانگے آلے کرایہ آپڑیں مرضی دا گھندن اساں گریب لوک کنتے مروں ، بادشاہ اے گال سُنڑ کے رتالال تھی گیا ہک ٹانگے آلے دی ایجڈی جرآت کہ بادشاہ دے حکم دی خلاف ورزی کرے.
بادشاہ ویس فقیری پاء کے پُج گیا ٹانگے آلے اڈے تیں اُوکوں آکھس فلانی جاہ تیں ونجڑے چوکھے پیسے گھنسیں ٹانگے آلے آکھیا گال سیدھی ھے میں سرکاری ریٹ تے بلکل نمھی جُلدا توں ودھ کرایہ ڈیسیں ول جُلساں ، بادشاہ آکھیا چلو تریھ روپے ، اوں آکھیا اُتوں تے ، چالیھ ،اتوں تے ،پنجاہ ، ٹانگے آلے آکھیا مار تاڑی چڑھ آ. راستے ءچ ٹانگے آلے پچھا ،فقیر ھئیں بادشاہ آکھیا اُتوں تے ،فوجی ھئیں اُتو تیں ،افسر ھئیں اُتو تیں ،وزیر ھئیں ،اُتو تیں ،وائے یار کتھائیں داؤد تاں نہویں ،بادشاہ آکھیا مار تاڑی. ٹانگے آلے دیاں لتاں جواب ڈے گیا تے آکھس حضور تساں ہُنڑ جرمانہ کریسو داؤد آکھیا اتو تیں ،سزا ڈیسو ،اتو تیں ،ڈھکیسو ،اتو تیں پھاسی ڈیسو بادشاہ آکھیا مار تاڑی،اوں ہک تاڑی نال سارا لوک سیدھے تھی پئے. اساں جنھیں کوں مونڈھیں تیں چاء کے ہر واری تخت تیں جُل بلھیندے ھئیں اے ہَن تاڑی دے ڈا دے.
تھر ءچ موت بُھک دی شکل بنڑا کے میڈے لال کھادی ویندی ھے ،حاکم وقت ایں حالت ءچ ویندے جیویں اُتھاں انھیں ہر سہولیات پہنچائ ھووے اج سرخرو تھی کے دورہ کیتا ھووے، شرم تاں اوکوں وی آونڑی چاھیدی ھئ جیرھا ایں استاوے دے مونھ آلے گورنر کوں سڈی پیاء ھا ،کوئ مقامی چبل ھوسی جئیں تبدیلی دے ناں تیں ووٹ گھدا ھوسی. جیویں نانگ چمڑا وٹیندے ایویں اے حکمران طبقہ شکلاں وٹیندن کڈھائیں شیر کڈھائیں تیر کڈھائیں بلاء،اگر تھر ءچ میڈے بچے بھکے مردن ،میں لعنت بھیجنڑ ثواب سمجھداں جیرھے آھدن بھٹو زندہ ھے،، بھٹو مرگئے لعنتاں سٹ گئے،،شیر دی شکل ءچ جتامے ہن جنھیں ملک کوں تباہ کیتے ،تبدیلی دے نعرے ءچ فروعونیت ھئ جیرھی روزانہ کہیں نہ کہیں شکل ءچ نظر آ ویندی ھے،،آخر تیں اساں آپ ول بچدے ہیں وائے یار جنھیں رل کے اینجھے بندے چُنڑیے ھوون ،آپ کینجھے ھوسن،،،،،جمیل بلوچ [١]