ہنجھڑی

لکھت: طارق اسماعیل

ہݙی دے ذریعے کئیں قسم دی پیشین گوئی کرݨ (اڳونہی ݙس)کوں ہنجھڑی ڈیکھݨ آکھیا ویندے ۔دنیا وچ ایں لوک ریت دا رواج منڈھ لا کنیں اڄ تئیں اونویں ساڳی موجود اے ۔اتے ہنجھڑی ݙیکھݨ کوں اڳونہی ݙس دا معتبر حوالہ ڄاتا ویندے ۔جو آوݨ آلی رڑھ رنگڑی تے موسم دا کینجھا اثر پوسی ۔بارش دا ڈھیر تھولا تھیوݨ کال کریہہ سماج وچ نویں واقعات دا ظہور دے بارے بکری اڳلی دستی دے لکیریں دے مطالعے نال اڳونہی ݙس ݙتی ویندی ہے ۔ضروری نئیں جو اڳونہی ݙس سولہ آنے ٹھیک ہووے۔ایندے وچ ابہام ہوندے۔ ایں ابہام کوں واقعات نال جوڑ تے نتائج حاصل کیتے ویندن ۔چین وچ زمانہ قدیم وچ ہݙی دے مطالعے نال عسکری تے ایہو جیہیں موضوعات کیتے معلومات گھدیاں ویندیاں ہن ۔تاں جو اڳونہے حالات دے موجب پیش بندیاں کیتیاں ونڄ سڳن۔خاص طور تے اشرافیہ کیتے نیک شگون ڳولݨ دا آہر کیتا ونڄ سڳے ۔یونان دے مندریں وچ وی ہݙی دے لکیریں دے مطالعے اڳونہی ݙس ݙیوݨ دا رواج موجود ہا پیا ۔مقدمہ ابن خلدون وچ اندے جو عرب وچ ہݙی ݙیکھݨ نال فال گھدی ویندی ہئی ۔بلوچستان اتے دیرہ جات دے کوہ سلیمان دے سلسلے وچ ہنجھڑی ݙیکھݨ دا رواج اڄݨ تئیں ہک معتبر حوالے دے طور تے موجود ہے پیا اتے ایں اڳونہی ݙس کوں یقین دی حد تاڑیں درست ڄاتا ویندے ۔