ہائے امریکہ وائے امریکہ (انشائیہ)
ہائے امریکہ وائے امریکہ (انشائیہ)[لکھو | ماخذ وچ تبدیلی کرو]
از: ڈاکٹر خالد اقبال
امریکہ ہک ڈانگ ہے جیندے سامنے ساری دُنیا دی مثال ہک منجھ دی طرحاں ہے۔ تڑی بازی دے نال نال دنیا دے کہیں وی ملک دے معاملیاں اِچ ٹنگ اَڑاونا امریکہ آپنا حق سمجھیندے۔ جیہڑے ملک امریکہ دے ایں ”ڈڈھپ“ کون منن توں انکار کریندن‘ امریکہ اُنہاں ملکاں اِچ انسانی حقوق ڈیواون کیتے جمہوریت دا ڈھول وجیندے تاں جو انسانی حقوق تے جمہوریت دے شوشے چھوڑ کے کمزور تے نمانے ملکاں تے آپنا اثر و رسوخ ودھایا ونج سگے۔ تے آپنے فائدے چاون آسان تھیوے۔ امریکہ جیہڑا جو ایں ویلے دنیا دی کلہی سُپر پاور ہے۔ آؤ ذرا ایکوں تضادات دے شیشے اِچوں ڈیکھوں:
- امریکہ دنیا اِچ سُپر پاور ہے پر سب تو زیادہ خطراہ ایندی سلامتی کوں ہے۔
- امریکہ دنیااِچ کتھائیں وی ظلم تھیندا نی ڈیکھ سگدا۔ پر عراق‘ افغانستان‘ فلططین‘ بوسنیا‘ چیچنیا تے کشمیر دے معاملیاں اِچ ایندیاں ڈوڑیاں پالیسیاں سمجھ تُوں باہر ہِن۔
- امریکیاں دے برابر حقوق ڈیون تے تریمتیں دی آزادی دے ضمن اِچ حقیقت اے ہے جو امریکہ اِچ تریمتیں کوں مختلف شعبیاں اِچ کم نی کرن ڈتا ویندا۔ 1789ء توں گھن تے ہُن تائیں امریکہ دی کوئی تریمت صدر نی بن سگی۔
- امریکہ دے انتخابی نظام دے بارے اِچ تریخ ڈسیندی ہے جو عوامی اقتدار اعلیٰ توں ہٹ کے عوام دے زیادہ ووٹ گھنن آلے کوں امریکہ دا صدر نی بنن ڈتا گیا۔ اکثریت رکھن آلے امیدواراں دے بجائے تھولے ووٹاں آلیھ لوک امریکہ دے صدر بنے۔ تے امریکہ دے سیانے انہاں کیتے ”اقلیتی صدر“ دی اصطلا ح استعمال کریندے ہن۔ امریکہ دے گزریل الیکشناں اِچ بش یا الگور اِچوں کہیں ہک دا وی صدر منتخب نہ تھیونا انتخابی عملاِچ خرابی دی بہوں وَڈی مثال ہے۔ سیاسیات دے ہک ماہر دا اَکھان ہے جتھاں عام لوکاں دی خواہشتات دے مطابق اگوں ودھن دے رستے گھٹ ہوون یا حکمرانان کوں پُچھ گُچھ دے ذریعے آسانی نال ہٹایا نہ ونج سگے۔ اُتھاں صدراں کوں مار ڈیون کوئی وڈی گالہہ کینی۔ ہِیں کیتے صدر کول پُچھ گُچھ دا بہوں اوکھا طریقہ وی سیاسی نظام دی ہک خرابی ہے۔ جیندی وجہ نال 1841ء توں گھن تے 1963ء تک امریکہ دے اَٹھ صدر مارے ونج چُکن۔
- بہوں سارے ملکاں اِچ الیکشناں دے ویلے عام لوکاں کوں بیوقوف بنا کے جیں طرحاں ووٹ گھدے ویندن تے بہوں سارے انتخابی وعدے پورے نی کیتے ویندے۔ ہک خاص مدت کیتے ووٹ گھن تے آپنے حلقے دے لوکاں کوں اصلوں بھُل ونجناں ہک عام جئیں گالہہ ہے۔ پر امریکہ ایں بارے اِچ اے اَہدے جو کوئی صدر آپنے انتخابی وعدے پُورے نی کریندا تاں ایندا مطلب اسلوں کینی جو اوندا مینڈیٹ مُک گے۔
- امریکہ دے سرکاری ترجماناں دا شیت اے اکھان بن چکے جو ”امریکہ پائیدار امن چاہندے۔ گالہہ مہاڑ دے ذریعے امن قائم تھیونا چاہیدا ہے‘ پر امریکہ کتھائیں وی آپنے مفاد دے بغیر ثالث دا کردار ادا نی کریندا........؟
- خود امریکن ریسرچ ایں گالہہ کوں منیندی ہے جو کجھ سو سال پہلے تک امریکہ آلے بندیاں دا گوشت کھاندے ہَن تے او بندیاں دا اے گوشت بھُن کے کھاندے ہَن۔ پر اے گالہہ ایڈی حیران کرن آلی کینی...........؟
- امریکہ اِچ 10 اچوں 6 شادیاں دا انجام طلاق ہے۔ پر امریکہ اِچ اے گالہہ پریشانی دی اصلوں کینی۔ بلکہ شادی دا ڈھیر عرصے تائیں نبھ ونجناں پریشانی دی گالہہ سمجھی ویندی ہے۔ کیونکہ امریکہ دے لوک شادی کیتے بغیر کٹھے رہ کے زیادہ خوش تھِیندن۔
- امریکہ دے اخلاقیات دے ماہراں دا اے اَکھان ہے جو بداخلاقی پاروں کینسر پیدا نی تھی سگدا...........
- امریکہ دی ری پبلکن پارٹی طاقت دے ذریعے امن دی گالہہ کریندی ہے۔ پارٹی دی سوچ دے مطابق ہک زور آور امریکی فوج ایِ۔ دنیا اچ اَمن دی بہترین ضمانت ڈے سگدی ہے؟ تے اُنہاں دے نیڑے ایہا جمہوریت‘ آزادی‘ سلامتی تے خوشحالی دی ضمانت ہے۔ جڈاں جو اُنہاں دے جوائنٹ چیف آف سٹاف دا اَکھان ہے فوج مشکلاں اِچ گھری ہوئی ہے۔ امریکی فوجیاں تے اُنہاں دے خاندان کیتے مناسب صحت دا نظام وی کینی۔ ہزاراں فوجی خانداناں دا کھاون پیون امریکہ اِچ فوڈ سپورٹ پروگرام تے ہے۔
- اقوام متحدہ جیکوں بناون تے ایندا ناں رکھن دی صلاء امریکی صدر فرینکلن روز ویلٹ نے ڈتی ہئی تے جیندا مقصد دنیا اِچ پائیدار امن کو خطرہ ہے۔
(اقتباس از کتاب: مُسکار (سرائیکی انشائیے)۔ از: ڈاکٹر خالد اقبال)
MubasherKaleem (talk) 11:02, 10 June 2019 (UTC)