گفتار خیالی

غلام حسین گفتار خیالی میاں اللہ بخش جوئیہ دے گھر وستی سمندری دائر ہ دین پناہ اچ 15 اپریل 1947 ء اچ پیدا تھئے ۔ بی اے تئیں تعلیم حاصل کر تے محکمہ تعلیم اچ ملازم تھی ڳئے ۔ 1967 ء اچ شاعری دا آغاز کیتا تے سئیں ڈاکٹر پروفیسر خیال امروہی دی شاگردی اختیار کر گھدی ۔مدار شعور ، معدار شعور ، نیا پیراہن ، کسک چھپ تے سامݨے آئین ۔

اصل ناں    غلام حسین

قلمی ناں    گفتارؔ خیالی

جٖمنْ        1948ء

جاہ پتہ      ڈاکخانہ دائرہ دین پناہ تحصیل کوٹ ادو

گفتار ؔخیالی اپنْے استاد خیال امروہوی سانگے اپنْے آپ کوں خیالی اکھویندن۔اردو تے سرائیکی دے نامور شاعر ہن۔نمونہ کلام!

غزل

میں ڈٖکھاں دی بٖار وی کھل ہس تے چیندا رہ گٖیاں

دل دے ہر ٹکڑے تے تیڈٖا ناں لکھیندا رہ گٖیاں

توں جو وعدہ کر کے نئیں آیا تاں اے مرضی تیڈٖی

میں تاں ہکّی جاہ تے بٖیٹھا راہ بھلیندا رہ گٖیاں

کالے واتاں توں بچیں سوہنْاں سجٖنْ محتاط تھی

ہنْ تاں میں غیراں کنوں تیکوں بچیندا رہ گٖیاں

چور ہم زخماں کنوں پر حوصلے ڈٖیکھو تساں

میں ڈٖکھاں دی جنجٖ وچ جھمراں مریندا رہ گٖیاں

میں جھیاں گفتار کئی پاگٖل بٖیا نہیں سوہنْاں

اوں جو ولدا نئیں ڈٖتا ، ول وی سڈٖیندا رہ گٖیاں

٭٭٭