گریبان
گریبان
عمومی مائیکروف (یوم_عاشور سپیشل)
لیکھک: منصور شانی
ارشد میں تہاڈی خاطر ماء، پیوء، بھینڑ بھرا تے سب سنگ چھوڑ تےآئ ہے اج شادی دے ویہہ سال بعد وی توں نویں وٹیا کل رات ولا توں شراب پی تےگھر آئیں ت تیڈے گلہیں تے سرخی.... رضیہ ایہو کجھ الا سگی کیوں جو سنگھ اچ آواز گھٹیج گئ تے اکھیں اچو ہنجوں وگنڑ پۓگیاں. فجر فجر نال ٹر ٹر شروع کر ڈتی وی تاں؟ کیا تھی پیا جو سنگت نال کجھ شغل کر گھدےتاں تیڈے نال شادی تاں میڈی بہوں وڈی غلطی ہے ملتانی کپا پرتےہٹ.
ارشد ذال کوں لت مار تے بیڈ توں اٹھیا ت رضیہ پچھو کھڑے ہوۓلوہےدےسیف ت ونج لگی،سیف دی چھت ت لاتھا گلدان سدھا رضیہ دے سر اچ آ لگا تےرت وہونڑ پۓگئ رضیہ ڈسکدی ہوئ باہرو نکل گئ.
سکینہ میڈا کالا سوٹ استری کیتائ؟ ارشد اپنڑیں پندرہ سالہ دھی کولو پچھیا اوں ذال دے وگدےخون کوں پانڑی وی نہ سمجھا. اااب..اب..ابو او است.. استری تاں پرسوکی خراب ہے. سکینہ ڈردیں ڈردیں جواب ڈتے. لکھ لعنت آئ سؤر دی بچی.کہیں پیوء کوں ڈسئ جو خراب ہے استری؟بہاننڑ ماء دی دھی. ارشد ایہا گال کر تے اٹیچ باتھ اچ وڑ گیا. ...... پتر کڈیں ویندا پئیں؟ گھر آندیں جھیڑا جھٹا کر تےباہرو لگا ویندئیں. پتر گھر کوں گھر سمجھ ساڈے نال بیٹھا کر ذال نال کھل ت الوایا کر. ارشد دھاں تے بغیر استری کالا سوٹ پا تے جیہرلے موٹر سائیکل چا تے باہرو ونجن پۓ اوندا پیوء الانڑا تھۓ.
گودا دماغ خراب نہ کیتا کر، توں ہیں ناں رنو بس بیٹھا رہ ذال نال.تیکوں ٹکر ملدان پۓ،کھا پی تے وقت گزار.میڈےماملے اچ نہ وا.وت آہدن گستاخ ہے.
ارشد پیوء دےگاٹے فٹ تھی گۓ. پتر تیڈےاتےتاں ساڈی کہیں گال دا اثر نئ تھیندا.توں ہنڑ کالا سوٹ پاوونڑ شروع تھی گئیں حالانکہ پیر سئیں آکھیا ہا کالا سوٹ مولا علی کوں ناپسند ہائ.
ارشد دا پیوء خالص پیر پرست نظر آونڑ پۓگۓ. میں نئ جانڑدا انہیں ٹکر چیریں کوں اے لوگ مذہب کوں سمجھ ہی نئ سگۓ، اسلام انہیں دے نیڑے وی نئ لنگھیا، بھلے میں سنیں دےگھر جمیاں پر میں حسینی سنی ہاں میں مجلس ت وی ویساں تےکالا سوٹ وی پیساں. تہاکوں کیا پتہ اسلام کیا ہے؟ مسلک مسلک دےکھیڈ ساڈےملک دا سکون ونجا ڈتے. مولا حسین نے یزید ظالم، زانی،شرابی تے جابر حکمران دی بیعت قبول نہ کریندیں ہوئیں ساکوں سبق ڈتے.
ارشد اپنڑے گریبان دے سارے بٹنڑ بند کر چکا ہا گریبان اچ جھاتی پاونڑ لو ہک بٹنڑ دا کھلا ہوونڑ کم از کم ضروری ہے؟موٹر سائیکل دی کک مریندا تے مجلس دو گۓ پیا. [١]