کُجھ کلاسیفائیڈ اشتہار انشائیہ

کُجھ کلاسیفائیڈ اشتہار

از: ڈاکٹر خالد اقبال

پُڑی فروش پجارو گروپ آلے توجہ کرن:

پُڑی فروش پجارو گروپ دے ٹھاٹھ باٹھ‘ سج دھج‘ آکڑ‘ آن بان تے شان اِچ وادھے کیتے ساڈے کول مختلف نسلاں دے کُتے تے ہٹے کٹے کلاشنکوف بردار دیاں خدمات حاصل کرو۔ ساڈے سِدھائے ہوئے کُتے تے کلاشنکوف برادر تہاڈی اَکھ دیاں پپلیاں دے اشارے کوں آپنا حکم سمجھیسن۔ ایندے علاوہ اے کُتے تے کلاشنکوف بردار تہاڈی دہشت تے وحشت اِچ اضافے دا سبب بنسن۔ جلدی رابطہ کرو۔ جیکر تُساں چاہندے ہو جو تہاڈے علاقے دے غریب پڑھے لکھے تے نویں نویں لکھے پڑھے تہاڈی سج دھج کولوں خوف کھاندے راہون۔ تے اُنہاں دے دماغی مسئلیاں اِچ وادھا تھیوے۔ تاں وَل آپنی آن بان تے شان دی خاطر ایں سنہری پیشکش کولوں ضرور فائدہ چاؤ۔ (از................. انجمن تحفظ پُڑی فروشاں اَتے پجارو گروپ)

قبضہ گروپ توجہ کرن:

ڈِنگے پھڈے شہر دی آسوں پاسوں کچیاں پکیاں آبادیاں‘ گلیاں محلیاں دے علاوہ ماڈرن کالونیاں اِچ کجھ پلاٹ جنہاں دی مالیت لکھاں روپے بندی ہے جیہڑے جوہک عرصے توں پِن۔ اے پلاٹ یقیناً رنڈن تریمتیں‘ پنشنرز (ریٹائر ملازمین) سمندر پار پاکستانیاں یا وَل قسطاں تے زندگی گزارن آلے سفید پوش ملازماں دے علاوہ ڈو نمبر کاروبار کرن آلے لوکاں دے وی تھی سگدن۔ انہاں خالی پلاٹاں تے فوری ناجائز قبضے کیتے ساکوں با اثر قبضہ گروپ دی مدد دی لوڑ ہے۔ معقول مہینے وار بھتہ‘ گڈیاں کیتے پڑول‘ تڑی باز مشٹنڈیاں کیتے چنگے بھلے ٹُکر دا انتظام ہے۔ کاروباری ہیرا پھیری دے معاملے راز اِچ رکھے ویسن۔ کچھ خفیہ شرطاں تے ہک بے دی رضامندی تے چھیکڑی گالہہ مہاڑ کیتے انٹر ویو تھیسی۔ رابطے کیتے : خفیہ کوڈ نمبر 077 جیمز بانڈ۔

پرائیوٹ سکول برائے فروخت:

راتیں رات امیر تے مالدار پارٹی بنن کیتے شاندار موقع۔ سِک رکھن آلے حضرات توجہ کرن۔ سکول چالو حالت اِچ ہے ۔آلو کچالو سکول دے وڈے دروازے دے سامنے وِکدن۔ کچے گلے سڑے پھل وی ہِیں سکول دے باہروں وِکدن۔ ہِیں طرحاں دی کجھ بیاں خرابیاں کوں چھوڑے کے تُساں سکول تے بالاں دی تعداد ڈیکھسو تاں وَل ڈیدھے اِی رہ ویسو۔ تہاڈے سارے خواباں‘ سِکاں تے خواہشاں کوں پورا کرن سانگے سنہری موقع۔ گنتری توں باہر مثلاً:

• پرنسپل دا عہدہ تہاڈی تانگھ اِچ
• اَرام دہ دفتر
• بہوں گھٹ تنخواہ تےYes Sir آکھن آلے‘ M.A ‘ M.Sc استاد تہاڈی قابلیت دے گُن گاسن۔
• سب تون ودھ کے ہر سال تہاکوں فیساں ودھاون دا اختیار۔

زحمت کرو موقع تے تشریف گھن آؤ۔ فون نمبر X.Y.Z:

’’پرائیوٹ ہسپتال‘‘ برائے فروخت:

ہک منافع ڈیون آلا پرائیوٹ ہسپتال وِکاؤ ہے۔ اساں خدمتِ خود ترقی پسندی‘ دے جذبے نال ایں طرحاں دے ہسپتال بنیندے تے وِچیندے راہندے ہَیں۔ غریب تے لاچار عوام وِچ بیماریاں دے زور شور کوں ڈیدھے ہوئے اساں اِیں فانی جہان اِچ آپنی چھیکڑ سُدھارن کیتے ہسپتال بناون تے ویچن دا رستہ چُنے۔ موجودہ ہسپتال وِکاؤ ہے۔ ایندے اِچ اے خصوصیات ہِن۔

• 24 گھنٹے سروس
• سرکاری ہسپتالاں اِچ ڈیوٹی توں انکاری ڈاکٹر آپنے موبائل فون تے

ڈینہہ رات تانگھی۔

• اے پرائیوٹ ہسپتال ’’شفا من جانب اللہ‘‘ چونکہ ہک وڈے سرکاری ہسپتال

دے نیڑے ہے۔ ہِیں کیتے سرکاری ہسپتال اِچوں دِھکے کھاندے مریض ’’ناؤٹ مافیا‘‘ دے تعاون نال اِتھاں داخل تھیندے راہندن۔

• سرکاری ہسپتالاں اِچ ملن آلیاں دوائیاں وی ایں ہسپتال اِچ ملسن۔
• آمدنی دے ذرائع کوں ودھاون دے ڈوجھے خفیہ رازسامنے بہہ کے طے

کیتے ویسن۔ (ازمالکان پرائیوٹ ہسپتال ’’شفا من جانب اللہ‘‘)

کھر پینچ نقاد حضرات توجہ کرن:

ہک ادبی کتاب دی تقریب مُنہ ڈکھائی کیتے کجھ نام نہاد مقالہ نگارا‘ تنقید نگاراں (جیہڑے جو ہک بے دی تعریف تے ڈوجھیاں دی بُرائی کرن اِچ ثِقہ بند حیثیت دے حامل یا حاملہ ) اُنہاں کوں ارداس ھے جو او ٹیلی فون نمبر 007 تے آپنا ناں پتہ تے ٹیلی فون نمبر لکھوا ڈیون۔ معقول پُرکشش اعزازیہ ڈتا ویسی۔ یورپ توں پاکستان وَلن آلے شاعر جیہڑے آپنی شہرت اِچ وادھا منگدے ہوون۔ یقین گمانی دے شعری مجموعے دی بَلے بَلے کرن دا ٹھیکہ ساڈی ادبی تنظیم ستائش باہمی تضحیکِ دیگراں کوں ملیا ہے۔ سِک رکھن آلے مقالہ نگار جلدی رابطہ کرن۔ پہلی فرصت اِچ رابطہ کرن آلیاں نال ترجیحی سلوک کیتا ویسی۔

ضروری اَرداس:

چونکہ عام آدمی روٹی پانی دے چکر اِچوں اِی نی نِکل سکدا۔ ہِیں کیتے یورپ اِچوں آون آلے شاعر یقین گمانی دی کتاب دی مُنہ ڈکھائی دی تقریب کوں کامیاب بناون تے سامعین دی کمی کوں پورا کرن سانگے مشاعرے دا انتظام وی کیتا گے۔ مشاعرے باز شاعراں توں ارداس ہے جو تقریب کوں کامیاب بناون کیتے ’’تُک بند پاچھو‘‘ آپنے نال گھن آون۔ اُنہاں دی شاعری سُنی ویسی۔ تے کھوایا پلوایا وی ویسی۔ وقت دی پابندی لازم ہے۔ موقع توں فائدہ چاون آلے نقاد تے شاعر اے موقع ہتھوں نہ ونجن ڈیون۔ (ٹھیکدار انجمن ستائش باہمی تضحیکِ دیگراں)

فلیپ تے دیباچے لکھواؤ:

راتیں رات شہرت دے اَسمان تے پُجن دی سِک رکھن آلے نویں شاعراں تے شاعرات کیتے سنہری موقع۔ آپنی پسند دے فلیپ تے دیباچے کتاب دا مسودہ ڈکھائے بغیر لکھوان کیتے ساکوںآ مِلو۔ شعر و ادب دے اُفق تے آپنا ناں لکھواؤ۔ آپنی قدر تے عزت ودھاؤ۔ نمونے دے فلیپ تے دیباچے منگواون کیتے سو روپے دے رسیدی ٹکٹ تے جوابی لفافہ بھیجو۔ جوابی لفاتے تے اپنا ایڈریس ٹھیک ٹھیک لکھنا ضروری ہے۔ لفافے تے تہاڈا ایڈریس ناں ہوون دی صورت اِچ لفافہ ساڈے کم وی آ سگدے۔ تے اکثر ایویں تھیندا ای راہندے۔ بہر حال ویلے سِر اطلاع ڈیون ساڈا فرض ہئی۔ لفافے تے جیکر تُساں آپنا ایڈریس نہ لکھیا تاں ذمہ دار تساں آپ ہو سو۔ (از پروفیسر ڈھنڈورچی کوچہ ’’ ادبی دنیا‘‘ )

فارغ البال حضرات توجہ کرن:

جے کر تہاڈے سِر دے وال لگا تار ڈھاندے پے ہووِن۔ تے تُساں بہوں سارے نُسخے اَزماون توں بعد مایوس تھی چکے ہووو۔ تاں وَل ہک ارداس ساڈی وی سُنو۔ تُساں رب دا شکر ادا کرو۔ جو تہاڈے سر تے وال کینی۔ تُساں پریشان نہ تھیوو۔ حیاتی اِچ پریشان تھیون دے قدم مقدم تے بے بہوں سارے موقعے ہن۔ تُساں اِنہاں نال لڑن دی فکر کرو۔ گنجے سِر تے وال رہاون بہوں اوکھا کم ہے۔ خشکی سِکری تے مہانگ دے ایں دور اِچ والاں دا ناں ہوون غنیمت ہے۔ کیوں جو وَالاں دی ہر ویلے ڈیکھ بھال ہک جھنجھٹ ہے۔ خدا نہ کرے تُہاڈی کہیں پاگل نال لڑائی تھی پووے۔ تاں یقیناً سب توں پہلے او تہاڈے لمبے تے سُہنے والاں اِچ ہتھ پیسی۔ اج دے ایں دور اِچ عزت پچاون دا بیا اسان حل کیا تھ سگدے جو تہاڈے سِر تے وال نہ ہوون۔ اساں وال دی کھل چِکھن دے قائل کینی۔ کجھ ساڈی وی مَنو‘ والاں دی فکرچھوڑو۔ (مشورے از حکیم خشکی سِکری والے)

قد ودھاؤ:

جنہاں بختاں آلے تریمتیں تے مرد لوکاں کول پیسہ ہے پر قسمت نال اُنہاں دا قد ’’چھوٹا رہ گے تے اساں ہمدردی تے افسوس دے سِوا بیا کجھ نی کر سگدے۔ پر اَساں تہاڈے سرمائے نال سماجی ادبی تے سیاسی قد کاٹھ اِچ وادھے کیتے گُر ضرور ڈسا سگدے ہَیں۔ منی آرڈر فیس دے نال جوابی لفافہ ضرور بھجیسو۔ فرق لگے تاں ساڈے مشوریاں تے عمل کریندے رواہے۔ ہک حد تو نیں قد ودھ ونجے تاں استعمال چھوڑ ڈیوئے۔ قد زیادہ ودھ ونجن دی صورت اِچ ادارہ ذمہ دار نہ بنسی۔

(اقتباس از کتاب: مُسکار (سرائیکی انشائیے)۔ از: ڈاکٹر خالد اقبال)

MubasherKaleem (talk) 15:36, 9 September 2018 (UTC)