ڈائری دا پنا : 37

ڈائری دا پنا : 37

شوکت ہنگورجو ' ریڈیو مٹھی دا کمپیئر ' تھر پارکر دا اعزازی گیم وارڈن ' تھر دے موریں دا ہرنیں دا راکھا ' سندھڑی دی شاعری دا عاشق ' پروفیشنل فوٹوگرافر ' سبھ توں اُتم گالھ جو خلیل کنبھار دا دوست ' ایں سارے پندھ وچ سادھ بیلا سکھر توں گِھن کراہیں کاسبو ننگرپارکر تئیں دا سنگتی ' ایں ویلے اوندے گوٹھ بُگھار وچ ہاسے ' روٹی مانی پِچھوں سنگتریاں تے خربوزیاں دی مہکار وچ کوئی داستاں در داستاں تھر دے عجائب دیاں گالہیں تھیاں ' گوٹھ در گوٹھ ویندیاں پرانڑیاں سڑکیاں ' چھتاں تئیں لَڈیے کھیکھڑے(پرانڑیاں لاریاں) ' نویاں بساں ' تھر کول پراجیکٹ دیاں نویاں سڑکاں ' ائیر پورٹ تے گزرل ڈو سال توں نہ تھیونڑ والی بارش دا ڈُکھ تے تھریاں دی تس دا حال وچوں چُلیا ' شوکت ہنگورجو تھر دی ہک چادر میکوں پوائی تے تھر دے سو سانگیاں وچوں نواں ہک سانگا گنڈھیج گیا ' ڈینہ دے چار اِتھاہیں وَج گئے ہَن ' خلیل روانگی دی ہکل ڈِتی ' وساخ دی چھاں وچوں نکھتے تاں باہر دُھپ ہئی ' چبوترے دیاں پوڑیاں لتھے ' پوڑیاں دے نال ہک جوبن بھریے ونڑ تلے ان کھڑیم ' خلیل کنبھار گاڈی وچ سامان پیا رکھیندا ہا ' شوکت ہنگورجو اینویں اُچے الا وچ بولیا ' رفعت بھائی ایہ جنگل جلیبی ہِے ' ایہو درخت ہئی جینکوں میں ہک مُد توں پیا گولیندا ہم ' جینکوں میں اپنڑی وسوں وچ وت ڈیکھنڑا چاہندا ہم' دوستیں کوں لکھیا ہا ایندی ڈس پاون ' ایہو ونڑ ہا میں جیندے بارے بیت لکھے " ایہو جنگل جلیبی ہے بھائی جیں بارے پوسٹاں تساں لایاں ہَن شوکت دے الا وچ تا ہئی ' ایہ واقعی جنگل جلیبی دا درخت ہا ' پَھل نال لڈیا ' ساویاں جنگل جلیبیاں رتیاں پیاں تھیندیاں ہَن ' میں اپنڑے اوں دوست کوں یاد کیتا جیں میکوں پہلی وار ڈسیا ہا اوندے سکول دے رستے وچ جنگل جلیبی ہئی۔ رفعت عباس