ڈائری دا پنا 54

ڈائری دا پنا : 54

کانٹیو توں ٹُر پیوسے ' ترے چار کلومیٹر اَگاں ہک ریت دے ٹَبے دی چاڑھی تے خلیل موٹر روکی ' اوندا فون ہا ' ڈوہئیں پاسے جے تئیں نگاہ ونجے تھر ہا ' بارش نہ تھئی ہئی ' نہ گھا ہا نہ پُھل ہا ' دور تئیں روہیڑا وی نہ ہا جو رتے اپنڑے پُھلیں دی مستی وچ نچے ' ول وی تھر دی موجودگی دی اپنڑی ہک جھمر ہئی جیڑھی میڈی ہتھیں تے پیریں کوں سریر پئی ڈیندی ہئی ' خلیل دا فون جاری ہا ' موٹر توں لتھم ' سڑک تے پیر دھریم ' سڑک دے کنارے توں ریت شروع تھی گئی ہئی ' ہمیشاں دے کہیں شوق وچ اگاں ٹریم ' ڈاہ بارھاں گز تے ہک بیری دا ونڑ ہا ' کہیں زمان تے مکان دے دِرگھ وچ کانٹیو توں ترے چار کلو میٹر امر کوٹ دوں ہک ٹِبے تے جیں توں سڑک پئی لنگھدی ہئی ہک نکی جہی بیری ہئی ' ایں نویں نویں بیری دا کوئی اَٹھ یا نؤں فٹ قد ہا ' ایں بھانویں پِچھلی بارش وچوں پَھل وی چاتا ہووے ' ایں بیری تے رتے بھانویں بیر وی لگے ہوون ' ایندے بیر بھانویں مِٹھے ہوون ' کہیں ماہنڑو یا پکھی ایندے بیر بھانویں کھادے ہوون ' ایں ویلے ایہ مینہ باجھوں سُک گئی ہئی ' ایں بیری اُتے کَنڈے ڈھیر تے پَترے گَھٹ ہَن ' ایں بیری دے نیڑے پُج گِیم ' جاہیں تے زمانیاں دے پھیر وچ ایں ویلے میں تھرپارکر دی ہک بیری دے بہوں نیڑے کھڑا ہم ' ایں بیری تلے سپ دی لیٹ ہئی ' ایہ لیٹ آپ پئی ڈسیندی ہئی جو سپ اِتھاہیں ایندے مُنڈھ نال رہندے ' ایں بیری توں ہک پیلا پتا سامنڑے میڈے ڈھٹھا تے تھر دی ریت تے بَیہ گیا ' ایں بیری دی ہک ٹنگلی تے ہتھ دھریم ' ایہ ہک نواں سانگا ہا ' تھرپارکر دی ایں بیر نال ہک نواں سانگا ' جگ جہان دی دوری تے قربت وچ ہک نویں تند ' ایں ویلے ایہ بیری میڈی قریب ترین ہستی ہئی ' اکھیں بند کیتم کھولیم ' ایں بیری کوں ڈٹھم تے ایندے گرد ہک پھیرا لایم وت ڈوجھا وت تریجھا ' ایں بیری کیتے خیر منگیم تے پِچھاں ولیم ' ایں بیری میکوں جَھل گِھدا ' ایں بیری دے ڈو ترے کنڈے میڈے چولے وچ لَیہ گئے ہَن ' کِھل پِیم ' ایں کانٹیو دی بیری میکوں جَھل گِھدا ہا ' ایہ بیری میکوں کجھ دیر بیا وی روکنڑ چاہندی ہئی ' ایں بیری دے کنڈے ایندے ہتھ ہَن ' ایں بیری میکوں روک گھدا ہا ' میں نیلے اپنڑے چولے وچوں ایں بیری دے کنڈے ترسلا نال چُھڑوائے ' اکھیں بند کیتم ول کھولیم تے ایندے چوفیروں ولیم ' ایندے کیتے وت چَنگائی منگیم تے سڑک دوں ٹُر گِیئم۔ رفعت عباس