ڈائری دا پنا 50
ڈائری دا پنا : 50
ایں دھرتی دے ہر بندے دی ' میں ' دی خیر منگدیاں چلہار شہر آ گیا '.... ' دوئی ' دے آدر وچ درشن دا ویلا ہا ' ایں وحدت الوجود دے بوہے توں باہر لوک اپنڑیاں گلیاں بزاراں وچ پئے ٹردے ہَن ' سلام تھرپارکر ! وحدت الوجود دے قلعے وچوں لوکیں کوں اپنڑی ' میں ' تے دوئی نال باہر نکلدا پیا ڈیدھا ہَم ' اُنہاں دا ایں تھر وچ موجود ہوون اُنہاں دی گواہی ہئی ' تھریاں دا بہوں دوروں پانڑی بھرنڑ اُنہاں دی ہوند ہئی ' زمین وچ پانڑی نہ ہئی آسمان تے بارش نہ ہئی پر اوہ ہَن ' اوہ کریہہ وچ نقل مکانی کریندے ہَن ول آ ویندے ہن ' اوہ چلہار وچ سڑک دے ڈوہیں پاسوں کھوکھیاں تے چاء پئے پیندے ہَن ' چاء پیندیاں چُسکی دی آواز ' میں ' ہئی ' چاء وچ گَھٹ بھانویں ودھ مِٹھا ' دوئی ' ہئی ' اُنہاں دی مردم شماری ہک عدد ہئی ' انہاں دے ووٹ کوں ہک ڈبے وچ بند کر تے انہاں دی تَڈ ساری آسلام آباد یا کراچی ڈھو ڈتی ویندی ہئی ' جیویں اساں سرائیکیاں دی 'میں' ساری اسلام آباد یا لہور دی ایکتا وچ ڈھویج ویندی ' پورے چلہار وچ لکڑ تار ہَل گئی ' ایہ لکڑ تار ہک 'میں ' توں ڈوجھی ' میں ' تئیں دا پندھ ہا ' ایں تند وچ دوئی تروئی دی واہند ہے ' چلہار اساں چاء پیونڑ کیتے رُک گئے ہاسے ' لوکیں ہک پھیریں ڈٹھا ترسلا کیتی تے ولدے چا پیونڑ پئے گئے ' ایہ مٹھی توں 30 کلو میٹر اُتر ڈینبھار دو 20000 ہزار آبادی دا شہر ہا ' اتھوں امر کوٹ 60 کلومیٹر ہا ' سڑک توں نکا جہا ہٹ کے چلہار میگھواڑیں دا شہر ہا پر اتھاں بھیل , مہیشوری ' گوسوامی مہاراج/باہمنڑ بجیر تے کنبھار وی آباد ہَن ' ایں گوٹھ وچ شری ماتا , راماپیر , مرلی دھر/ کرشن تے شیو دے مندر ہَن ' اگوں مسیت ہئی ' بُھجیا ایں شہر دی لُونڑی سوغات ہئی ' بُھجیا حلوائیاں دیاں ہٹیاں توں ملدی ہئی تے پورے تھر دا لُونڑا توشہ ہئی ' شہر توں ہک کلومیٹر تے رانا سَر تَرائی ہئی ' اینویں آکھو ہک وڈا ٹوبھا ' بارشاں پِچھوں ایہ ہک دیو مائی جاہ بنڑ ویندی ہئی ' جتھاں کرشن تے شیوا ڈوہیں لاہندے ہَن ' جتھاں شری ماتا تے راما پیر ڈوہیں درشن ڈیندے ہَن ' جتھاں ساونڑ بدراں وچ مٹھائیاں ہَلدیاں ہَن ' اسوں دی مہینے چلہار وچ میلہ ہک لگدا ہا ' اساں ' دے ایں میلے وچ تھر دی ' میں ' نچدی ہئی ' چلہار دے لوک اپنڑی ' میں ' دے سونڑہپ وچ ہَن ' دوئی دے آدر وچ ہَن ' چلہاری ہزار بھوگ پِچھوں حوصلے وچ ہَن ' اُنہاں کوں دُھروں پتہ ہا جو اوہ دنیا دی سبھ توں سوہنڑی جاہ تے رہندن۔ رفعت عباس۔