ڈائری دا پنا 45
ڈائری دا پنا : 45
مٹھی وچ رات دے بارہ وج گئے ہَن ' میڈے چاریں پاسوں مٹھی ہئی جیندے وت چاریں پاسوں تھر ہئی ' جیندے وت چاریں پاسوں جہان ہئی ' جیندے وت چاریں پاسوں کائنات ہئی ' ایں کائنات دے کہیں ویلے وچوں مٹھی ہک جاہ ہئی ' جیندا ویلا ایں گیسٹ ہاؤس دے کمرے دی کندھ تے پیا وجدا ہا ' ایہو میڈی ہوند (وقوف) ہئی جیندی بے ہوندی ( بے وقوفی) توں میں گھابر کے سِر تلے ڈوجھا سِرانڑا رکھ گِھدا ' اج رات مٹھی وچ ہوون میڈے کہیں کرم دا پَھل ہا ' شئیت الف لیلی و لیلی پڑھن دی برکت یا مولوی لطف علی دی مثنوی سُنڑن دا بھاگ یا لالن لال لطیف دے سُریں دا جادو یا خلیل کنبھار دی ہکل دی پَراڈو میں عجب ایں شہر دے تاریاں جَڑل اسمان تلے ہَم ' جاگنڑ دے ملک مصر توں ٹِھلیم تے نندر دے ملک ارم شہر گلستان ونج پُجیم ' مولوی لطف علی دے قصے وچوں جاگیم تاں دھمی مٹھی وچ ہَم۔ رفعت عباس