ڈائری دا پنا 34
ڈائری دا پنا : 34
بَگھار ' دوست شوکت ہنگورجو دی وستی ' اسلام کوٹ توں مِٹھی چھاچھڑو روڈ دے کنارے تے آباد ہئی ' خلیل کنبھار چٹی اپنڑی کلٹس سائیں محمد دادن خان ہنگورجو دے دیرے دو موڑی ' شوکت دے والد سائیں دادن خان پی پی پی تھرپارکر دا ہک وڈا ناں جیڑھا ہر اوکھ سوکھ وچ پارٹی دے نال پیا آندا ہا ' پی پی پی تھر پارکر دا جنرل سیکرٹری ریہا تے اج اتھاں اپنڑی پارٹی دا سینئیر وائس پریزیڈنٹ ہا ' بابا دادن اوہ جَنڑا ہے جیندی پارٹی نال وفا دی کمال کہانڑی ہے ' کنڈ تے کوڑے جھلے ادھی حیاتی جیل وچ لنگھی ' جام صادق تے ارباب غلام رحیم دا عذاب کٹیا ' پرویز مشرف دور وچ شوکت عزیز کوں وزیر اعظم بناونڑ کیتے ڈو نشستاں تے ضمنی انتخاب تھیا جیندے وچوں ہک نشست این اے 229 تھرپارکر ہئی ' بے نظیر ڈاکٹر مہیش کمار مَلانی کوں ٹکٹ ڈتی ' ارباب غلام رحیم وزیر اعلی ہا تے شوکت عزیز متوقع وزیر اعظم ' کئی ساتھی سمجھوتے دی راہ تے ٹریے پر بابا محمد دادن ہنگورجو تھر پارکر وچ اپنڑی پارٹی نال ڈٹیا ریہا ' بابے دادن دی جھوک ہئی نواں سوہنڑا دیرہ تے پچھوں حویل دار گھر ' اساں ہک چبوترے دیاں پوڑیاں چڑھیاں برآمدے وچوں تھیندے ہک ٹھڈے کمرے وچ پُج گئے ' رلانویں ہک واش روم وچ منہ تے پانڑی دے چَھٹے مارے ' صوفیاں تے چڑھ بیٹھے۔ رفعت عباس