ڈائری دا پنا 32

ڈائری دا پنا : 32

ولا مِلسوں کاسبو ' کارونجھر دے نال نال ننگر پارکر پئے ویندے ہاسے ' رِنڑ دا شیشہ اسمان تئیں پیا بکھدا ہا ' ایہ دنیا دے جغرافیے وچ ہکڑو میدان ہے جِتھاں آکاش دھرت تے دھرت آکاش بنڑ ویندا ہے ' پچھاں مُڑ تے کون ڈیکھے ' تیکوں ولا آندے ہوئے ڈیکھسوں رِنڑ آف کچھ ' 19 اپریل 2018 دا ڈینہ ننگر پارکر دے بزار توں پیا لنگھدا ہا ' جاہ تے ویلے دا ازلی ابدی ملاپ سمجھ پیا آندا ہا ' ایں ملاپ وچوں ماہنڑو کینویں لنگھدے بھیت پیا کھلدا ہا ' ایں دھرتی دے وارث قدیمی رہائشیاں کوں مِل کے پئے آندے ہاسے ' پہلے حملہ آوریں توں وی پہلے دے دھرتی جایاں دا درشن ہا ' میگھواڑ ' کولھی بھیل ایں دھرتی دا اوہ لُونڑا شیشہ ہا جیڑھا کہیں وی دھاڑل توں نی ترٹیا ' میگھواڑیں دا راما پیر تے بھیلاں دا واگھ(شینہ) اپنڑے نت دے تہواریں نال پیا تگدا ہا(بھیلیں دے دیوتا واگھ توں اپنڑی وسوں دے واگھے پئے یاد آون) کولھی ریاست تے نواں ہک اعتبار پئے کریندے ہَن ' ایہ دلت ہزاراں سالاں دی امر کہانڑی وچ پئے ٹُردے ہَن ' ایہ لوگ کہیں وی طرح دی مرکزیت اگوں اپنڑے ہوونڑ دی گواہی ہَن ' انہاں دے بھگوان کہیں وی طرحاں دی غلامی اگوں پہلا پہلا جتھا ہَن ' میڈے کیتے انہاں رلے پانڑی پیونڑ مانی کھاونڑ حیاتی دا سبھ توں وڈا سوبھ ہا ' میڈے کیتے اِنہاں کوں گُھٹ کے جَپھی پاونڑ حیاتی دا سبھاگ ہا ' اساں انہاں دھرتی جایاں دی تَڈ ڈھارس تے واہند دی کتاب پڑھی آندے ہاسے۔ (رفعت عباس)