ڈائری دا پنا 28
ڈائری دا پنا : 28
راما پیر کاسبو مندر دے بوہے تانڑیں آیا ' اوں ساکوں ہک بال توں موریں دے پَریں دا گُچھا گِھن سوبھ کیتا ' راما پیر بال کوں سو روپیہ ڈیونڑ کیتا ' بال نہ وچ سر ہِلایا ' راما اوندے سر تے ہتھ پھیریا تے سو روپیہ اوندے کھیسے وچ پا ڈِتا ' موریں دے پریں دا گچھا سینے لیندے مندر توں باہر نکھتیوسے ' عین ایں ویلے راما پیر کوہاں دور بھوج دے اپنڑے مندر وچ موراں دے کِرے ہوئے پَر کٹھے پیا کریندا ہا ' موریں دے دانڑا پانڑی دا اہر پیا سِتریندا ہا ' راما پیر کچھ دے لوکیں دی معاش وچ عملی برکت ہا ' لُونڑ دیاں کیاریاں تے لُونڑ دیاں ڈلیاں بناونڑ وچ تے لُونڑ کوں منڈی تئیں پُجنڑ تے لُونڑ دے نرخ تے لُونڑ ہاریاں دی روز دی حیاتی دا میلہ ہا ' راما پیر کچھ دے چٹے میدان وچ رنگیں دا تہوار ہا ' راما پیر ریاستی بھگوان نہ ہا اوہ این جی اوز دے پروگرامز تیں پوسٹرز توں گھبراندا ہا ' این جی اوز والے ایں بھگوان دا میلہ راجدھانی وچ لیندے ہَن ' راما پیر نہ ویندا ہا۔ رفعت عباس