ڈائری دا پنا 26

وکیپیڈیا توں

ڈائری دا پنا : 26

راما پیر مندر وچ مور ہَن, ڈیل(مادہ مور) ہَن ' بھگوان ہا ' رنگلے بانیاں وچ یاتری تریمتیں ہَن ' دھمی دی پراتھنا ہئی ' پرشاد ہئی ' بھگوان موریں دے کرکار وچ اکھیں کُھلیندا ہا وت نُوٹ گھندا ہا ' یاتری ٹلیاں وجیندے ہَن وت جاگ پوندا ہا ' میں ٹلیاں وجایاں بھگوان جاگیا خوش تھیا ' ایہ تل وطنیاں دا بھگوان ہا ' اُنہاں کوں رلیاں ٹھہاونڑ تے موریں دے پکھ نال پَکھے بناونڑ سکھیندا ہا ' تل وطنیاں دا بھگوان اُنہاں دی معاش وچ مدد کریندا ہا ' تریمتیں کُکڑیں تلے انڈے جو رکھن ہا اہر کریندا ہا جو ہک وی انڈا نہ پِھٹے ' تریمتیں دے سر تے بیلڑو(ڈو گھڑے) دی سانبھ کریندا ہا ' بارشاں نہ تھیون ہا تاں گوٹھ وچ موریں تے بالیں کٹھے بھگوان خود اپنڑے کولوں مینہ آپ منگے ہا ' دھرتی جائیاں دا بھگوان بہوں دلچسپ ہا ' اساں مقامی لوکیں دا خدا وی بہوں مہربان ہے ' ایندیاں کچیاں مسیتاں وچ ڈیوے راتیں بالو تاں سوہنڑے خاب ڈِکھلیندے ' روہیڑے تے کرینہ دے پُھلیں وچوں سڈیندے ' ساڈے نال کنڑک دی کپوائی تے کپاہ دی چُنڑوائی وچ ہتھ ونڈیندے ' ایہ ساکوں پیلھوں دیاں ٹوریاں پٹھیندے, اساں ایندے کیتے امنب تے نارنگیاں رہیندے ہیں, اینکوں ساڈی بولی آندی ہے ' ایہ ساڈے نال ساڈی بولی وچ الویندے ' اساں ایندیاں گالہیں وچوں بیت بنڑیندے ہیں ' ایہ حملہ آور تے ریاست دے خدا توں اصلوں وکھرا ہے۔ رفعت عباس

حوالے[لکھو | ماخذ وچ تبدیلی کرو]