ڈائری دا پنا 24

ڈائری دا پنا : 24

ڈیو جی نال تھیا ' کاسبو دیاں گلیاں وچوں ولدے, نبو دے باغ وچوں تھیندے, راما پیر مندر دے بوہے تے پج گیوسے ' ہک پھیریں ہُنڑ گِنڑدے ہَیں, ننگر پارکر دا پیالہ, کارونجھر دی ہمیشگی , کاسبو دی راہ دا منتر , رِنڑ آف کچھ دا شیشہ , موریں دا آبائی وطن کاسبو ' ڈیو جی دی مسکان تے ہنڑ راما پیر مندر ' ایہ سارا طلسم میڈی سنبھال توں باہر ہا ' ایہا جاہ ہے جِتھاں میں ساری حیرت وچوں نکل کے غیر رومانی سوکھا ہک بندہ بنڑ ویندا ہاں ' جیڑھا سادے جہے ماہنڑو وانگوں جہان کوں سادگی نال ڈیدھا ہے جیڑھا اکھیں کوں بِھرکنڑ تے ہوٹھیں کوں کنبنڑ توں جھلیندا ہے ' جیڑھا دل کوں سمجھیندے جو سبھ خیر ہے ' پیریں کوں ڈسیندے جو ہک بئی جاہ ہے جتھاں جُل نچنڑے ' ایہ ہک عجب حیرت ہے جتھاں تساں حیرت کوں ڈکیندے ہو ' راما پیر مندر دے اندر ایں کائنات دیاں ساریاں نِماں موجود ہَن تے ہک ہک نَم تے ڈاہ ڈاہ مور ہَن پر میکوں کیا ' ہک نَم تلے کاسبو دا نابینا موسیقار یوسف فقیر ہک رلی تے ڈو اپنڑے سنگتیاں نال ہارمونیم تے پیا گاندا ہا پر میکوں کیا ' میں اپنڑے مونڈھیاں تے ایڈی حیرت نہ چا سگدا ہم۔ رفعت عباس