ڈائری دا پنا: 22

ڈائری دا پنا: 22

اساں کاسبو ہاسے ' ایں کرہ ارض دا ہک گوٹھ جیڑھا کارونجھر تے رِنڑ آف کچھ دے وچالے پیا وسدا ہا ' جتھاں اج اسمان دا رنگ پیلا ہا تے میگھواڑاں دیاں چتھاں تے موریں دی نیلی تے ساوی ہک جھال پئی پوندی ہئی ' کاسبو دیاں سڑکاں ہی کاسبو دیاں گلیاں ہَن ' ڈوہیں پاسوں کچے گھراں دے اساں اگوں لنگھے ' کہیں کہیں جاہ کندھاں دروازے تے ڈھیر جاہیں جھاڑیاں دے لوڑھے مارے ہوئے ' کہیں کہیں جاہ گھراں تے نقش نگاریاں ' اساں ہک عمراں توں ایں گوٹھ وچوں پئے لنگھدے ہاسے ' اِنہاں بالیں نال جائے ہاسے ' اِنہاں بُڈھڑیاں نال ہنڈ گئے ہاسے ' جیڑھے ویلے تریمتیں دیاں چُنیاں چولیاں تے موریں دے پکھ پئے بنڑدے ہَن اساں اتھاہیں ہاسے ' اساں ایں کائنات دی گولاٹی وچ پئے گُھمدے ہاسے ' ایں گوٹھ وچ چڑیاں ہَن لالیاں ہَن کاں ہَن کُکڑیں تے بطخاں ہَن ' نت دے سُونہے وَنڑ ہَن ' نت دی سُونہیں غربت ہئی ' غربت دی سانجھ ہئی جیڑھی کاسبو تے تحصیل شجاعباد وچ میڈی وستی چک آر ایس کوں پئی گنڈھیندی ہئی ' اساں اِتھاں کہیں نویں داستان وچوں غربت دا سوال بُجھنڑ آئے ہاسے ' اساں پروبھرے ایں گوٹھ کاسبو وچ اوں بلاں دا ناں بُجھنڑ آئے ہاسے جیندی پُچھ اساں گوٹھ در گوٹھ ڈِٹھی ہئی ' اساں غربت دے رومان توں نسردی حیرت کوں مکلاونڑ کیتے آئے ہاسے ' اساں اوں مسرت دی گول وچ آئے ہاسے جیڑھی حیاتی کوں برابری وچ گنڈھیندی ہے ' کاسبو دی ابدیت ایں پرانڑے سوال کوں جنم پئی ڈیندی ہئی ' میڈی بُکل دے بہوں سارے چور پئے پکڑیندے ہَن ' میں اپنڑے رومان توں بئے ہک رومان دی اُساری وچوں باہر پیا نکدا ہم ' میں لوکیں دے ڈکھ تے اُنہاں دی مونجھ توں حیرت تے مسرت کشید کرنڑ دے بھوگ توں واندا پیا تھیندا ہم ' مور سڑکاں توں اُڈ کے چھتاں تے پئے لاہندے ہَن ' اگوں دکاناں تے میگھواڑیں دی ہمیشگی دے گھر ہَن ' اساں ڈیو جی دے بوہے اگوں پُج گئے ہاسے. رفعت عباس (रिफ़ात अब्बास)