پیر پھوکے شاہ انشائیہ

پیر پھوکے شاہ انشائیہ

از: ڈاکٹر خالد اقبال سادہ لوح تے مالی تے نفسیاتی پریشانیاں توں عاجزمفلوک الحال لوکاں کوں اِطلاع ڈتی ویندی ہے جو پیر پھوکے شاہ مدظلہ عنقریب تہاڈے شہر اِچ آپناجلو ہ ڈکھاون آلے ہِن۔ پیر پھوکے شاہ مدظلہ دیاں کرامات دی تعریف ہک زمانہ پیا کریندے۔ تمنا بھانویں کیہو جئیں کیوں نہ ہووے۔ ہر صورت اِچ پُوری تھیسی۔ ایندے کیتے تہاڈے عقیدے دے کمزور ہوون دی لوڑ ہے۔ تُساں پریشان نہ تھیوو۔ نا اُمیدی گنا ہ ہے۔ اے اُنہاں بھینڑیں تے بھرانواں کیتے خوشخبری ہے جیڑھے وڈے وڈے عالماں‘ نجومیاں تے پروفیسراں کول مایوس تھی چکے ہِن تے آہدے ہِن جو عملیات تے تعویزاں نال کجھ نی تھِیندا۔ تعویزاں تے عملیات دا اثر کیوں نی تھیندا۔ بالکل تھیندے۔ ’’پیر پھوکے شاہ‘‘ نے وڈے وڈے بُرج اُلٹا ڈتن۔ کئی ہسدے وَسدے گھر اُجاڑ ڈتن۔

یورپ دی ساری ترقی پیر پھوکے شاہ مدظلہ دے کشف و کرامات دا معجزہ ہے۔ جیکر بدقسمتی تے حالات دے پھیر دا اثر ہے۔ کم بَن بَن کے وِگڑ ویندن۔ یا دشمناں نے تنگ آمد بجنگ آمد تے مجبور کیتا ہویا ہے۔ تاں ڈانگ‘ خنجر‘ پستول‘ دے استعمال دی اصلوں لوڑ کینی۔ کیوں جو تہاڈا دشمن بہوں چالباز ہے۔ اوتاں تہاڈے ہتھوں مرن آلا کینی۔ تُساں آپنے ہتھ خون اِچ کیوں رنگنا چاہندے ہیوے۔ تھانے کچہریاں اِچ انج خُوار تھیسو۔ کچہری اِچ وَکیل تاں بیٹھے اِی فیس دے چکر اِچ ہِن۔ تہاکوں اَرداس ہے۔ جو تُساں پیر پھوکے شاہ دے کولوں دم کراؤ۔ تے آپنے سارے سادہ‘ آسان تے مشکل مسلے اُنہاں کول حل کراؤ۔ تساں مقدمہ بازی اِچ اصلوں وقت ضائع نہ کرو۔ پولیس کوں تاں بیا کم ای کوئی کینی۔ پولیس دا تاں کم اِی تھانیاں اِچ بہہ کے مقدمے درج کرنا ہے۔ ایف آئی آرلکھواون اوئیں اِی بہوں اوکھا کم ہے۔ بہوں سارے پولیس آلیاں کوں تاں ایف آئی آر لکھنا اِی نی آندی۔ اکثر غلط ایف آئی آر لکھ ڈیندن۔ مَحرم کوں مجرم تے مجرم کو مَحرم بنا ڈیندے ہن۔ قانونی معاملیاں اِچ سِرِ کھپاون کوئی اَسان کم تھوڑا ہے۔ تے جیکر مقدمہ ٹُر پووے تاں کئی سال کچہریاں دے چکر کٹیندا پھرے‘کون!

او لوک جیڑھے آپنے مسائل دے پاروں اوکھے حالات اِچ پھس چُکن پیر پھوکے شاہ آپنے ہکے پھوکے نال تہاڈیاں ساریاں پریشانیاں دور کر سگدے ہِن۔ محبت کوں نفرت اِچ بدلنا‘ شادی اچ رکاوٹ‘ کاروبار کوں ٹھپ کروانا‘ کہیں دے گھر اِچ بے برکتی پواوَنا‘ تے خوشحال لوکاں کوں پریشان کرنا‘ ذال مرد کوں لڑوانا‘ افسر دا تبادلہ کروانا‘ وغیرہ وغیرہ۔ المختصر ہر قسم دی دنیاوی تے ذہنی پریشانی اِچ اضافے کیتے پیر پھوکے شاہ دیاں خدمات حاصل کرو۔ چنگا حل تے چنگا فیض پاؤ۔ حسبِ توفیق ڈو کالے بکرے بطورنذرانہ نال گھن آؤ۔

پیر پھوکے شاہ نے نواں دھندہ شروع کیتا ہے۔ ایندے کول پہلے پیر پھوکے شاہ بجلی دیاں چیزاں دی مُرمتی دا کم کریندے ہَن۔ ہک ڈینہہ اُنہاں کوں بجلی دا کرنٹ لکیا۔ تے ایں کم توں توبہ تائب تھی گے۔ تے لوکاں دے کم پھوکیاں نال کرن لگ پے۔ بہوں سارے لوکاں دے کولر‘ گیزر‘ استریاں‘ ائیر کنڈیشنر‘ فریج وغیرہ جیڑھے عرصہ دراز توں خراب پے ہَن۔ پیر پھوکے شاہ دے پھوکیاں نال صحیح سلامت چلدے پِن۔ حیرت ہِیں گالہہ تے ہے جو اِنہاں دے تاں بِل ای بہوں گھٹ آون پَے گن۔ پیر پھوکے شاہ دی کرامتاں دی مشہوری تے اُنہاں کیتے سِدھے سادے تے پریشان حال گاہکاں کوں گھن آون کیتے کجھ کارندیاں دی بہوں لوڑ ہے۔ اُنہاں دے لنگر اِچوں ٹُکر پانی ‘ رہائش مفت ڈتی ویسی۔ فی گاہک کمیشین تے کم کرن کیتے بالمشافہ ملاقات ضروری ہے۔ فون کرو تے ملاقات کیتے پیر پھوکے شاہ دے آستانے توں ٹوکن معاوضے نال حاصل کرو۔ تہاڈی زندگی اِچ رہی سہی خوشی مایوسی اِچ بدل ویسی۔ اُلجھن کوئی وی ہووے پیر پھوکے شاہ دے آستانے تے آون آلے سِدھے سادے مریداں دیاں بھنیاں تُرٹیاں سائکلاں چوری کرن دے موقعے وی ہِن۔ ایندے کیتے نینگراں کوں پیر پھوکے شاہ دے خلیفے پیر بدگمانی نال خفیہ شرائط تے معاہدہ کرنا پوسی۔ پیر پھوکے شاہ ہر علم دی کاٹ پلٹ دے ماہر ہن۔ سو فیصد گارنٹی‘ کجھ ڈینہہ پہلے قافلہ در قافلہ کجھ لوک پیر پھوکے شاہ کول مہنگائی دی وجہ نال پریشان تھی کے یوٹیلٹی بل نال گھن اَئے ہن۔ جنہاں اِچ سوئی گیس‘ بجلی‘ ٹیلی فون دے بِلاں تے پھوکا پڑھواونآندے رہیے جو اے بل بغیر پیسیاں دے اَدا تھی ونجن۔ تاں ایں سلسے اِچ عرض ہے بلاں دی ادائیگی کوئی ایڈا وڈا مسئلہ کینی۔ پر پیر پھوکے شاہ ہ ہک نیک تے وطن نال محبت کرن آلے ہن۔ اوچاہندے ہِن جو لوک ٹیکس ادا کرن۔ یوٹیلٹی بل ادا کرن تاں جو ساڈا ملک خوشحال تھیوے۔ (آمین)

عطیہ اشتہار

ازطرف متاثرین پیر پھوکے شاہ مدظلہٗ

(اقتباس از کتاب: مُسکار (سرائیکی انشائیے)۔ از: ڈاکٹر خالد اقبال)

MubasherKaleem (talk) 14:12, 11 September 2018 (UTC)