پیر سید جماعت علی شاہ

امیرِ ملت پیر سید جماعت علی شاہ رحمتہ اللہ علیہ
مزار اقدس
سلسلہ:	نقشبندیہ
لقب:	امیرِ ملت
سکونت :	علی پور سیداں، ضلع نارووال

پیر سید جماعت علی شاہ محدث علی پوری امیر ملت دے ناں نال شہرت رکھدن۔

ولادت

سید جماعت علی شاہ 1834ء وچ علی پور سیداں ضلع سیالکوٹ پنجاب وچ پیدا تھئے ۔(ہک روایت 4/صفر 1320ھ بمطابق13 مئی 1902ءہے)
امیر ملت دے والد دا ناں حضرت پیر سید کریم شاہ ہئی جیہڑے خود وی عارف باللہ تے ولی کامل ہن۔ آپ نجیب الطرفین سید ہن۔ آپ دا سلسلہ نسب اٹھتریہہ واسطیاں نال حضرت علی المرتضیٰ رضی اللہ عنہ تک پہنچدے۔

تعلیم و تربیت

امیر ملت نے ست سال دی عمر وچ ہی قرآن پاک حفظ کر گھدا۔ آپ دا تعلق مسلک اہلسنت و جماعت نال ہئی علوم دینیہ مولانا غلام قادر بھیروی، مولانا فیض الحسن سہارنپوری، مولانا قاری عبد الرحمن محدث پاݨی پتی تے مولانا احمد علی محدث سہارنپوری توں حاصل کیتے۔ سند حدیث علما پاک و ہند دے علاوہ علماء عرب توں وی حاصل کیتی۔ ہک واری آپ نے بطورِ تحدیثِ نعمت فرمایا، میکوں 10 ہزار احادیث مع اسناد دے یاد ہن۔

علوم ظاہری دے بعد آپ فیوض باطنی دی طرف متوجہ تھئے تاں امام کاملین قطب زماں بابا جی فقیر محمد چوراہی دے دستِ حق پرست تے سلسلہ عالیہ نقشبندیہ وچ داخل تھی کے اونہی وقت خرقۂ خلافت توں نوازے ڳئے۔ ایندے تے مریدین نے اعتراض کیتا تاں باوا جی نے فرمایا کہ جماعت علی تاں چراغ وی نال گھن آئے ہن، تیل بتی تے دیا سلائی وی انہاں کول موجود ہئی، میں تاں صرف انہاں کوں روشن کیتے۔

خدمات

امیر ملت نے پنجاہ توں زیادہ حج کیتے۔ سینکڑاں مسجداں بݨوائے تے بے شمار دینی مدارس قائم کیتے۔ سیاسی تحریکاں وچ وی حصہ گھندے رہیے۔ شہید گنج دی تحریک دے ݙینہاں وچ آپ نے ہندواں دا ڈٹ کے مقابلہ کیتا تے برہمناں دے پراپیگنڈے دا سدباب کرݨ کیتے مبلغین دی ہک جماعت تیار کیتی جیں نے قریہ قریہ تے شہر شہر گھم کے تبلیغ اسلام کیتی۔ 1935ء وچ مسجد شہید گنج دے سلسلے وچ راولپنڈی شہر وچ عظیم الشان جلسے دا انعقاد تھیا، جیندے وچ پیر صاحب کوں امیر ملت دا لقب ݙتا ڳیا۔ تحریک پاکستان کیتے آپ دی خدمات بے مثال ہن۔ آل انڈیا سنی کانفرنس دے سرپرست ہن۔ 1885ء وچ لاہور وچ انجمن نعمانیہ دی بنیاد رکھی تے 1901ء وچ انجمن خدام الصوفیہ دی بنیاد رکھی ۔

علامہ اقبال کوں امیر ملت نال گہری عقیدت ہئی۔ ہک واری امیر ملت دی صدارت وچ انجمن حمایت اسلام دا جلسہ تھیندا پیا ہئی۔ جلسہ گاہ وچ ٻہݨ دی جگہ نہ ہئی۔ علامہ اقبال ذرا دیر نال آئے تے امیر ملت دے قدماں وچ ٻیہہ کے آکھا: ”اولیا ءاللہ دے قدماں وچ جگہ پاوݨ وݙے فخر دی ڳال ہے۔“ ایہ سݨ کے امیر ملت نے فرمایا: ”جیندے قدماں وچ ”اقبال“ آ ونڄے اوندے فخر دا کیا آکھݨا۔“

علامہ اقبال دے آخری ایام وچ ہک محفل دے دوران امیر ملت نے فرمایا: ”اقبال! تہاݙا ہک شعر ساکوں ٻہوں پسند ہے۔“ ول ایہ اردو شعر پڑھا:

؎ کوئی اندازہ کر سکتا ہے اس کے زور بازو کا

نگاہِ مردِ مومن سے بدل جاتی ہیں تقدیریں

علامہ اقبال دی خوشی ݙیکھݨ آلی ہئی چنانچہ آپ نے آکھا: ”ولی اللہ دی زبان توں ادا تھیوݨ والا میݙا ایہ شعر میݙی نجات کیتے کافی ہے۔“

وصال

26 ذیقد 1370ھ بمطابق 30 اگست 1951ء امیر ملت ایں دنیا توں رخصت تھی ڳئے ۔