پوڳا

وکیپیڈیا توں

پوڳا

اے کھیݙ وی میݙے وسوں دی سونہڑی کھیݙ ھ. ایندے وچ وی کھݙکاراں دی کئی اڑیک کائنی ہوندی. ایندے وچ وی ہر کھݙکار کول ݙنے ہوندن، ایں کھیݙ وچ وی ڳوڑھی شودی کٹیندی ھ تے واری ݙیوݨ آلے کوں وی ݙاڈھے رودھے اندن. ایں کھیݙ وچ سبھائیں کول پہلے پُکھے پمدن. چھیکڑی نمبر آلا بندہ واری ݙیندے پکھے کیویں پمدن ایندی تفصیل منڈی آلی کھیݙ وچ ݙسا ڳیاں. کھیݙ دا منڈھ ٻدھݨ کنے پہلے سارے کھݙکار تقریبا پنج پنج فٹ دے پندھ تے نکیاں نکیاں کھݙوکلیاں مار گھندن تے ݙنے چا تے کھڑ ویندن. انہاں دا ہک پیر اوں کھݙ وچ راہندے. ول جیندے اُتے واری امدی ھ او ویہہ قدم پرے ونج تے ڳوڑھی اتے سٹیندے. ڳوڑھی جیہڑے کھݙکار دے نال ونجے اوہو اوں ڳوڑھی کوں ٹلا مار پرے سٹیندے. واری ݙیوݨ آلا اوں ڳوڑھی کوں پَِلو وچ جھݨ دی کوشد کریندے یا وت ریڑھدی ڳوڑھی کوں پلو وچ پا گھنے تاں جیہڑا ٹلا مریندے اوندے اتے واری آ ویندی ھ. جے واری ݙیوݨ آلا ڳوڑھی پلو وچ نہ پا سڳے تاں وال ڳوڑھی چا تے کہیں ہک کھݙکار کوں تک تے مریندے جے کہیں کھݙکار کوں او ڳوڑھی لڳ ونجے تاں واری اوں کھݙکار تے آ ویندی ھ. ݙنے آلے کھݙکار ݙنے ناک ڳوڑھی کوں ݙک تے. ٹلا مریندن. جے تھوڑی پرے ہووے تاں ول ہک لت تے ٹر تے ٹلا مریندن. ایں دوران جے واری ݙیوݨ آلا اوں کھݙکار دی کھݙ تے قبضہ کر ونجے تاں واری اوں کھݙکار تے آ ویندی اے ول او اپڑاں ݙنا اوں بندے کوں ݙیسی جیہڑا اوندی گُھری تے قبضہ کر ویسی. ول او کھݙکار اتھاؤں ڳوڑھی کوں ٹلا مریسی جتھاں ڳوڑھی پئی ہوسی ول اے کھیݙ اونویں چلسی پئی. ایں کھیݙ وچ کئی کھݙکار پوڳا وی منگ سڳدے مطلب ڳوڑھی جتھاں پئی ہوسی. جیہڑا کھݙکار آکھسی پوڳا اے. تاں ول او کھݙکار آپڑیں گھری چھوڑ تے ہک لت تے ویسی تے ڳوڑھی کوں ٹلا مریسی. جݙاں ٹلا لڳ ویسی ول واری ݙیوݨ آلا تے ٹلا مارݨ آلے دی گھری دو بھڄسی تے ٹلا مارݨ آلا ہک لت تے منڈا تھی اپڑیں گھری دو ولدے. جیہڑا پہلے گھری تگ قبضہ کر گھنے گھری اوندی تے ݙوجھا واری ݙیندے. ایں طرحاں دو صورتحال اوں ویلھے بݨدی ھ جئیں ویلھے ڳوڑھی کہیں کھݙکار دے ٻہوں نیڑے ہووے. ول کھݙکار پوگا منگدے. اے کھیݙ وݙی مزیدار ہوندی ہئی پر افسوس اے مزیدار کھیݙاں مکدیاں ویندین. انہاں کھیݙاں کو جے #سکولاں وچ کھیݙایا ونجے تاں ٻالاں دی صحت وی چنگی راہسی تے ساݙیاں اے کھیݙاں وی محفوظ تھی ویسن. [[ونکی:سرائیکی کھیݙاں]]