پاکستان ریلوے

پاکستان ریلوے Pakistan Railways
قیام:	1947ء
ملازماں دی تعداد:	72,078 (2016ء-2017ء)
ویب سائٹ :	[١], pakrail.gov.pk

پاکستان ریلویز دا ڄال تمام ملک اچ پھیلا ہویا ہے۔ تقریباً سب ہی ریلوے لائن براڈ گیج ہن۔ پاکستان ریلوے دا نیٹ ورک مین لائناں تے برانچ لائناں اچ تقسیم ہے۔ پاکستان ریلویز دا صدر دفتر لہور وچ ہے تے ایہ پورے پاکستان اچ 7,791 کلومیٹر (4,650 میل) آپریشنل ٹریک دا مالک ہے۔ جیندے اچ 7,346 کلومیٹر براڈ گیج تے 445 کلومیٹر میٹر گیج ہے تے 1,043 کلومیٹر ڈبل ٹریک تے 285 کلومیٹر برقی حصے تے مشتمل ہے۔ پاکستان ریلوے دے 625 فعال اسٹیشن ہن۔ جیہڑے مال بردار تے مسافر ݙوہاں دی خدمات پیش کریندن۔ پاکستان ریلویز دی ٹریناں دی رفتار زیادہ توں زیادہ 120 کلو میٹر فی گھنٹہ ہے۔ پاکستان ریلویز جیندا سابقہ ناں 1947ء توں فروری 1961ء تک شمال مغربی ریلوے تے فروری 1961ء توں مئی 1974ء تک پاکستان مغربی ریلوے ہئی، حکومت پاکستان دا ہک محکمہ ہے جیہڑا پاکستان وچ ریلوے خدمات فراہم کریندے۔ موجودہ پاکستان اچ ریلوے دا آغاز 13 مئی 1861ء اچ تھیا جݙݨ کراچی توں کوٹری 169 کلومیٹر ریلوے لائن دا افتتاح تھیا۔ 24 اپریل 1865ء کوں لہور - ملتان ریلوے لائن کوں ٹریناں دی آمدورفت کیتے کھول ݙتا ڳیا۔ 6 اکتوبر 1876ء کوں دریائے راوی, دریائے چنانہہ تے دریائے جہلم تے پلاں دی تعمیر مکمل تھی ڳئی تے لہور - جہلم ریلوے لائن کوں کھول ݙتا ڳیا۔ 1 جولائی 1878ء کوں لودهراں - پنوں عاقل 334 کلومیٹر طویل ریلوے لائن دا افتتاح تھیا۔ 27 اکتوبر 1878ء کوں دریائے سندھ دے مغربی کنارے تے کوٹری توں سکھر براستہ دادو تے لاڑکانہ ریلوے لائن کوں ٹریناں دی آمدورفت کیتے کھول ݙتا ڳیا۔ رک توں سبی تک ریلوے لائن وچھاوݨ دا کم جنوری 1880ء اچ مکمل تھیا۔ اکتوبر 1880ء اچ جہلم - راولپنڈی 115 کلومیٹر طویل ریلوے لائن کوں ٹریناں دی آمدورفت کیتے کھول ݙتا ڳیا۔ 1 جنوری 1881ء کوں راولپنڈی - اٹک دے درمیان 73 کلومیٹر طویل ریلوے لائن کوں کھول ݙتا ڳیا۔ 1 مئی 1882ء کوں خیرآباد کنڈ - پشاور 65 کلومیٹر طویل ریلوے لائن دی تعمیر مکمل تھی ڳئی۔ 31 مئی 1883ء کوں دریائے سندھ تے اٹک پل دی تعمیر مکمل تھیوݨ دے بعد پشاور، راولپنڈی نال بذریعہ ریل منسلک تھی ڳیا۔