ٻیڑی کندھی لڳ ونجے

سارے لوک کلمہ پڑھ پڑھ دعا کریندے بیٹھے ہن اللہ کرے ٻیڑی پرلی کندھی لگ ونجے، جڈاں سیت ہردے ورد وظیفے کم نیں آندے، ٻیڑی بھنور توں نکل کے چکڑ ءچ پھس گئ، کجھ مسافریں سارا قصور ٻیڑی تیں تھپ ڈتا نہ اے ٻیڑی ہوندی نہ اساں زلیل تھیندے، کجھ مسافریں موہاݨیں کوں مندے گالھیں کڈھ کے آپڑاں دل ٹھڈا کیتا، تھوڑی دیر تاں بک بک کریندے ریہ آخر کار فیصلہ کیتونے سارے رل کے ٻیڑی کوں دھکا لؤ ہک مُٹھ تھی کے جڈاں زور لئیسوں اللہ پار کریسی،مسافریں اے مشورہ ونج کے موہاݨیں کوں ڈتا کیونکہ ٻیڑی دے کرتا دھرتا اوھے ہن، مسافریں دی گال سُݨ کے کجھ موہاݨیں خوش تھئے اکثر ناراض تھی پئے، کہ مسافریں کوں اے حق کئیں ڈتے کہ ٻیڑی دے بارے کوئ فیصلہ کرن، موہاݨیں تیں مسافریں دی ساری بحث بانس آلا موہاݨاں چپ کرکے سُݨدا ریھ گئے، بانس آلا موہاݨاں اُو ہوندے جیرھا ٻیڑی دے کناریں تیں بانس چاء کے، ٻیڑی کوں جیرھے پاسے گھن ونجے، ٻیڑی دے سارے مسافر ایندے رحم وکرم تیں ھوندن اے چاھوے تاں ٻیڑی کوں سیدھے راہ ٹور ڈیوے یا وت آپڑیں مرضی دے موہاݨے ٻیڑی تیں مسلط کرکے مسافریں دیاں چیکاں سُݨے، خیر، جڈاں مسافریں دا شور زیادہ تھیاء ٻیڑی کوں ہر حال کنارے لاوݨ دا.

پچھیں ڈانگ آلے موہاݨے آخری فیصلہ کیتا کہ میں جیویں آکھساں تساں انویں کرو تاں ٻیڑی کوں کڈھدے ھئیں، ساریں رل کے آکھیاء سئیں تساں ٻیڑی دے محافظ ھاؤ جیویں آکھسو انویں کریسوں، بھلا تساں کنیں وڈا خیر خواہ ایں دنیاں تیں کون ھے، مکدی مکاؤں ڈانگ آلے موہاݨے ڈو پارٹیاں مقرر کیتاں ہک پارٹی ٻیڑی دے پچھو کھڑ گئ ڈوجھی اگو ونج کے کھڑ گئ، مسافریں کوں ترسلا تھیاء چلو ہُݨ کنارے لگسوں، آخر ڈانگ آلے موہاݨے حکم ڈتا ڈھائیں پارٹیں کوں شاباش لاؤ زور، اگو آلی پارٹی پچھو تیں زور لایا پچھو آلی پارٹی اگوں تیں زور لایا، مسافریں ڈانگ آلے موہاݨے دے حق ءچ آن نعرے ماریے، جڈاں نعرے مار مار تھک پئے،، آنے پٹ کے ٻیڑی دو ڈیٹھا ٻیڑی نکلݨ دے بجائے، صرف ہلدی کھڑی ھئ، کجھ مسافریں ہمت کرکے ڈانگ آلے کوں آکھیا حضور حالت تھاڈے سامݨے ھے مناسب سمجھو تاں پارٹیاں وٹاؤ ڈانگ آلے اوں ویلھے حکم ڈتا شاباش اگو آلی پارٹی پچھو تیں پچھو آلے اگو ول آؤ،مسافر پہلے بہوں خوش تھئے، ہݨ ٻیڑی ضرور نکلسی مگر کتھاں اوھے دھکے نصیب تھئے آخر مسافر تنگ تھی کے ولا ڈانگ آلے کنیں گئے ڈھائیں پارٹی آلیں کوں مندے کڈھیے تیں نویں لُوکیں دا مطالبہ کیتا ڈانگ آلے اوں ویلھے آڈر جاری کیتا نویں بندے آ گئے مسافر جوش ءچ ہن، تاڑیں دا شور ھا، ھر پاسے ھکو گال ھئ ہݨ تاں ٻیڑی نکھتی ضرور نکھتی، ڈانگ آلا مسافریں کوں ڈیکھ کے کھل پئے، انھیں کملیں کوں کیا پتہ آڈر تاں پہلے آلا ھے ٻیڑی کوں کڈھݨاں نیں صرف ہلاوݨے،،، جمیل بلوچ.