ٻُڈھڑی مئی دا پھُلّا
ہک ہئی ٻڈھڑی مئی۔ اوپھُلّے بھُنوائی وین٘دی ہئی۔ تھیݙا جولڳیئس تاں پھُلّے وِٹیج پَئے۔ ٻُڈھڑی مونجھی تھی،آپݨے پھُلّے'چنن' ٻہ ڳئی۔ نال دے وَݨ تے ٻیٹھے ہک کاں وِٹیے ہوئے پھُلّے ݙِٹّھے تاں آکے ٻُڈھڑی کولو پچھّیئُس:
"ماسی ری ماسی!میں تیکوں پھُلّے چُݨ ݙیواں"
مئی آکھیا: "ماسی دا کم کراچا،اللہ سوہݨاں تیکوں بھاڳ لیسی تے ساوا سوکھا کریسی"
کاں پھُلّے چُݨ چُݨ ماسی ٻُڈھڑی کوں ݙین٘دا ریہا۔ اَخیر اِچ ہِک وَݙا پھُلّا چاکے وݨ دی اُچّی ٹِنگریں تے وݨِ ٻیٹھا۔ مئی ٻُڈھڑی کوں اپݨے پھُلّے دا داݙا اَرمان لڳا۔ اُونیں کاں کنوں اپݨا پھُلّا مَنگیا پر کاں نے کن ای ناں ݙِتّا۔ ٻُڈھڑی رون٘دی رَڑدی رہئی اَتے کاں مون٘ہ تے مَلّی ٻیٹھا ریہا۔ ٻُ٘ڈھڑی کاوڑ کنوں لال پِیلی تھین٘دی وݨ کول پُڄّی اَتے وھان٘ہ ݙین٘دے ہوئیں آکھیسُ:
"بِھراوݨ آیا!آہݨیاں ٹِنگڑیاں بَلا بَلا کے اِیں بھیڑے کاں کوں اُݙا ݙے جِہڑا میݙا پُھلّا نِھیں ݙین٘دا۔"
وݨ ٻُڈھڑی دے پَھٹ تے لوݨ بُرکین٘دا ہوئیاں ولدا ݙِتّا"اِیں کاں میݙا کیا وَنّڄائے جو میں اِیکوں اُݙا ݙیواں؟"
ٻڈھڑی کُوں ݙا ڈھاوَت چُڑھیا۔ آکھیٔسُ:"ذرا کھڑ سہی۔ میں تیڈی خبر کڈھینی آں۔
او بھج کے کے درکھان کُول ڳئی اَتے آکھیٔسُ:"اِیں درخت کُوں کَپ سَٹ جِہڑا کاں کوں نئیں اُݙین٘دا۔"
درکھاݨ ٻولیا"میݙا کیا مطلب؟میں اِیکوں کیوں کَپّاں؟اِینیں میکوں کیا ݙُکھ ݙِتّے؟"
ہݨ تاں مئی ٻُڈھڑی اے سِتر گِھدّا جے تئیں اِنہاں کوں سِدّھاناں کر گِھنساں گھر نا ویساں۔ درکھاݨ کوں مَت ݙیوݨ کیتے ٻُڈھڑی لوہار کول ڳئی تے آکھیٔس:
"تُوں اِیں درکھاݨ کوں لوہے دے سَندھرناں بݨاڈے"
لوہار آکھیا:"میں کیوں نہ بݨا ݙیواں اِینیں میݙا کیا وَن٘ڄائے؟"
ٻُݙھڑی کٹوال کول ڳئے تے آکھیٔس:"تُوں اِیں لوہار کوں ٻَدھ گِھن جِہڑا میݙا آکھیا نھیں منین٘دا۔"
کٹوال آلھیا میں کیوں ٻَدھّاں؟"
ٻُدھڑی بادشاہ کول ڳئی تے آکھیٔس: تُوں اِیں کٹوال کوں اَپݨے مُلخ اِچوں کَڈھ ݙے"
بادشاہ آکھیا:"اِینیں میݙا کیا وڳاڑے جو میں اِیکوں کَڈھ ݙیواں؟"
ٻُڈھڑی راݨی کول ڳئی تے آکھیٔس:تُوں بادشاہ نال رُس پو۔اے میں رے سینکی ٻُڈھڑی دا آکھیا نِھیں منین٘دا"
راݨی آکھیا میں کیوں رُس پوواں؟"
راݨی نے تریمت تھ کے تریمت دا ماݨ ناں رکھیا تاں ٻُڈھڑی دا ڈھی مونجھی تھی ڳئی۔ او مونجھی تے کماݨی تھی سوچیں پئے ڳئی جو ہُݨ کیا کراں؟ اُونیں سوچ گِھدّا جو اپݨا حق نانہں چھوڑناں۔
۔
۔
۔
۔