ٹی وی دے افطاری پروگرام
روزہ کھولنڑ کنیں تھوڑا پہلے ٹی وی تیں نظر ماری تاں افطار پروگرام ءچ میڈے ملک دے ہر مسلک دے علماء کرام نعت خوان عشق رسول ءچ سرشار ہن، ٹی وی پروگرام دا جیرھا میزبان ھوندے اوندی کرسی ادھ ءچ ھوندی ھے تیں زرا وکھری یعنی معزز قسم دی ھوندی ھے مہمانیں واسطے زرا کمتر قسم دے صوفے یا کرسیاں وغیرہ ھوندن، معزز قسم دی کرسی تیں پاکستان دے نامور اداکار تیں اداکارہ تشریف فرما ہوندن عام کرسیں تیں علماء تیں نعت خوان لاتھے ہوندن، عجیب منافقت ھے ایھے مولوی مسجد ءچ بیھ کے ہک ڈُوجھے کوں کافر مشرک گستاخ سڈیندن، مگر کیمرے دے سامنڑے ساکوں اتحاد و اتفاق دا درس اینجھا ڈیندن کہ بندہ سُنڑ کے مسلمان تھی ونجے، مسجد ءچ بیھ کے ساکوں عورتیں دے پردے بارے اینجھاں گالھیں سُنڑیسن کہ اساں گھر ونجنڑ کنیں پہلے شھر ءچو ٹوپی آلا برقعہ گول کے ویندے ہیں حالانکہ ساکوں اے وی پتہ ھوندے ساڈی حور بےمثل چڑیل کوں کوئ چنگی اکھ نال نیں ڈیھدا گندی اکھ تاں دور دی گال ھے، خیر مولوی صاب دا حکم ھے پردہ ضروری ھے، پَر ایھے مولوی ٹی وی تیں بیھ کے شکل حور عورتیں نال ایویں کھل کھل کے گال کریندے بیٹھے ھوندن جیویں اے ساریاں انھیں دیاں بھنڑیجاں ھوون.
نعت خوانیں دے لباس تیں جڈاں نظر ویندی ھے یقین منو میکوں اُو پتلیاں پتلیاں تریمتیں یاد آویندن جیرھاں فیشن شو تیں مٹک مٹک کے ٹردئن، پھل بوٹے گوٹے کنارے آلا لباس پاء کے نعت رسول عشق رسول دا حق ادا پیاء تھیندے، پتہ نیں اینجھے مولوی تیں نعت خوان اے ٹی وی آلے گول کتھو آندن جنھیں دا دین ساڈے دین کنیں جُدا ھے، ساکوں تاں دین آھدے تساں اکھ دا وی روزہ رکھنڑے کتھائیں غیر محرم تیں نہ ونج پووے، ٹی وی آلے ملاں تاں انھیں کوں گوڈے نال بلہا کے روزہ کھولندن، میں گالھے کوں تاں ایھا سمجھ لگی ھے کہ اے ساڈا ایمان تازہ نیں بلکہ ساڈے ایمان تیں ڈاکہ مریندے پئین اے ٹی وی آلے ملاں جیرھے سحری افطاری پروگرامیں ءچ آندن اے شودے سستی شہرت تیں پیسے دی لالچی ہن، عام لوظیں ءچ آکھاں تاں منافق ہن، ہُنڑ بھانویں میڈے اتیں فتوی لاؤ یا سوچو،،،،