ٹوٹکہ
ٹوٹکہ، چٹکلہ، ٹپہ
ٹوٹکے دا لفظی معنی ہے"چھوٹا جیہاں ٹکڑا" ایں معنی دی روایت نال ایہ اکثر ݙو ترائے لفظاں دا مجموعہ ہوندے اتے ایندے فعل محذوف کر ݙتا وین٘دے۔ ایندا رن٘گ مذاقیہ ہووے یا کہیں کوں مسخری کرتے چڑھاوݨ دی نیت نال آکھیا ونڄے تاں ایں کوں چُٹکلہ آکھسوں۔
ٹپہ: کہیں بیت یا کافی دا حصہ ہووے یا ایندی تُک بندی ہم قافیہ الفاظ نال تھئی ہوئی ہووے تاں ایہ ٹپہ ہے۔ اڳلے ویلے دے لوکاں کوں موقع محل دے مطابق ورتݨ کیتے کئی کئی ٹپے یاد ہوندے ہن۔ ادھ پچدھے مہمل لفظاں دے او مجموعے وی پٹے دی قسم ہن، جہڑے نین٘گر تے نین٘گریں آپݨیاں کھیݙاں دے دوران ٻولین٘دن۔
- ݙو پتر اناراں دے، ساݙا ݙُکھ سُݨ سُݨ کے رون٘دے پتھر پہاڑاں دے
- ٹپی سرائیکی تے پشتو زبان دی کوئی ݙڈھ ہزار سال پراݨی صنف ہے ۔ پشتو دانشوراں دا خیال ایہ ہے جوایہ پشتو شاعری دی سبھ کنوں پہلی صنف ہے۔ ایہ پٹے سرائیکی وچ زیادہ تر دیرہ غازی خاں تے دیرہ اسمعیل خان دے علاقیاں وچ ڳئے وین٘دے ہن۔ انھاں ٹپیاں وچ محبت، نفرت، میل محبت، دھرتی دی محبت، بہادری، تاریخی واقعات ہرقسم دے مضمون ٻدھے وین٘دن۔