واہ گودے آ تیݙیاں آوݨیاں

جیرھے بندے کوں گولنڑ ویندے ھاسے اُو بندا کڈھائیں اسلام آباد تے کڈاھیں لاھور ءچ ھوندا ھا اج اُو ہر وستی ہر محلے ءچ ایویں پھردا ودے جیویں بارش دے بعد ٹنڈڑیاں پھردئن، وڈیں وڈیں گڈیں تے بیھ کے عام بندیں کوں کیڑے مکوڑے سمجھنڑ آلے گردن ءچ سریے پاء کے ٹُرنڑ آلے اج ساڈیں انھیں بالیں کوں وی چمدن جنھیں کوں غسل صرف پیدائش دے وقت ڈتا ہاسے، اج ہر گودے کوں ساڈے ڈاڈے بابے نال گزریے ویلھے ایویں یاد ہن جیویں اے بدھڑیں دے یار رہ ھوون، جتناں وڈا سیاسی ھوسی اُتناں بے شرم ھوسی جنھیں محلیں تے وستی ءچ ووٹ منگنڑ ویندے انھیں وستیں تیں گلیں کوں ڈیکھ کے شرم نسی آندا جو کیرھے بُتھاڑ نال ووٹ منگاں، اگو اُوندے نعرے مارنڑ آلے بے شرم جنھیں کوں اجاں تئیں پانڑی سولنگ، تک میسر نئیں تھئی اُو وی بیغرتی دی حد کراس کر کے اوں گودے دی چمچہ گیری کرنڑ باعث فخر سمجھدن، بندا پُچھے جیرھے لیڈر اجاں تک ایں گال تے ووٹ گھدے کہ بجلی پانڑی سکول ڈیساں جیرھے ستر سال کنیں منگدے ودے ھئیں اُو ایں دفعہ بنڑ کے ساکوں کیا ڈیسی اوھا زلالت اوھا رسوائ آپڑاں مقدر بنڑیندے پئے ہیں، میکوں اے سمجھ نیں آندی اے الیکشن جیت کے کتھاں دفعہ تھی ویندن انھیں کوں آپڑیں حلقے ءچ آندیں موت پُوندی ھے نزلہ لگدے زکام تھیندے یا کوئ انھیں کوں ڈھکی پیاء راھندے صرف الیکشن دے موقعے چھوڑیندے کہ ونجو آپڑیں حلقے آلیں کو پٹو.

اساں وی اینجھے عزت دار ھئیں ساڈی عزت، اڈھائیں ودھدی ھے جڈاں کوئ گودا ساڈی جاہ تے آندے پچھیں ساڈیاں ٹُوراں ڈیٹھیاں کرو ایویں، اکڑیندے ھئیں جیویں گودے ساکوں پُھل سگا ڈے کے خلافت ڈتی ھووے، وائے اندھی دے جیرھے ستر سال کنیں ڈگیندے آندن نانگ دے پُتر او ہُنڑ وی کچھ ءچ کاتیاں چائی ودن بس ساڈیں اکھیں ءچ جو موتیا آیا کھڑے، گودے دی گڈی دے اگو پچھو دُرکنڑ آلے تھاکوں ڈیکھ کے کتے وی شکوہ کریندے ھوسن اے کینجھے اشرف المخلوقات ہن اے تاں، ایویں درکدن جیویں ھڈی دے پچھو کتے درکدن، ہُنڑ سوال کرو ہُنڑ جواب منگو، اے کوئ رازق نیں جو رزق بند کر ڈیسن اے ساڈی وجہ توں ہن اساں، انھیں دی وجہ توں نیں، انھیں دیاں صرف گڈیاں وڈیاں ہن دل چیڑی جیڈے ہن کڈھائیں الیکشن دے موقعہ تے انھیں کوں بھڑدا ڈیٹھے وے کائینا اے تھاکوں ساکوں استعمال کرکے آپڑاں مفاد گولیندن ایں دفعہ ، اگر کتھائیں اللہ نہ کرے شرارت تھیوے انھیں کوں اگو کرائے میں ڈیھداں کیرھا تکڑا جوان ھے، وائے اے ساڈے سر تیں شیر ہن نتاں گیدڑ وی نیں.