نورالہدیٰ شاہ

ݙرامہ نگاری اچ میں نورالہدیٰ شاہ کوں اپنٹراں اُستاد منیداں۔ادَی نال زہنی ، روحانی جُٹرت دی وجہ ہک اے وی ہے جو انہاں دااپنٹری ماء بولی اپنٹریں کلچر نال مضبوط رشتہ اے تےاو ہک قوم پرست ہن۔انہاں سندھی قوم پرست دی تحریک کنوں متاثر تھی کراہیں سندھی دے بے مثال افسانے لکھے اتے عملی طور تے تریمت دے آدر مان کیتے صدیاں کنوں مرداں دے ظالم سماج اچ بے معنی رسماں اچ کُہیندی،مرَیندی ستَی تھیندی عورت کیتے جی جی زرینہ بلوچ نال مل تے باݨ مریندے ریہے۔اپنٹریاں لکھتاں اچ سوجھلا ونڈا ۔وݙیرہ شاہی دے خلاف مقبول و معروف ݙرامے لکھے۔اج وی اساکوں جنگل دیواریں'ماروی جہیں یادگار ݙرامے یاد ہِن۔اے سندھ دی واحد دہےی ہائی جہیں بظاہر عقیدت و احترام تے آدر آلے مُشک و عنبردی فضا اچ مہکیاں حویلیاں دیاں ݙہݙیاں اندر عورت زات نال تھیوݨوالےغیر انسانی رویّے نُشابر کیتے۔وݙیریاں دیاں اُچیاں ماڑیاں دے بوہاں اُتے ݙٹھے ازلاں توں زلت رسوائی تے نا ناصافی دا شکار تھیندے نسلاں توڑیں سود تے قرضے اچ بدھیجے حاریاں دیاں بے وسَیاں تے ہنجواں کوں زُبان ݙتی۔تے ایندے بدلے کیا تھیا جو ادَی نورالہدٰی دی مخالفت شروع تھی گئی۔ہک واری کراچی جم خانے دی ہک کچاری اچ سندھ دے سابق وزیر اعلیٰ عبداللہ شاہ دی گھر والی کھڑی تھی گئی جو اے ݙیکھو اے سندھ دی تریمت تھی تے سید زادی تھی تے سندھیاں کوں جگ جہان اچ بدنام کریندی ودَی اے۔ بہوں گھٹ لوکاں کوں ایں گالھ دا علم ہوسی جو ادَی دا اپنٹراں تعلق سندھ دے جاگیردار وݙیرے خاندان نال اے۔پرانہاں خُد عَلم چا کراہیں اوں سماج نال بغاوت کیتی۔اے وی سچ اے جو انہاں کوں اپنٹری سندھی آیئݙینٹیفکشن تے ہوں ماݨ اے۔انہاں اوں سماج دے سُہݨپ کوں اُون کیتے تے اوندے کُجہپ دی عکاسی کیتی اے۔

گالھ زرا پچھوں ݙوں توڑی ونجے تاں اج پاکستانی میݙیا وچ جتنے وی تجربہ کار ݙایڑیکٹرز پروݙیوسرز،ایݙیٹرز تے پروݙکشن ٹیم سمیت پلے رائٹ ،اسکرین رایٹرز،تے اسکرپٹ رایٹرز کم پئے کریندن انہاں سبھ دا مَدر انسٹیوٹ انڈس ویژن ٹیلی ویژن نیٹ ورک تے گوݙ فارد غضنفر علی بخاری اے جہیں اساݙی گرومنگ کیتی ہائی تے میݙیا اچ نویں چلینجزدا مقابلہ کرن تے اپنٹریں مشاہدے اپنٹریں بھیتر لُکے آرٹ کوں اپَلائی کرن دی سیکھ تے اعتماد وی ݙتا۔انڈس ٹی وی دا منڈھ نَوے دےݙہاکےدے چھیکٹری ݙینہاں بدھیجا۔اوں کنوں پہلے کمبائن پروݙکشن دے ناں کنوں بخاری سیئں تے میر شکیل الرحمان دی آپسی شراکت اچ ہک کامیاب پروݙکش ہاوس چلدا پیا ہا۔اے او دور ہا جݙاں ݙرامے دی لِکھت سمیت اوندی پری پروݙکشن تے پوسٹ پروݙکشن دے نال نال کیمرہ لائٹس دی تکنیک توڑیں سبھ کجھ بدلدا پیا ہائی ساری فلاسفی نویں دھارے اچ وٹیج گئی ہائی۔حسینہ معین تے فاطمہ ثریا بجیا نال کم کرن دا موقع ملدا پیا ہا۔اساں انہاں دے تجربے توں سکھدے وی پئے ہاسے پر انہاں دی آیئݙیالوجی تے نویں تکنیک دے آدھ اچ بہوں وݙی خلیج ہائی۔ایندا احساس غضنفر بخاری سیئں کوں وی ہا۔ مثلا ݙرامے دی نویں تیکنیک موجب افسانہ نگاری اتے ناول نگاری دی کوالیفیکشن نال ݙرامہ نگاری ناکافی اے۔افسانے دا ہک مختلف کرافٹ اے۔ایویں ناول دی لکھت اچ اوندی اپنٹری ٹائمنگ اپنٹری تکینیک کردارنگاری ݙیوریشن ، کلائمکس ، بینگ تے پیس کھڑے بَھل ݙرامے دی اپنٹری لوڑاں ہِن۔جیندے اچ تھاٹ آندے نال نال کردار نگاری توں گھن کرایئں اسٹوری بورݙنگ،اسکرین رائٹرنگ،اسکرین پَلے،اسکرپٹ رائٹنگ تے وت ݙائلاگ لکھیے ویندن۔ ہن ݙرامہ خالصتا ٹیکنکل تصّور کیتا ویندے ۔ پہلوں ݙرامہ نگاری ون مین شو ہوندا ہا۔ہکو لکھاری اسکرپٹ وی لکھدا ہا۔ݙایئلاگ وی۔پر اوں زمانے اسٹوری بوڑݙنگ ناں تھیندی ہائی۔اسکرین پلے ناں لکھیا ویندا ہا۔اج وَن لائن سائنوپسسز توں گھن کرایئں ݙائلاگ توڑیں ݙو ݙو ترائے تجربہ کار ݙائلاگ لکھاری،تے اسکرین پلَے لکھاری اپنٹریں فن دا مظاہرہ کریندن۔ اجوکے ݙرامے وچ سیناریو دے موجب کردار دی باݙی لنگوئج سمیت اوندی موومنٹ تے توجہ ݙتی ویندی اے۔اوندے حرکات و سکنات اوندے باݙی ایکپریسن کوں اہمیت ݙتی ویندی اے۔ݙائلاگ باد اچ آندن پہلے اوندا بزنس کریئٹ کیتا ویندےپراپس دی وݙی ویلئو ہوندی اے۔ تے ویجوئل کوں مضبوط بݨاوݨ دا آہر کیتا ویندے۔خیر۔جیویں میں عرض کیتم جو ݙرامے دا اپنٹرا پیرا میٹر اے تے افسانے تے ناول نگاری دیا اپنٹریاں نویکلیاں وکھریاں لوڑاں ہن۔اتھاں اے گالھ آکھنٹری ضروری اے جو پی ٹی وی کیتے منڈھ لا توں لکھنٹر والے سارے ݙرامہ نگار افسانہ لکھدے ہوئے ناول لکھدے ہوئے آئن ہَن۔انہاں اچوں کہیں نیں وی پہلوں ݙراما ناں لکھیا ہا۔ایہا وجہ ہائی جو پہلے ݙینھاں دے ہر ݙرامے وچ ہک ہک کردار کہانٹری ادا گھٹ کریندا ہا بھل کہانٹری کریندا زیادہ ہا۔ لمبے لمبے درگھے ہوئے ݙیئلاگز اچ ای کہانٹری اگَی تے ٹُردی ہائی۔موشن بہوں تھوڑا ہا۔ اُتوں انفارمیٹو اطلاعیہ انداز دی بھرمار ہائی۔اتھاں توڑیں ہائی جو جیکر ہک کردار منظر اچ داخل تھئے تاں او اپنٹریں ہوون دا احساس ناں ݙیویسی بھل اظہارکریویسی۔مثلا ݙاکٹر کامران اپنٹری ماء دے کمرے وڑے تاں اتھاں ݙیکھݨ آلی اَکھ کیمرے دے توسط نال سبھ کوں پتہ لگ گئے،تے اوندے پیراں دے کھڑکار نال ماء کوں وی اندازہ تھی ونجنٹراں چاہیدے پرسین اچ کجھ ایں طرانح دے ݙائلاگ ہوندے ہَن۔

ݙاکٹر کامران اسلام وعلیکم امی۔۔۔۔میں آگیاں

پچھاں مُڑ تے اپنٹریں پتر ول ݙہدی ہوئیماء کامراں۔۔۔۔توں آگیئں پُتر

حیرت نال کامران دے متھے کوں ݙہدے ہوئےماء اے کیا اے پُتر؟

اپنٹریں متھے دی چوٹ تے ہَتھ لیندے ہوئےکامران اوہ ۔۔ تُساں ایندی گالھ کریندے پئے او؟ اے سٹ لگی اے۔ بس زرا ݙہے پیاہم۔

ہک بیا منظر

خالہ زکیہ صحن اچ آتے کلھی کھڑی اے تے عید دا چندر پئی ݙہدی اے تے نال نال مونولاگ پئی کریندے اے۔

خالہ زکیہ ارے یہ تو عید کا چاند ہے ؟ ارے واہ اس کا مطلب ہے کہ عید کل ہے۔

اچانک ان دی دھی آندی اے۔

دھی امی جان چاند نظر آیا۔۔

خالہ زکیہ ارے ہاں ہاں وہ دیکھو سامنے

دھی ارے امی یہ تو چاند ہے ناں پہلی کا۔شوال کا۔ارے واہ امی مبارک ہو ۔

مثلا اے افسانے دی لکھت دی تکینک تھی سکدی اے ریݙیائی ݙرامے د تھی سکدی اے پر ویجوئل دی نیئں۔اشفاق احمد،ݙاکٹر انور سجاد،یونس جاوید،آپا ثریا بجیا،امجد اسلام امجد اے سبھ ریݙیو توں پی ٹی وی اچ آئن ہَن۔ایہا وجہ ہائی جو اوں زمانے دے ݙرامے کہانٹری دے اعتبار نال۔کردار نگاری دے حوالے نال بہوں جاندار تاں ہوندے ہَن پر انہاں دا ویجوئل کمزور ہا۔ایکشن بہوں سُست ہا باقاعدہ طور تیں شورٹس ݙویژننگ ناں تھیندی ہائی۔ اسکرین پَلے موشن ناں لکھیا ویندا ہا پر کہانٹری لکھی ویندی ہائی۔لہور ٹی وی اسٹیشن دے مہاندرے ہدایت کار محمد عظیم انڈس ویژن اچ اساݙے سنیئر دے طور تے اساکوں جوائن کیتا تاں ݙسیندے ہَن جو ہک واری اشفاق احمد یا بانو قدسیہ معراج محمد خان ، یا کہیں بئے وݙے لکھاری دا اسکرپٹ آ ویندا ہا تاں انہاں دی جرات ناں ہوندی ہائی جو کُئی ردوبدل کر سگن یا مجال اے کئی سین اگوں پچھوں تھی ونجے۔تاں انہاں ݙرامیاں اچ پروݙکشن انوالو ناں ہوندی ہائی بس جیویں انہاں لکھ ݙتا انہاں ایویں لکیر دے فقیربݨ تے کر ݙتا۔بھل سَٹھے جہان اچ ایویں نیئں ہوندا۔

شروع شروع دے ݙینحہاں آپا فاطمہ ثریا بجیا تے آپا حسینہ معین نال وی کم کرَن دی سبیل تھئی۔ایندے اچ کُئی شک نیئں جو اے مہاندرے کہانٹری کار ہَن پر نویں زمانے دیاں جدید تکنیکاں کوں انہاں قبول کرن دے بجائے اسُلک رَد کر ݙتا۔ݙوجھے لوظیں اچ انہاں نویں اثرات کوں اپناوݨ پسند نیئں کیتا۔آپا حسینہ معین آہدے ہَن جو انہاں دا ݙرامہ ای اصل ݙرامہ اے۔ انہاں ٹرینڈ سیٹ کیتا۔جہٹرے کردار انہاں متعارف کرائن انہاں توں باد او جہیں یادگار کردارولا تخلیق نہیں تھی سگدے۔ایندے اچ کجھ شک نہیں۔جو اجوکے ݙرامے کردار نگاری والے پاسے اوہو جہیں مضبوط کایئنی۔پرزیادہ تر اے تاثر ٹھیک نہیں۔البتہ ہنٹر مقابلہ زرا زیادہ شروع تھی گئے۔ پہلے سال اچ ترائے ݙرامے یا ݙوں ݙرامے ٹی وی تے چلدے ہَن ہݨ کئی کئی ݙرامے آن ایر ہوندن،پر میݙا خیال اے جو کردار الگ کئی شئے نیئں ہوندے او ہک کہانٹری دا تسلسل ہوندن اوندا انگ ہوندن۔آسکر وائلݙ نیں آکھیا ہائی ناں کہانی کردار توں نہیں بھل کردار کہانٹری توں ہوندن

آپا فاطمہ ثریا آہدے ہَن جو گل زیب بیٹے صرف لکھنا جانتے ہو کاغظ پھاڑنا نہیں جانتے۔جتنے کاغظ پھاڑو گے اُتنے اچھے لکھو گے

حقیقت اے جو اپنے اپنٹریں ݙراما نگاری دے کریئر اچ آپا فاطمہ ثریا جہں ہر وݙے مہاندرے کنوں بہوں کجھ سیکھ گھدی اے مگر میں اَدی نورالہدٰی شاہ کوں اپنٹراں اُستاد منیداں۔

اے ݙوں ہزار چار دی گالھ اے میں مشہور اداکارہ زیبا بختیار نال ݙرامے دا ہک پروجیکٹ کرینداں پیاں ہم۔انہاں فلماں بنٹراون چھوڑ کراہیں کراچی اچ ساگر اݨٹینمنٹ دے ناں کنوں ہک ادارہ بنٹرایا۔تاں انہاں کیتے ݙرامہ سریئل عشق دے ناں کنوں ویہی قسطاں دا ہک میگا پروجیکٹ لِکھ تے ݙتم۔باد اچ زیبا نے ݙسیا جو ہم ٹیلی ویژن نیٹ ورک اساݙا اے پروجیکٹ خریدن کیتے تیار اے۔اے او ٹی وی چینل اے جتھاں میکوں باد اچ ادَی نور الہدٰی شاہ نال کم کرن دا موقع ملیا۔تے ایں ادارے اچ رہ کراہیں میں اپنٹریں کریئر دے بہوں وݙے ݙرامے لکِھے۔جیندے اچ جھمکا جان ریشم سی شام سرِفہرست ہن۔

زیبا بختیار دی پروݙکشن اچ میݙا لکھیا ہویا ݙرامہ عشق ہم ٹی وی تے چلیا تے بہوں مقبول تھیا۔اوں زمانے خان پور کٹورہ توں اساݙے سنگتی سردار نور خان رند کراچی آئے تاں میکوں آکھیا جو یار حیدرآباد اچ انہاں دا ہک سنگتی اے سلیم خان دیس والی۔ٹی وی کراچی دا مقبول اداکار رہ گئے تے اجکل ݙرامے دی پروݙکشن کریندا ودَے۔اوندے کول جُلدے ہیں ہک رات راہسوں ݙوجھے جہاڑے ول آسوں تے او بہوں دلچسپ بندا اے یاراں دا یار اے۔توں مل تے خش تھیسیں۔خیر چلے گیوسے۔سلیم خاں نال ملاقات تھئی۔میں نور خاں کوں آکھیا جو میݙا ناں نا ݙسائے جو میݙا تعلق ݙرامے نال اے۔او سمجھسی جو نور خان اپنٹریں ہک بندے کوں کم سانگے گھن آئے۔کافی دیر تھی گئی روٹی ٹُکر کھا گھدا تے سلیم خان دیس والی مُد ݙھیر اپنٹریں ݙرامیاں دی گالھ بات کرینداں رہ گیا۔تے نور خان کوں راضی کریندا پیا ہا جو او اے ݙرامہ پروݙیوس کرے پیسے لاوے۔وݙا منافع تھیسی۔اچاچیت آکھݨ لگا جو ہم ݙرامہ بھی کسی بڑے رایئڑ سے لکھوایئں گے۔نورالہدیٰ شاہ کوں منتاں کرینداں وداں ہا او ٹائم نہیں ݙیندی ہائی آکھوس جو۔کل او اتھاں حیدرآباد اپنٹریں گھر ولی اے تاں میں ملݨ گیاں ہم ۔آکھدی ہائی جو سلیم خان ہک نیگر لکھاری اے ۔ اوندا ݙرامہ وی اجکل ہم ٹی وی تے اوَن ایر اے۔کیا کمال دا ݙراما رایئٹر اے۔نویں رایٹرز اچوں اونکوں چھڑا اوں گل زیب خاکوانی نیں ای متاثر کیتے۔بہاولپور دا اے۔میں تیݙی اوندے نال ملاقات کرویساں۔اچاچیت نور خان نیں مُسک تے میݙے ول ݙٹھا۔سلیم خاں نور الہدٰی شاہ دی اے گالھ سنٹرا تے نور خان کوں مِنت نال آکھݨ لگا۔یار نور خاں اُس رائٹر کو ݙھونڈو۔ ہے بھی تمہارے علاقے کا۔نور خان کہےل کہےل تے موندھا تھیا پیا ہا۔میں وی پھکا تھیا بیٹھا ہم۔انت نور خان کھل روکنٹر دی کوشش کریندے ہوئے میݙے نال مخاطب تھیا خاکوانی صیب وت کیا خیال اے۔لکھ ݙیومیݙے یار کوں وی ہک ݙرامہ ایں ویلھے سلیم خاں کہیں ویلھے پہےکی پہےکی کہےل نال میکوں مُڑ تے ݙیکھے تے کہیں ویلھے نور خان کوں۔

نورالہدیٰ شاہ ہُݨ وی ݙرامے لکھدے پیئن اتے وݙے کامیاب ݙرامے لکھدے پین جو انہاں نویں موسماں نال خُد کوں ݙھال گھدا۔ نویں فنی تقاضیاں کوں قبول کیتا بلکہ سِکھݨ دے عمل کوں جاری رکھݨ تے یقین کیتا۔اتے نال نال کیمرہ لایٹس تے پوسٹ پروݙکشن دیاں ٹیکنیکل چیزاں کوں براہ راست سکِھݨ دی کوشش کیتی۔ ٹیکنکل ٹیم دے نیگریں کنوں بہوں دلچسپی نال نویں زاویے تے نویں ایکسپیکٹ بارے معلومات گھݨ توں زری ناں گھبرائے یا کُئی جھیجھک کیتی جو اگلا آکھسی جو نورالہدٰی شاہ سواں ہک وݙا آئی کان،وݙا مہاندرا اساݙے کنوں پچھدا پئے۔ انہاں ہمشاں نویں اثرات قبول کیتے بھل روایت دے تجربے کوں جدیدیت اچ اپلائی وی کیتا۔اتھاں ہک گالھ ضرور کرنا چاہساں جو ہک ݙرامہ لکھاری کیتے پروݙکشن دی ہر تیکنک کنوں سنجان رکھنن بہوں ضروری اے۔

میکوں سب توں پہلے انہاں آکھیا جو میں کمپیوٹر تے اسکرپٹ لکھا کراں۔میکوں ولا ولا ایݙٹ کرن دا موقع وی ملسی تے میں اندھے واہ لکھݨ کنوں بچ ویساں۔ہک گالھ میں ضرور آکھساں جو ݙرامے دی فیلݙ اچ اسکرپٹ ریکارݙنگ توں گھن تے ایݙیٹنگ تیئں کُئی حرفِ آخر نہیں ہوندا راہندا۔اوندے اچ بے انت تبدیلیاں وٹارے کیتے ویندن۔جو ݙرامے زیادہ توں زیادہ بہتر تھی سگے۔اے کُئی افسانہ یا ناول تاں ہے کویناں جو ہک ہک اصطلاح ہک ہک لاین پتھر تے لیکر ہووے۔

ہم ٹیلی ویژن دے اسکرپٹ ݙیپارمنٹ اچ میکوں بحثیت پروݙیوسر اسکرپٹس گھن تے آون والے ادَی نور ای ہَن۔انہاں سبھ توں پہلوں ہم ٹیلی ویژن دی ایم۔ݙی مہان ݙایڑیکٹر پروݙیوسر سلطانہ صدیقی نال ملوایا۔ میݙا تعارف کرایا۔

ݙرامہ سریئل عشق دے باد میں سرایئکی دھرتی نال جُڑی ہک کہانٹری تے کم پیا کریندا ہم۔ اے میݙی لایف ٹائم دا بہوں وݙا تے نویکلا پروجیکٹ ہا۔۔ جھمکا جان دے ناں کنوں۔میں ایندا پہلے زکر کر آیاں۔میں ݙاہ قسطاں لکھ چکاں ہم تے نورالہدٰی شاہ کوں پڑھن کیتے ݙے آیا۔اسکرپٹ پڑھ تے انہاں آکھیا جو اسکرپٹ تے کہانٹری بہوں جاندار اے ایکوں اساݙے کیتے مکمل کر۔ میݙا ہم ٹیلی ویژن نال معاہدہ تھی گیا تے میکوں انہاں ایݙوانس چیک وی ایشو کرݙتا۔ٹھیک انہاں جہاڑے جݙاں میں جھمکا جان مکمل کرینداں پیاں ہم تے فون آیا۔

گل زیب اسکرپٹ کہاں تک پہنچا میں ݙسیا اتے باد اچ آکھݨ لگےاچھا میں ایک مہینے کے لیے دبئی جا رہی ہوں ۔ میں چاہتی ہوں کہ تم ہم ٹیلی ویژن کے اسکرپٹ ݙیپارٹمنٹ کو عارضی طور پر ہیݙ کرو اورمیری غیر موجودگی میں جو رایٹرز اور پروݙیوسر ہمارے لیے پروجیکٹ کر رہے ہیں ان کو بھی ݙیل کرو۔اور اپنا پروجیکٹ بھی لکھتے رہو۔

اے میݙے کیتے کہیں وݙے آدر کنوں گھٹ نہیں جو انہاں میکوں ایں قابل سمجھیا۔

ہم ٹی وی اچ میکوں انہاں نال ترائے سال کم کرن دا موقع ملیا باد اچ میݙے تے ہک بھوت سوار تھی گیا جو میں سرایئکی ٹیلی ویژن جواین کراں تے میکوں اپنَٹریاں صلاحتیاں سرایئکی کیتے استعمال اچ گھن آوݨیاں چاہیدن میں ایویں ای کیتا۔کراچی توں مݙی بسترا چا اسلام آباد آ گیا۔انہاں میکوں لکھ سمجھایا جوکامیابی دے ایں دروازے پُج تے مین اسٹریم چینل چھوڑ تے پچھوں تے ہٹݨ خد کشی دے مترادف اے۔۔اسلام آباد اچ انہاں دے فون وی آئے جو واپس آ جاو۔مگر میں ناں گیا۔

میں اپنٹریں آپ کوں کݙاہیں ہک چنگا پلے ڑایٹ نیئں کنسیݙر کیتا میکوں ہمیشاں میݙے ݙرامیاں نیں ادھورے پن دا احساس ݙیوائے۔جو میں اوہا کجھ نہیں لکھ سگیا جیویں میکوں لکھنٹراں چاہیدا ہا پر ایندے باوجود ادَی نور نیں اساݙی کنڈھ تھپی اے۔اساکوں اسپیس ݙتی اے مارجن ݙتے۔جا جا تے اساݙیاں تعاریفاں کیتیاں ان جو سلیم خاں سویں پروݙیوسر اساݙی گولھ اچ ودے ہن جو نور نیں اآکھے تاں غلط ناں آکھا ہوسی۔ہک واری میݙے ہک ݙرامے دے اسکرپٹ کیتے سلطانہ صدیقی نیں مہاندرے ہدایت کار جاوید فاضل کوں سݙوایا تاں انہاں میݙا اسکرپٹ پڑھا ، بہوں تعریف کیتی تے حامی بھری ۔باد انہاں کوں اسکرپٹ دے لکھاری بارے سُدھ لگی تاں صاف انکار کر ݙتا جو سی کلاس تے بی کلاس کیٹاگری دے نویں لکھاریاں دا اسکرپٹ کایںا قبول کریساں۔میکوں یاد اے جو ادَی نور کوں ایں گالھ تے کیویں غصہ آیا ہا جو اے کلاس بی کلاس سی کلاس دا ہک چنگے اسکرپٹ نال کیا تعلق۔اتے انہاں میݙی عزت کیتے جاوید فاضل جہیں بندے کوں کھریاں سُنٹراو ݙتیاں۔

اے گالھیں میݙی حیاتی دا اثاثہ ہِن ۔سچ آکھیا ویندے جو وݙا بندہ اپنٹریں عملاں د وݙائی نال ای وݙا بندہ ہوندے۔تے ضروری نیئں جو ہر وݙا فنکار وݙا انسان وی ہووے۔پر چھڑی ایہو گالھ کریساں ،ادَی جیوو ہزاراں سالھ تہاݙے تھورے کیویں لہسن۔

گل زیب خاکوانی

ساوتھ کیلی فورنیا