نواب سربلند خان
1793ء عیسوی اچ والئی کابل تیمور درانی فوت تھیا تاں اوندا چھوٹا فرزند زمان شاہ درانی تخت نشین تھیا جبکہ وݙے پتر شہزادہ ہمایوں نے بغاوت کیتی کیونکہ اوہ اپݨے آپ کوں کابل دا حقیقی حکمران سمجھدا ہئی۔ قسمت نے ھمایوں درانی دا ساتھ نہ ݙتا تے اونکوں کابل وچ شکست تھئی۔ شہزادہ ہمایوں اپݨے وطن وچ ہی بے یار و مددگار تھیا تے کوہ سلیمان عبور کرکے والئی سنگھڑ نواب مسو خان نتکاݨی دی پناہ وچ آݨ پہنچے۔ مسو خان نتکاݨی نے سانبھ دے اصولاں دی پاسداری کریندے ہوئے شہزادہ ہمایوں دی حفاظت کیتی تے اونکوں ڈیرہ فتح خان دے پتݨ توں دریائے سندھ پار کروا کے تھل دے علاقے اچ منتقل کروایا۔ شہزادہ ہمایوں دی تھل وچ موجودگی دی خبر جݙݨ اوں وقت دے منکیرہ دے گورنر محمد خان سدوزئی کوں ملی تاں اوں نے اپݨی افواج دے نال ہمایوں تے اوندے ساتھیاں دا لیہ توں پندرہاں میل مشرق وچ محاصرہ کیتا۔ ہمایوں تے اوندے ساتھیاں نے ہتھیار سٹݨ دی بجائے بہادری دے نال لڑݨا منتخب کیتا۔ دوران جنگ ہی شہزادہ ہمایوں دا فرزند تے ݙوجھے ساتھی قتل تھئے۔ تڑپدے نوجوان پتر کوں ہمایوں نے اپݨے ہتھاں تے چایا تے شفقت پدری دی اونہی حالت وچ شہزادہ ہمایوں کوں گرفتار کیتا ڳیا۔ نواب محمد خان سدوزئی نے والئی کابل توں وفاداری و اپݨے اقتدار دی طوالت دی خاطر شہزادہ ہمایوں تے ظلم و ستم کیتے۔ شہزادہ ہمایوں دے آکھیاں وچ گرم سلاخاں پھیر کے اونکوں قلعہ منکیرہ وچ قید کر گھدا ڳیا تے اے خبر والئی کابل زمان درانی تک پہنچائی ڳئی۔ والئی کابل نے منکیرہ دے گورنر کیتے معین الدولہ سر بلند خان بہادر فیروز جنگ دا لقب تجویز کیتا تے منکیرہ، بھکر و لیہ دا ایہ گورنر نواب سربلند خان دے ناں نال مشہور تھیا۔[١]
حوالے[لکھو | ماخذ وچ تبدیلی کرو]
- ↑ اقتباس۔۔۔۔ 1. تاریخ لیہ 2. تاریخ ریاست منکیرہ 3.Notes on Balochistan & Afghanistan by Roverty، تحریر سید جاوید حسین شاہ، سرائیکی ترجمہ، اسماعیل بھٹہ