نـوڑا وٹ

نوڑا وٹ اے کھیݙ سرائیکی خطے دی مشہور کھیݙ ھ. اے کھیݙ چھوٹے ٻاک، نینگر، چھوہر چھوہریں کھیݙدن ایں کھیݙ وچ وی پکھے یا پڳݨ توں بعد ہک بندے تے واری اندی ھ. ایں کھیݙ وچ ہر شیئے توں ودھ اہم نوڑا ہوندے، ایں کھیݙ وچ وی کھݙکاریں ڳݨتری دی پابندی کائنی. واری ݙیوݨ آلے کول نوڑا ہوندے جیہڑا کپڑے دا بݨیا ہویا ہوندے. باقی کھݙکار ہک دائرے دی شکل وچ سر سٹ تے ٻہہ ویندن.. واری ݙیوݨ آلا نوڑا چا انہاں ساریاں دے پچھوں گھمدے ودے تے اے نال نال آہدے جو نوڑا وٹ گݙھا دے پچھوں سٹ جمعرات آئے اے گھمدیں گھمدیں کہیں ہک کھݙکار دے پچھوں نوڑا رکھ چھوڑیندے جیندے پچھوں نوڑا رکھیندے اونکوں پتہ لڳ ونجے تاں او کھݙکار او نوڑا چا واری ݙیوݨ آلے دے پچھوں بھڄ پوندے تے مل ونڄݨ تے ݙو چار نوڑے اونکوں مار سڳدے تاں مار ݙیندے. یاد راہوے جو واری ݙیوݨ آلا جیوں گھمدا کھڑا ہوندے انویں گھم تے ولدی تے جیندے پچھوں نوڑا رکھیا ہوندے اوندی جاہ آݨ ملیندے. اے اوندی قسمت جو ایں دوران اونکوں نوڑے لڳدن یا کائناں. جیہڑا بندہ واری ݙیندا پیا ہوندے جے او ݙیہدے جو کئی ٻیٹھا ہویا کھݙکار کاݨی اکھ یا دادنی پچھوں ݙیہدا پے تاں او اونکوں ݙو چار نوڑے سیک ݙیندے. واری ݙیوݨ آلا جے کہیں ہک کھݙکار دے پچھوں نوڑا رکھیس تے پورا چکر لا تے ول اوں بندے دے سر تے آویندے جیندے پچھوں نوڑا رکھ تے ڳیا ھا تے اوں کھݙکار کوں پتہ نی لڳیا تاں ول واری ݙیوݨ آلے دے مزے ہوندن، کیوں جو او اوں کھݙکار کوں اوہو نوڑا چا تچھݨ پوندے جے تونڑیں او شودا پورا چکر لا واپس اپڑیں ڄاہ تے نہ ولے. اے وی یاد ہووے جو ایں کھیݙ وچ چکر پورا کرݨ ضروری ھ. ایں کھیݙ وچ اے وی اے کاری ہوندے جو واری ݙیوݨ آلے کہیں دے پچھوں لنگھ ڳے تاں او کھݙکار اپڑیں پچھوں ہتھ مار تے نوڑے کوں ٹٹول سڳدے پر پچھوں ݙیکھݨ وت وی کار کائنی تے واری ݙیوݨ آلا ہک ݙیڈھ فٹ توں زیادہ پرے نوڑا وی نی رکھ سڳدی ایندی اجازت نی ہوندی اے کاری کائنی ہوندا. ایں کھیݙ دا اے سلسلہ ایویں جاری راہندے.

اے کھیݙ وݙی مزیدار، چسولی تے صحت مند کھیݙ ہے. [[ونکی:سرائیکی کھیݙاں]]