ندیم سمیجو دی شاعری

او لوک ٻہوں عظیم ہوندن جیرھے اپݨی دھرتی، اپݨی مٹی تے اپݨے وسیب نال محبت کریندن، سئیں ندیم سمیجو دا شمار ایجھے لوکیں اِچ تھیندے ، انہائیں دی شخصیت دے مختلف حوالے ہِن، آپ اُستاد وی ہن ، شاعر وی ہن تے چنڳے سنگتی تے چنڳے انسان وی۔ سئیں ندیم سمیجو دی شاعری وچ کافی ، ݙوہڑہ، گیت، نظم ، حمد تے نعت دے سارے رنگ موجود اِن۔ پر میݙے سامݨے جیرھی کتاب اے او سرائیکی غزلیں دا مجموعہ ہے۔ سئیں ندیم سمیجو اپݨی ڳال مہاڑ وچ لکھدن جو میݙے روحانی استاد مولوی لطف علیؒ تے خواجہ فریدؒ  سئیں ہِن۔ ایں نال ندیم سمیجو دی شاعری دے وچ تصوف دا رنگ وی موجود اے، میں اے وی ݙٹھے کہ آپ دی شاعری وچ عشق مشک دی ڳالھ گھٹ تے وسیب دی ڳالھ زیادہ ہے۔ توݨیں جو غزل دا موضوع حسن تے عشق ہوندے ول وی سئیں ندیم سمیجو اپݨی غزل وچ وسیب دی ڳال کیتی اے ، وسیب دے ݙکھیں دی ڳالھ کیتی اے تے وسیب دے حق حقوق دی ڳالھ کیتی اے ایندے نال نال آپ دی شاعری اِچ مذاحمتی تے بیدار تھیوݨ دا سنیہا وی ہے ۔ اے ڳال او شاعر کریندے جینکوں اپݨے وسیب، اپݨی دھرتی، اپݨی مٹی نال محبت ہووے۔

سئیں ندیم سمیجو کوں اساں بحیثیت استاد ݙیکھدوں تاں اُتھاں وی انہائیں دا کردار قوم سازی آلا لڳدے، اُستاد کوں قوم دا معمار آکھیاویندے ، اساݙے کول قوم بݨاوݨ دے مختلف تجربے تھیندے رہ ڳن، قوم سازی دے ایں عمل اِچ قوم ٹوٹے تھی ڳئی تے بنگلہ دیش بݨ ڳیا۔ پر ندیم سیمجو او شاعر اِن جنہاں تجربیں دی بجائے حقیقت پسندی نال کم گھندے ہوئیں سرائیکی قوم آلے پاسے توجہ ݙتی تے اپݨے طالب علمیں کوں اپݨی دھرتی، اپݨی مٹی تے اپݨے وسیب نال محبت دا درس ݙتا۔ اساں ندیم سمیجو سئیں دی تعلیمی محنت کوں ݙیکھدوں تاں حیرانی تھیندی اے جو دسمبر 1972ء وچ ہِک سو پنجوی روپے ماہانہ تنخواہ تے اݨ ٹرینڈ ٹیچر دے طور تے بھرتی تھیوݨ آلا شخص تدریس دے نال نال اپݨی تعلیم کوں ماسٹر ڈگری تک گھن ویندے تے ہائی سکول دے ہیڈ ماسٹر دے طور تے اوندی ریٹائرڈ منٹ تھیندی اے۔ اے ڳال قابل فخر وی ہے تے قابل تقلید وی۔ اساݙے ڈھیر سارے استاد تے ٻے شعبیں دے لوک ایجھے وی ہن جو اُنہاں دی ہِک ݙینھ نوکری ملی، ٻے ݙینھ سب کجھ بُھل ویندن ، او سمجھدن اساں منزل پا ڳھدی اے، جݙاں جو اساں کوں ماء دی جھولی توں گھن تے  قبر دے پُڄدے تئیں پڑھݨاں چہیدے۔ سرائیکی قوم ایں ویلھے جیرھے عذابیں وات اے تے جہالت دے جیرھے قہاری جکڑیں وچ جکڑی پی اے تعلیم بِناں ٻی کوئی ایہو جیہی شئے کائنی جیرھی قوم کوں ، ایں سانگے تعلیم تعلیم تے بس تعلیم ، چُھڑوا سڳے۔

سئیں اللہ ݙتہ ندیم سمیجو ٻہوں چنڳے شاعر تے ٻہوں چنڳے استاد ہووݨ دے نال نال ٻہوں چنڳے انسان وی ہن، یاریں دے یار اِن ، انہائیں دے اندر ہِک ٻیا انسان وی ہے جیرھا جو ہِک وسیبی تے ثقافتی انسان اے۔ ندیم سمیجو کوں اپݨی ماء ٻولی دے نال نال اپݨی ثقافت نال وی پیار اے۔ او ݙسیندن جو اپݨے وسیب دے کٹھ، میل، ادبی تے ثقافتی میلے شادئیں تے جُھمر تاڑی دے کٹھ تے خاص طور تے او مجلساں چنڳی طرح یاد ہن جیرھیاں جو ساری ساری رات جاری رہندیاں ہن، قصے تھیندے ہن ، تے خاص طور تے مولوی لطف علی سئیں دا سیفل الملوک آلا قصہ سوہݨی دِھر نال پڑھیا تے سݨیا ویندا ہئی۔ سئیں ندیم سمیجو ݙسیندن جو روجھاݨ دے سئیں قصہ سیفل الملوک دے حافظ سئیں قاضی محمد علی اساݙی وستی کوٹلہ نواب تشریف گھن امدے ہن ، ’’سیفل خاں‘‘ ۔  او جتنی سوہݨی تے مِٹھی آواز وچ قصہ سیفل الملوک سݨیندے ہن او اساکوں احٖ وی یاد اے تے کݙاہیں نی وِسر سڳدا۔

11 اکتوبر 1953 ء کوں حاجی احمد بخش سمیجہ دے گھر پیدا تھیوݨ آلے سئیں اللہ ݙتہ سمیجہ دے بارے وچ کوئی نہ ڄاݨدا ہئی جو او ہک ویلھے آ تے اپݨے وسیب دی سُنڄاݨ بݨسن۔ میں ہمیش ہِک ڳال کرینداں تے احٖ وی آکھداں جو ملخ مربعے ، کاراں موٹراں تے کوٹھیاں بنگلے کہیں شخص دے وݙے ہووݨ دا ثبوت کائنی ، کہیں وی شخص کوں اوندا کردار وݙا بݨیندے۔ سئیں ندیم سمیجو اپݨی سوچ ، اپݨی فکر تے اپݨی انسان دوستی دے حوالے نال وݙے آدمی ہِن تے زیر نظر کتاب انہائیں دی شان دا ثبوت اے۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ