نادر لاشاری دی بلا نقط شاعری

سرائیکی شاعری دا پندھ تیزی نال اڳونہاں تھیندا پے ، نینگر شاعر نویں نویں تجربے کریندے پن۔ نادر لاشاری دی کتاب ’’آس اَدھوری‘‘سرائیکی شاعری وچ نواں تجربہ ہے ۔ 1999ء وچ سئیں نادر لاشاری ہوراں 48صفحیاں دا کتابچہ بلانقط چھپوایا ۔ میݙے خیال وچ بلا نقط شائع تھیوݨ والا پہلا کتابچہ ہا ۔ ایندے بعد سئیں بے زر شجاع آبادی دی 112صفحیں دی کتاب ’’سِک سلوک‘‘ 2005ء وچ شائع تھئی اَتے اَحٖ میݙے سامھے 1999ء وچ تھیوݨ والے کتابچے ’’آس اَدھوری‘‘ دا ضخیم تے جامع ایڈیشن ہے ، میں سمجھداں جو سرائیکی ادب دی اے ٻہوں وݙی کامیابی ہے جو سرائیکی شاعری دا پندھ پچھونہاں نی بلکہ اڳونہاں تھیندا پے۔

ستر تے اَسّی دے ݙہاکے قیس فریدی ، عزیز شاہد ، اقبال سوکڑی ، سرور کربلائی ، جانباز جتوئی ، فیض محمد دلچسپ ، عبدالکریم دلشاد ، انجم لاشاری ، ممتاز حیدر ݙاہر ، مجاہد جتوئی ، حیدر گردیزی ، ریاض رحمانی ، ارشاد تونسوی ، نصراللہ خان ناصر ، سلیم احسن ، حسن رضا ، گردیزی ، فدا ملتانی ، اُمید ملتانی ، مشکور قطب پوری ،خادم ملک ملتانی ، اللہ بخش یاد اَتے ایں طرحاں دے ٻہوں سارے شاعر وݙی سِک محبت اَتے تیزی نال جدید ادب تخلیق کریندے پے ہَن ۔ انہاں وچوں’’تانا دھیرے تانا دھیرے‘‘ لکھݨ والے قیس فریدی اَتے ’’کوئی دِل گھندے بھئی دِل‘‘ جہی شاہکار نظم لکھݨ والے عزیز شاہد دا شمار جدید اَتے (سمجھ آ ونڄݨ والی شاعری) دے اڳواݨ تے موہری ہن ، اسّی دے ݙہاکے دے بعد کجھ وقفہ آیا اُتے ذکر کیتے ڳئے شاعراں وچوں کجھ پچھونہے کر ڳے اَتے اڳلے جہان ٹُر ڳئے پر اللہ سئیں سرائیکی شاعری دے میدان وچ وانجھا نی رکھیا اَحٖ سئیں شاکر شجاع آبادی ، سئیں احمد خان طارق ، امان اللہ ارشد ، مصطفیٰ خادم ، بشیر غمخوار ، رشید اُشتر ، جہانگیر مخلص ، خورشید بخاری ، بے زر شجاع آبادی … تے ایں طرحاں ٻئے سینکڑاں تے ہزاراں شاعر جدید ادب تخلیق کریندے پن ۔ انہاں وچ ہک ناں نادر لاشاری دا ہے ، انہاندے کلام دی انفرادیت ایہ ہے جو انہاں اپݨی شاعری وچ او لفظ یا حرف استعمال نی کیتے جنہاں تے نقطہ ہووے بہرحال اے ہک نویں تے کریڈٹ والی گاٖلھ ہے۔

’’آس اَدھوری‘‘ دی پہلی اشاعت وچ اپݨا تخلیق ’’نادر‘‘ استعمال کیتا ہا ، میں ایں بارے لکھیا ہا جو جیکر نقطے والا تخلص کتاب وچ نہ آوے ہا تاں چنگی گاٖلھ ہئی ، ایں واری سئیں نادر لاشاری ہورا ں’’آس اَدھوری‘‘ وچ اپݨا تخلص استعمال نی کیتا جیڑھی جو ٻہوں چنگی گاٖلھ ہے ۔ البتہ ہُݨ وی اُنہاندی شاعری وچ سرائیکی ابجد دے خاص حروف مثلاً ڈگ، انہاں ورتن ، میں لاشاری صاحب دی توجہ ایں طرح مبذول کرائی تاں انہاں آکھیا جو اے نقطے حرفیں دے کائنی ، محض علامتی نقطے ہِن ، ایندے باوجود جیکر تساں پہلے میݙی توجہ ݙیوائو تاں میں ایہ لفظ استعمال نہ کراں ہا ، میݙے خیال وچ اتنے وݙے کم وچ نادر لاشاری صاحب کوں اتنی رعایت حاصل نی ہووݨی چاہیدی ہے ۔

’’آس اَدھوری‘‘ دے مصنف سئیں نادر لاشاری روہی وچ ٻہہ تے سرائیکی ماء ٻولی دا کم کریندے ٻیٹھن ۔ ایہا گاٖلھ وݙے شہریں وچ ٻہݨ والے اساں جہے بے عمل لوکیں کوں دعوت فکر ݙیندی ہے جو اساں کیا ٻیٹھے کریندوں؟ نادر لاشاری اپݨی مٹی ، اپݨی دھرتی اَتے اپݨے وسیب نال ٻہوں محبت کریندن ۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ