میلاد مصطفٰی ﷺ

میلاد مصطفٰی ﷺ

ربیع الاول کیا آندے ہر پاسے اویوں لڳدے جو موسم بہار آ ڳئے اللہ دے پیارے نبی صلی اللہ علیہ وسلم دے دیوانے خوش تھی ویندن ٻڈھڑا ہووے یا جوان ہر عاشق رسول ایویں لڳدے اہدا ودے آندے پکھیاں دا چلکار مٹھا مدنی آندا پئے ہر شئے تھئی ہے باغ بہار مٹھا مدنی آندا پئے جݙاں دنیا اچ کفر و شرک اتے ظلم و زیادتی دا اندھارا گُگ ہئی ، 12 ربیع الاول شریف کوں مکہ پاک اچ حضرت بی بی آمنہ رضی اللہ تعالیٰ عنھا دے مبارک گھر اچ اینجھا نور چمکیے جئیں سارے عالم کوں چمکا ݙتے۔ روندی ہوئی انسانیت دی اکھ جیندو لڳی ہوئی ہئی او اللہ دے پیارے آخری نبی محمد رسول اللہ ﷺ سارے جہانیں واسطے رحمت بݨ کے دنیا اچ تشریف گھن آئن۔ حضور ﷺ12 ربیع الاول صبح صادق دے ٹائم تشریف گھن آئن ہِیں ڳالھوں صبح صادق کوں "وݙا ویہلا" آکھیا ویندے۔ جئیں ویہلے حضور ﷺ دی تشریف آوری تھئی ہے کفر تے اندھارا ختم تھی ڳئے ،شاہ ایران "کسریٰ" دے محل تے زلزلہ آئے اتے محل دے چوݙہ(14) کِنگرے ڈَھہ پئے ایران دے بھا دے چخے( آش کدے) وِسّم(بجھ) ڳئے جیہڑے ہک ہزار سال توں ٻلدے پئے ہیں کݙاہیں نہ وسمی ہئی "دریائے ساوہ"سُک(خشک)ڳئے بت منہ دے بھرݨے ڈھہ پئین(ھواتف الجنان للخرائطی 37,56 رقم 8،16 اتے کعبے کوں وجد آ ڳئے(السیرۃ الحلبیہ ج 1 ص 105) حضور ﷺ جہاں واسطے رحمت بݨ کے تشریف گھن آئے یقینا اللہ پاک دی رحمت دے نزول دا ݙینھ خوشی دا ݙینھ ہوندے۔ اللہ پاک سپارہ 11 سورۃ یونس آیت 58 اچ ارشاد فرمیندے:قُلْ بِفَضْلِ اللّٰهِ وَ بِرَحْمَتِهٖ فَبِذٰلِكَ فَلْیَفْرَحُوْاؕ-هُوَ خَیْرٌ مِّمَّا یَجْمَعُوْنَ(یونس:58)ترجمہ:تساں فرما ݙیوو اللہ ہی دے فضل اتے اوندی رحمت اتے ہِیندے اُتے چہیدا ہے جو خوشی کرن۔او اوندے کنیں بہتر ہے جیہڑا او کٹھا کریندن۔ اللہ اکبر فضل و رحمتِ خداوندی تے خوش تھیوݨ دا حکم خود قرآن ݙیندا پئے،کیا حضور ﷺ توں ودھ کے وی کوئی اللہ دی رحمت ہے؟ ݙیکھو قرآن پاک 17 سپارے سورۃ الانبیاء آیت نمبر 107 ءچ صاف صاف اعلان ہے: وَ مَاۤ اَرْسَلْنٰكَ اِلَّا رَحْمَةً لِّلْعٰلَمِیْنَ(107) ترجمہ: اتے اساں تہاکوں سارے جہانیں واسطے رحمت بݨا کے بیجھے۔

شب قدر توں وی افضل رات

حضرت سیدنا شیخ عبد الحق محدث دہلوی رحمۃ اللہ علیہ فرمیندن "بے شک نبی کریم ﷺ دی ولادت دی رات شب قدر (لیلۃ القدر) توں وی افضل ہے کیونجو شب ولادت سرکار ﷺ دی تشرف آوری دی رات ہے جبکہ لیلۃ القدر حضور ﷺ کوں عطاء کیتی ہوئی رات ہے (ماثبت بالسنۃ ص 100)

میلاد اتے ابولہت(حکایت)

جݙاں ابولہب مر ڳئے تاں اوندے کجھ گھر آلیں اونکوں خواب اچ برے حال اچ ݙٹھے پچھونے (مرݨ توں بعد) کیا ملیے وی ؟ اکھے تہاݙے کنیں جدا تھی کے کوئی چنڳائی کائنی ملی ولا آپݨے نوٹھے (انگوٹھے) دے تلو سوراخ دو اشارہ کریندیں ہوئیں آکھیس سوائے ایندے جو ایندے اچوں میکوں پاݨی پلایا ویندے کیونجو میں ثویبہ ٻانھیں(لونڈی) کوں آزاد کیتا ہم۔ (مصنف عبد الرزاق ج 9 ص 9 حدیث 16661،عمدۃ القاری ج 14 ص 44 تحت الحدیث5101)

*میلاد اتے مسلمان*

حضرت شیخ عبد الحق محدث دہلوی رحمۃ اللہ علیہ ایں حدث پاک دے تعلق نال فرمیندن ایں حکایت اچ میلاد مناوݨ آلیاں واسطے وݙی دلیل ہے ابولہب جیہڑا کافر ہا حضور ﷺ دی آمد دی خوشی مناوݨ تے اونکوں بدلہ ݙتا ڳئے تاں اوں مسلمان دا کیا حال ہوسی جیہڑا حضور ﷺ دی آمد دی خوشی وچ آپݨا مال خرچیندے۔

• میلاد مناوݨ نال حضور صلی اللہ علیہ وسلم خوش تھیندن*

ہک عالم فرمیندن! الحمدللہ میکوں خواب اچ حضور صلی اللہ علیہ وسلم دی زیارت تھئی،میں عرض کیتی: یا رسول اللہ کیا تساں مسلمانیں دی تہاݙی ولادت دی خوشی مناوݨ تے خوش تھیندے وے؟ حضور فرمائے "جیہڑا ساݙے کولوں خوش تھیندے اساں وی اوندے کولوں خوش تھیندے ہیں۔ (سبل الھدی ج1 ص 363،فتاوی رضویہ ج 23 ص 754)