میر عثمان

میر عثمان امجد سرائیکی زبان ءچ نظم دا شاعر ہے، کمپیوٹر سافٹویئر دا انجینئر ہے۔

ڄم پل

ضلع دیرہ غازی خان دی تحصیل تونسہ شریف دے ہک چھوٹے دیہات وستی بزدار ءچ ١٢ اپریل ١٩٩٧ء کوں ڄمین۔

تعلیم

میٹرک تک دی تعلیم اپڑے دیہات ءچو کیتی نے اور ایف ایس سی اپنی تحصیل تونسہ دے ڈگری کالج ءچ مکمل کیتی نے. اوندے بعد لاھور ءچ بی ایس سوفٹویئر انجینرنگ کریندے پئین.

نمونہ کلام

آزاد نظم

ساڈا رُوآں رُوآں کَن

ساڈا رُوآں رُوآں اَکھّ

ساڈیاں نظماں ساڈا لَکھّ

ساڈیاں سمتاں ساڈا ساہ

ساڈے رستے ساڈا پریم

ساکوں کہیں دے نال کیا

کیا راما، کرشنا، بُدھّ؟؟

ساکوں اپنے یار دی سُدھ

میر عثمان

.

نثری نظم

شکوہ کیھری گاہل دا

جسم آزاد کائینی؟؟؟

جیھرلے ساڈی جھوک تیں

اندھارا بَل پوندے

جیھرے ویھلے

پوری جھوک ءچ نندر جاگ پوندی ہے

میں کہیں نال، کہیں لٹھ تیں

کہیں ونڑ دے ساہمنڑے

چاندنی ہیٹ کئ گاہلیں کرینداں

میں جھئیں بہوں سارے لوگ ایویں کریندن

کیا تیکوں ایویں خیال کائینی آندے؟

ول شکوہ کہیاں؟

آ شکر کروں

'خیال آزاد ہن'...

میر عثمان

.

غزل

اُتنے تانڑیں سارے لوکی سُکھیے رہ ونجڑیے ہن

جتنے تانڑیں سارے پکھی وسدے رہ ونجنڑیے ہن

.

ساڈے بعد وی پیار محبت بیٹھکاں تھینداں رہسن

پاندھی توڑے نہ ووی ہوسن، رستے رہ ونجڑیے ہن

.

کیھرا بندہ آھدے ساڈی تانگھ کڈھائیں نہ بُجھسی

کیہڑا دعویدار اے ڈیووے بلدے رہ ونجنڑیے ہن

.

توں بس من دے اندرو پریت دا گوتم زندہ رکھیں

سادھو تیڈی وستی دے وچ آندے رہ ونجنڑیے ہن

میر عثمان

.

شعر

ساڈو نیناں دی "نائیں" نسی چھوڑی

من تیں حسرت دی بھِک کھڑی رہسی

.

ایجھیں سک ہے رویجے جے جتنا

وت وی روون دی سک کھڑی رہسی

.

ساکوں توں ووی جو مل ونجیں توڑے

اپنڑے ویڑھے دی چھک کھڑی رہسی

.

توڑے قربت دے سُر سریلے ہن

ہجر گاونڑ دی سک کھڑی رہسی

.

پل پچھانویں تیں پل دے پلکیں تیں

کئ زمانیں دی چھک کھڑی رہسی

میر عثمان

.

نثری نظم

پوھ دی پچھلی پندھری

اچ کوھیڑ راتیں کوں بگا کر ڈتا ہا

راتیں دے آخری پہر اچ

محسوس تھیندا ہا آوازیں کوں

ہتھ کڑیاں لگ گئین

ویران گلیاں

بس چار اکھیں جاگدیاں ہَن

میں اپنڑے ٹَھڈے ہتھ

تیڈے ملوک ہتھیں اچ ان سکیندا ہم

تیڈے میڈے درمیان چپ چپاتے لحظے،

لفظ بیان کر سگن ہا......

میر عثمان

نثری نظم

۔ کڈھائیں کڈھائیں

ناخوشگوار موڈ ءچ

جیھرلے انسان اپڑی سوچ دے

ولیئے ہوئے دَر وی نئ کھولنڑ چاہنا

اَکھیں بے اختیار

دیوار نال لگی گھڑی

کِلی نال ٹنگیئے ہوئے مُسلّے

یا پاووے نال لڑکدی تسبیح تیں وینیاں پیاں رہنن..

انھ دوران کوئی اگر تیڈا ناں چاووے

تاں محسوس تھیندے

تیڈا ناں میڈی کھل دا پاسورڈ ہے ۔ میر عثمان

نثری نظم

تیڈے ناں دے "لا" کنو گھن کرائیں

کہیں جمیل "ہا" تک

شاید ہی توں سمجھیں

کویلی دی ٹور ٹردے لحظیں نال

ساڈی روانی تیڈے شور کنو ہئ

تیڈے لبیں تیں نچدے ہوئے لفظیں دے مور

دریھ ہن روہی کو ساوا کرنڑ واسطے

تائیں قربت دے رستے دان کر کے

ساڈے وجود تیں دید دے چکور آزاد کیتن

میڈی ڈوجھی محبت واسطے

پہلی نظم ہک اعتراف ہے

میر عثمان .

نثری نظم

کہیں نظم دا موضوع

نفرت نئ تھی سگدا

کیونکہ

اکھیں صرف ڈیکھ سگدین....

کہیں نظم دا موضوع

محبت کنو ہٹ کے وی تھی سگدے

کیونکہ

اکھیں سمجھ ووی سگدین

میر عثمان .

آزاد نظم

جتھاں مرلیاں مشرک ہوون

جتھاں ٹُٹڑیں کمو رانڑیاں

جتھاں دریا رستہ بھُلن

جتھاں سادھو نفرت کرن

جتھاں صندل بالی ونجے

جتھاں اللہ صرف ڈراوے

جتھاں شرطیں نال محبت

جتھاں سایہ ووی مترایہ

جتھاں ساریاں پلکاں کنڈے

اُتھاں نظماں! ویڑھے، وسوں

اُتھاں نظماں چٹے جھنڈے

میر عثمان .

نثری نظم

پپلیں دی تنڑاں تیں

خوبیں کوں حسرت دی راکھی بدھیساں

خیر خوش دعا سلام دے مچ وسمیساں

سوچ دی سلیٹ اتنی صاف کریساں

کہیں چہرے دا کوئ ناں کائینا رہسی

بے شک کہیں تیں گاہل نہ کھلے

ساریں چابیں تیں جندرہ لیساں

سوچ دا گھڑا وجسی

"قصہ" وسریا تاں نمی ویندا

مڑ کے وہانڑی کوں سجدہ ڈیساں

ڈھلدی دیغر دے متھے تیں پیرے دا تلک لیساں

نین نظارے دے سپرد تھیسن

سُنّ چپاتے ساہ سرخی اچ گھلسن

تِکھیں تِکھیں ٹر پوساں

ساریں کو پتے

ٹرین انتظار نئ کریندی.....

میر عثمان .

نثری نظم

اکثر خوشاں کہیں خاص جاہ تیں

انسان واسطے منتظر ہوندن

جیویں ہک عرصے بعد

وطن ولنڑ تیں ہک خوشی

سڑک دے کنارے میڈے انتظار اچ ہوندی ہے

""تونسہ شریف 1 کلو میٹر""

میر عثمان .

نثری نظم

شاید میں "مس مرزم" تیں یقین رکھداں

کیوں جو

میڈے کمرے دی ٹیوب تین رہونڑ آلا

چیڑا

کئ روز کنو مسلسل میکوں

ڈسیندے کہ اوندی چیڑی

پکھے نال کیویں لگی ہےے

میر عثمان .

Trace ٹریس

کمرے وچ خاموشی دی تلاوت ختم تھی گئ ہے

سوجھلا ووی ناشتے دی ٹیبل تیں بہہ گئے

تیڈیاں بے مقصد گاہلیں ووی ختم تھی گئین

یقیناً تیڈی نندر ہی

گھڑی دے مُنہ کنو ہتھ چاتے

میں ٹک ٹک واضح سنڑدا پیاں

میں کیوں اِنھ رات ءچ راہونڑ چاہنداں

جیھری ہولیں ہولیں فجر دے سینے ءچ لہندی پئ ہے

وت اُویں سوجھلے دے نال نال

دھیان وچ ڈر دی دستک تیز تھیندی ویندی ہے...............

کیا مصیبت ہے یار

وت اینھ دفع

اکتاہٹ ،محبت کوں trace کر گھدے