میر شیر علی افسوس

فورٹ ولیم کالج دے مشہور مصنفین وچ میر شیر علی افسوس دا ناں وی شامل ہے۔ میر شیر علی افسوس دے آباء و اجداد ایران توں آکے ہندوستان آباد تھئے۔ افسوس دہلی وچ 1737ء وچ پیدا تھئے۔ لیکن دہلی دی تباہی دے بعد افسوس لکھنؤ چلے ڳئے۔ کرنل اسکاٹ دی بدولت فورٹ ولیم کالج کلکتہ دے منشیاں وچ بھرتی تھئے۔ 1809ء وچ کلکتہ وچ انہاں دا انتقال تھیا۔ فورٹ ولیم کالج دے زمانے وچ میر شیر علی افسوس نے ݙو کتاباں تصنیف کیتے۔ ( باغ اردو، آرائش محفل) ”باغ اردو “ شیخ سعدی دی گلستان دا ترجمہ ہے۔ ایں کتاب وچ سادگی دی کمی ہے۔ ایندے وچ عربی تے فارسی الفاظ دا استعمال زیادہ ہے۔ افسوس نے فارسی دے محاورے تے اسلوب دا موزوں اردو بدل تلاش کرݨ دی کوشش نی کیتی۔ ایں واسطے کتاب وچ نہ سلاست پیدا تھئی ہے تے نہ ہی روانی تے بے تکلفی۔ اُنہاں دی ݙوجھی کتاب ”آرائش محفل“ ہے۔ ایہ کتاب سبحان رائے بٹالوی دی کتاب ”خلاصتہ التواریخ“ دا اردو ترجمہ ہے۔ ایہ تاریخ دی کتاب ہووݨ دے باجود اپݨے سادہ تے پروقار اسلوب دی بناء تے ساݙے دور دے ادب دی کتاباں وچ شامل تھیوݨ لڳی ہے۔ عبارت وچ سلاست تے روانی تے بےتکلفی ایں کتاب دا خاصہ ہے۔