مولوی لطف علی دا ہِک ’’ مصرعۂ مظلوم‘‘

13 جون 2016 ء کوں روزنامہ خبریں ملتان دے وسیب سنگ اچ مجاہد جتوئی دا ہِک مضمون ’’ مولوی لطف علی دا مصرعۂ مظلوم ‘‘ دے ناں تے شائع تھئے ۔ مصرعے کوں مظلوم کیوں آکھئے ؟ ایندی وضاحت خود کریسن ۔ اے مضمون وی اوں سلسلے دی ہِک کڑی اے جتھاں خواجہ فرید دے دیوان اچ تحریف کر تے تخت لاہور دی وکالت کر چکین ۔ جیرھے مصرعے کوں انہاں مظلوم آکھئے او مصرعہ ہے ’’ سوہݨے دیس پنجاب اُتے ہے پنجتن پاک دا سایہ ‘‘ حالانکہ نہ تاں اے مصرعہ مظلوم اے تے نہ مولوی لطف علی سئیں دی ڳالھ غلط اے ۔  ڳالھ اے ہے جو سرائیکی وسیب دے لوک ہمیشہ دعائیں ݙیوݨ آلے لوک ہِن ۔ جݙاں مولوی لطف علی صاحب اے مصرعہ لکھیا اوں ویلھے سرائیکی وسیب تے پنجاب دا قبضہ نہ ہئی ۔ پنجاب آپݨے گھر خوش ہا ، اساں اپݨے گھر خوش ہاسے ۔ میں اے وضاحت کرݨ چہنداں جو جھیڑا رنجیت سنگھ دے قبضے دے بعد شروع تھئے ۔ رنجیت سنگھ دے قبضے کوں ایں ویلھے 198 سال تھی ڳن جݙانجو مولوی لطف علی صاحب اپݨی کتاب سیف الملوک 245 سال پہلے لکھی ۔ اگر مولوی لطف علی صاحب اوں ویلھے اپݨے ہمسائے پنجاب کوں دعا ݙتی اے تاں کوئی غلط کم نی کیتا ۔ سارے غلط کم مجاہد جتوئی آپ کریندا پے ۔ او تخت لاہور دی غلامی تے خوشامد وچ اتنا چریا تھی ڳئے جو کوڑے بݨا بݨا تے پنجاب کوں برتر تے اعلیٰ بݨیندا ٻیٹھے تے مقدس سرائیکستان کوں کمتر تے گھٹیا بݨاوݨ دی کوشش اچ لڳیا بیٹھے پر اوندی بُھل اے ۔ کانویں دے آکھئے ڈھور نی مردے ۔ ݙینھ کوں رات اکھیسو تاں آپ کوڑے تھی کھڑسو ۔ سرائیکی کوں کجھ نی تھیندا پر احٖ لاہوروں چھپݨ آلے ہِک پنجابی رسالے دی پیشانی تے مولوی لطف علی صاحب دا ایہو مصرعہ لاتا ڳے تے پنجابی اکھیندن جو اے اساݙی نی تہاݙے سرائیکی لکھاری دی تحقیق اے ۔ اے کیا تحقیق اے جو ہروں بھروں آپ کوں آپ ناں گیا آکھے ۔ پنجابیں کوں خوش کرݨے تاں ول چنڳا اے ہے جو انہاں دے قدمیں اچ ونڄ رہو ۔ سرائیکی قوم دا ٻیڑہ تاں نہ ٻوڑو ۔ کیا سرائیکی دشمنیں دی پہلے کمی اے جو باقی تُساں رہ ڳیو ؟ اساں ہر ایہو جہے عمل دی مخالفت کریسوں جیرھا اساݙی سرائیکی ماء ٻولی تے اساݙے مقدس سرائیکی دیس دی عظمت دے خلاف ہوسے ۔ البتہ جو ڳالھ سچ ہوسے ، اساں منݨ اچ دیر نہ کریسوں پر کوڑ دے منہ اچ دھوڑ پائی آؤسوں ۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ