مولانا کوثر نیازی

ملک دے نامور سیاست دان، عالم دین، خطیب، شاعر، ادیب تے صحافی مولانا کوثر نیازی 21 اپریل 1934ء کوں سرائیکی وسیب دے شہر موسٰی خیل ضلع میانوالی وچ پیدا تھئے۔ انہاں دے والد محترم دا ناں فتح خان نیازی ہئی۔ انہاں نے اپݨے کلہے پتر دا ناں محمد حیات خان رکھا۔ سکول دے زمانے وچ محمد حیات خان کوں شاعری دا شوق پیدا تھیا تاں انہاں نے اپݨا قلمی ناں “کوثر نیازی” رکھ گھدا۔ انہاں نے موسیٰ خیل وچ ابتدائی تعلیم مکمل کرݨ دے بعد گورنمنٹ ہائی سکول میانوالی توں میٹرک کیتا۔

ادبی تے سیاسی زندگی

میٹرک دے بعد کوثر نیازی کوں لاہور دے سہ روزہ اخبار ”کوثر” وچ ملازمت مل ڳئی تاں اوہ مستقل طور تے لاہور مقیم تھی ڳئے۔ سہ روزہ “کوثر” دے علاوہ اوہ روزنامہ “تسنیم “ دے مدیر بھی رہیے۔ بقیہ دینی و دنیاوی تعلیم لاہور وچ مکمل کیتی۔ پنجاب یونیورسٹی لاہور توں اردو، عربی تے فارسی وچ آنرز کیتا۔ ایں دوران اوہ جماعت اسلامی نال وابستہ تھی ڳئے۔ جنرل ایوب دے مارشل لاء دور وچ تحریراں تے تقریراں تے انہاں کوں پنج سال قید کی سزا تھئی۔ اوں وقت تک وہ چوٹی دے صحافی دی حیثیت نال ملک بھر وچ مشہور و معروف تھی چکے ہن۔

ذوالفقار علی بھٹو نے انہاں کوں پاکستان پیپلز پارٹی وچ شمولیت دی دعوت ݙتی تاں اوہ انکار نہ کر سڳے تے پیپلز پارٹی وچ شامل تھی ڳئے۔ 1970ء دے عام انتخابات وچ قومی اسمبلی دے رکن منتخب تھئے۔پیپلز پارٹی دی حکومت قائم تھئی تاں انہاں نے مذہبی تے اقلیتی امور دے وزیر دے طور تے خدمات انجام ݙتے۔ اوندے بعد اوہ وزیر اطلاعات و نشریات، حج و اوقاف مقرر تھئے۔ کوثر نیازی تقریباً 20 سال لاہور رہیے۔ جݙݨ اوہ وفاقی وزیر بݨے تاں اسلام آباد گھر بݨا کے اتھاں منتقل تھی ڳئے۔ محترمہ بے نظیر بھٹو دی ݙوجھی حکومت دے دوران مولانا کوثر نیازی کوں اسلامی نظریاتی کونسل دا چیئرمین بݨایا ڳیا۔ مولانا کوثر نیازی دی شاعری دے ترئے مجموعے تے نثر دے تقریباً چویہہ کتاباں شائع تھی چکے ہن۔

وفات

اوہ 19 مارچ 1996ء کوں دماغ دی شریان پھٹݨ نال زندگی دا سفر مکمل کر کے اسلام آباد وچ ایں دنیا توں رخصت تھی ڳئے۔

لکھتاں

• انداز بیاں • دیدہ ور (ذوالفقار علی بھٹو) • زرِ گل • مشاہدات و تاثرات • کوہ قاف کے دیس میں • ذکرِ حسین علیہ السلام • اور لائن کٹ گئ • مولا علی کرم اللہ وجہہ • نقش رھگزر • اسلام ہمارا رہنما ہے • مطالعہ ء تاریخ • آئینہ ء تثلیث • جنہیں میں نے دیکھا • ذکر رسول ص • سفر ہے شرط • Mirror of trinity • التثلیث في المراۃ۔ (عربی)

کوثر نیازی دے چند اردو اشعار

لے سانس بھی آہستہ یہ دربار نبی ہے

خطرہ ہے بہت سخت یہاں بے ادبی کا

اس شہر کے ذرے ہیں مہ و مہر سے بڑھ کر

جس شہر میں اللہ کےمحبوب کا گھر ہے

کوثر مجھے اس جرم سے انکارنہیں ہے

شیدا ہوں دل و جاں سے میں اولاد علی کا

ضرور تیری گلی سے گزر ہُوا ہوگا

کہ آج بادِ صبا بے قرار آئ ہے