معراج نامہ

معراج نامہ او نظم ہے جیندے وچ حضور اکرم ﷺ دی زندگی دے حیران کن یا عقل کوں دنگ کر ݙیوݨ آلے واقعے "معراج" دا ذکر کیتا ویندا ہے۔ اسلامی اصناف شاعری دی ہک صنف، جیندے وچ حضت محمدﷺ دے ہک معجزے، جیکوں معراج دے ناں نال ڄاݨیا ویندا ہے، دا حال بیان کیتا ویندا ہے۔ مسلماناں دا منݨ ہے جو حضرت محمد ﷺ کوں راتورات مکہ شہر توں بیت المقدس تائیں تے اتھوں ستاں اسماناں، جنت، ٻیاں ڄاہیں تے مقامات دی سیر کروائی۔ ایں عظیم روحانی واقعہ دا بیان شاعری دی صورت وچ مسلمان شعراء نے کیتا ہے۔ تے مولود نامہ، نورنامہ، وفات نامہ دی طرحاں اسلامی شاعری وچمعراج نامہ وی ہک وکھری صنف شاعری ہے۔

تاریخ

زیادہ تر معراج نامے اردو، فارسی تے عربی وچ لکھے ڳئے ہن۔ سرائیکی وچ حضرت قبول فقیر دا تے حافظ محمد یار دے معراج نامے ملدے ہن۔ ایہ معراج نامے سرائیکی زبان دے پہلے دور دی قدیم شاعری دے شاندار نمونے ہن۔ ایں توں علاوہ میاں قادریار دا معراج نامہ ١٢٣٧ھ وچلکھیا ڳئے۔ حافط محمدیار دا معراج نامہ مخمس دے انداز وچ ہے۔ ایندے کل ٢٦ بند ہن۔ ہر بند دا چھیکڑی مصرع ہکو ہے۔

"توں اڳے فریاد میݙی یا محمدؐ مصطفےٰ"

ایں معراج نامے وچ فضائل سیرت، واقعہ ہجرت، حضرت علیؓ دا ذکر، واقعہ کربلا دے علاوہ یاران مصطفےٰ دا ذکر وی وݙی تفصیل نال کیتا ڳئے۔