مظہر نیازی
سرائیکی شاعری وچ مظہر نیازی دا ناں بہوں اہم اے تے تعلق میانوالی نال اے
درجن توں ودھ کتاباں دے لکھاری سئیں محمد مظہر نیازی دے نویں سرائیکی شعری مجموعے "لوظ" دی پھرول.
سئیں محمد مظہر نیازی سرائیکی وسوں دا جگ سُنجانا شاعر اے. چھڑا شاعر نئیں ، نثر نگار وی ہے تے موسیقار وی. ہک تکڑے تے گُنیتے شاعر دے لکھے ہوئے لفظ آپ اوندا مہاندرا گھڑیندن. "لو ظ" اوندیاں ڈِھگ ساریاں غزلاں تے کجھ خن نظماں دا سمول اے. اوندیاں غزلاں اچ گیت تے کافی دا مٹھاج گُھلا ہویا ملدائے. وسوں دے ورتیک تجربےتے کِڑاہت اوندے شعراں اچوں جھاتی پیندے ڈسدن. ایں سانگے ہیٹھوں اوندے کچھ بیت ڈیندا پیاہاں ، تانجو جنھاں "لوظ" ہک لفظ وی نئیں پڑھا، او انھاں شعراں دی چس چا کرائیں "لوظ" بارے اپنی رائے کوں الفاظ ڈے سگھن.
گھر دے اندر حیاتی گزاری ہے میں
تیڈی سدتک نہ تھئی میڈا در مُک گیائے
.....
پِیندی ویندی اے لہو میڈا
تیڈی یاد وی سِر دی جوں ایں
.. ..
ساریاں سکھیاں کوں ٹور بیٹھی ہاں
میڈا بوچھن رنگیونا چاہیدائے
......
ست رنگیاں پلکاں تے ہنجوں جھوٹے کھاسن
اپنے سار خواب رنگیساں وت سم پوساں
....
جیویں بیری تے بُور لگ ویندائے
اونویں اکھیاں کوں خواب لگ ویندن
...
ساکوں گُنگ دان مال سمجھا گئے
تَیں الایائے بُلار تھی گئے ہیں
....
ہک ہک ہنج دا حساب ڈے میکوں
جتنا لُرھیائے سنگھار واپس کر
...
میں ہنجواں دی ویل ہُکینداں اتنا وین کرینداں
میڈے کولوں آپ آوڑدائے پباں بھا سمندر
....
ڈوں کہ ترائے ہن مکان یاد آندم
اے گلی کیویں شاھر بن گئی اے
...
لوک سمجھدے ہوسن اساں رج کے ٹُکر کھادائے
اساں خالی بھانڈے اپنے سامنے رکھے ہوندن
.. ..
دُھپ دی وستی دا ہے دستور نرالا مظہر
ہر کوئی اپنے پِچھاویں توں سہارا منگدائے
....
تیڈے اندر دا زاہر مر ویسی
آپ کوں آپ ڈنگ، ملنگ تھی ونج
....
اتنے وڈے وی اساں کونا تھئے
ساڈے کیتے اے شاھر کافی ہے
....
ہر پاسے اج گرمی ہوسی
ساہ پئے ملدن ساہواں نال
....
ہک بوچھن کوں نپن کیتے
پوری وستی لُڑھدی گئی اے
اِنھاں شعراں اچ محمد مظہر نیازی دا شعری تکڑپ تے گُنائی اُوندے مہاندرے کوں چنگی تراویں نشابر کر یندن. میں ایڈے چنگے شعری مجموعے تے مصنف کوں ودھائی ڈینداں. تے امید کرینداں جو اے شعری مجموعہ سرائیکی شاعری دی وددھک کوں اگوہاں کریسی.
سعیداختر