مظہر مسعود

اصل ناں    محمد مظہر

قلمی ناں    مظہر مسعودؔ

جٖمنْ        1946ء

جاہ پتہ      گورنمنٹ کالج ڈیرہ نواب ،تحصیل احمد پور شرقیہ

مظہر مسعود ؔدی شاعری اچ استاد انہ رنگ ،جچیا تلیا لہجہ ،ٹھیٹھ زبان ،روز مرہ تے محاورے دا سوہنْاں استعمال انہاں کوں ڈٖوجھے شاعراں کنوں ممتاز کریندے۔خاص طور تے غزل بٖہوں سوہنْی لکھدن۔

غزل

دل ساڈٖا ہا اندر دردیں دا انبار پرایا ہا

سیک اساکوں کھاندا رہ گٖئے پر انگار پرایا ہا

سانجھ ونڈاونْ دا وقت آیا تاں ساکوں معلوم تھیا

اساں محض ونگاری ہاسے کاروبار پرایا ہا

بُٖڈٖدے پور اشاریں نال کناریں کوں روداد سنْائی

بٖیڑی بے عیبی ہئی ساڈٖی ، بٖیڑی دار پرایا ہا

تسے ترساندیاں کوں ساونْ کھل تے اتناں آکھی گٖئی

میڈٖے مونڈھیاں تے پانْی دا سارا بار پرایا ہا

دل مسعودؔ منیندا کائنی دل کوں کیویں سمجھاواں

او تِل ملک بیگانی ہاوی ، او رخسار پرایا ہا