مظہر خان

اصل ناں       مظہر خان

تخلص           مظہرؔ

جٖمنْ            1955ء

تعلیم            مڈل

پیشہ           سابقہ ممبر ضلع کونسل

فون نمبر         0341 0472679

جاہ پتہ          پرانْی وستی تلکوٹ بالمقابل ریلوے مال گودام مظفر گٖڑھ

شعری مجموعے ’’ پیار عبادت ہے ‘‘، ’’ بُٖک ہنجھوں دے‘‘، ’’دل وچ وسدے‘‘ تے ’’نکھیڑا نہ ہوندا‘‘۔دے خالق مظہر خان دا تعلق چانڈیہ بلوچ فیملی نال ہے آپ شہرت توں بے نیاز ہک گوشہ نشین شاعر ہن ۔ زیادہ لوکاں دے ہجوم تے مشاعریاں دے شور شرابے توں کنارا کشی کیتی رکھدن ۔مگر کیوں؟ بقول مظہر صاحب اوہ بلڈ پریشر دے مریض ہن ،شور شرابے وچ انہاندی طبعیت اُکتا ویندی ہے۔ آپ دا نمونہ کلام حاضر ہے۔

(1)غزل

سجٖنْ کوں نئیں ہوندا مناونْ کئی سوکھا

اوندا کول ساڈٖے نئیں آونْ کئی سوکھا

اُتھاں بے خودی دا تماشہ وی تھیندے

میاں طور تے نئیں الاونْ کئی سوکھا

یکا توں اکھیندیں جو واپس نئیں آیا

چھُٹا تیر ول نئیں ولاونْ کئی سوکھا

ایہو بھار بھاری سجٖنْ دی جدائی دا

ڈٖسا ہاں وے کملا ہے چاونْ کئی سوکھا

اساں وی تاں اوکوں بھلا ڈٖیندے مظہرؔ

سجٖنْ کوں جے ہوندا بھلاونْ کئی سوکھا