مشتری
مشتری (علامت: .svg){kind=small}
)
لکھت. ارشد لاشاری
مشتری ہوشیار،، ایہ جملہ لوکیں کوں اشاک کرݨ سانگے استمعال کیتا ویندے، پر تہاکوں پتہ ہے جو سیارا مشتری دے حقائق سچ وچ لوکیں دے ہوش اݙا ݙیندے؟
جیا!
سیارا مشتری (جوپیٹر )ملکی وے گیلکسی وچ اَساݙے سجھ دے وہیڑے (سولر سسٹم)دا پنڄواں نمبر سیارا (گولہ)ہے، جیکر سولر سسٹم (نظام شمسی)وچوں سجھ کوں کڈھ گھدا ونڄے تاں پورے سولر سسٹم دے تمام سیاریاں(مرکری، وینس، ارتھ، مارس، سیٹرن، یورنس، تے نیپچون) دے کل حجم توں وی وݙا مشتری ہے۔
ایندا رقبہ (حجم)وچ 1300 دھرتی جہیں سیارے آ سڳدن ایندا ڈائی میٹر ہک لکھ چالیہہ ہزار کلو میٹر ھے. تے ایہ زیادہ تر گیسی سیارا ہے ایندی ٹھوس سطح ٻہوں گھٹ یا ولا نہ ہووݨ دے برابر ہے، ایندا زمین(دھرتی) کنیں پندھ تقریباً 60 توں 70 کروڑ کلومیٹر ہے، ایہ سیارا ایݙا وݙا ہے جو ایندا ہک طوفان رتا دانگ (سرخ نشان )اتھاں کئی صدیاں توں جاری ہے اَتے ایں طوفان دے رقبے وچ ہی تقریباً ترائے دھرتی جہیں سیارے آ ویسن جیندی فوٹو ناسا ویب سائٹ توں ڈانلوڈ کر تے لا ݙتی ہے تے نال ہی اپݨے موبائل نال چھکی فوٹو کوں تساں دی آسانی سانگے کجھ ایڈیٹ کیتم، (باقی فوٹو موبائل کیمرے نال سویلے چار توں پنڄ دے دمیان چھکے ڳین )، اے سیارا اڄ کل رات ترائے وڄے توں بعد عین پچھم آلے پاسے سجھ دی ابھرݨ والی جاء تے نظردے، اتے تقریباً چھی وڄے تک موجود ہوندے ایندا نظارا کرݨ سانگے. فجر دی نماز والا بہترین وقت ہے
ایندے علاوہ مشتری (جوپیٹر) کجھ ورہیاں پہلے تئیں نظام شمسی وچ سب تو زیادہ چندر رکھݨ والا سیارا وی ہا، ایہ سیارا 70 دے قریب چندر رکھیندے،
سیارا مشتری نظام شمسی دے ݙوجھے سیاریاں سانگے ویکیوم کلینر دا کم وی کریندے یعنی اینکوں سولر سسسٹم دا جمعدار وی آکھ سڳدے ہسے۔
کیوں جو، ایہ اپݨے سائز تے وسیع گریئوٹی پاروں خلا وچ رلدے شہبایاں تے ݙوجھے آوارہ اجسام کوں اپݨے کول چھک گھندے جیندی وجہ تو ݙوجھے سیارے محفوظ راہندن۔
نوٹ!
ایہ تحریر مختلف سائنس فورم توں معلومات دے ذریعے لکھی ڳئی ہے تے لکھاری دا مقصد صرف ماء ٻولی سرائیکی وچ موضوعات دا ودھارا کرݨ ہے، اختلافی یا سوالیہ کمنٹ تے اپݨی معلومات مطابق جواب ݙتا ویسی جو غیر حتمی ہوسی