مسلم بن الحجاجؒ

مسلم بن حجاج جیہڑے امام مسلمؒ دے ناں نال معروف ہن، محدثین کرام وچ ہک بلند پایہ مقام رکھدے ہن جیہڑا کہیں توں مخفی نی۔

دینی خدمات تے آپؒ دا مرتبہ

علمائے اسلام دا اگرچہ فیصلہ ہے کہ قرآن مجید دے بعد پہلا مرتبہ صحیح بخاری شریف دا ہے تے ول صحیح مسلم شریف دا، جتھوں صحیح مسلم دے جامع امام مسلمؒ دی عظمت دا کافی اندازہ تھی ویندا ہے لیکن بعض علما دا خیال ایہ وی ہے کہ صحیح مسلم شریف دا درجہ اگر صحیح بخاری شریف توں بلند نی تاں مساوی ضرور ہے کیونکہ صحیح مسلم شریف دے احادیث کافی تحقیقات دے بعد جمع کیتیاں گئیاں ہن تے بعض اعتبارات نال تحقیقات وچ حضرت امام مسلمؒ دا درجہ امام بخاری توں ودھا ہویا ہے۔ بہر نوع حضرت امام مسلمؒ دا پایہ محدثین کرام وچ اس قدر بلند ہے کہ اس درجہ تے امام بخاری دے سوا کوئی ݙوجھا محدث نہیں پہنچدا تے انہاں دی کتاب صحیح مسلم شریف اس قدر بلند پایہ کتاب ہے کہ صحیح بخاری دے سوا کوئی کتاب اس دے سامݨے نی رکھیج سڳدی۔

حالات زندگی

امام مسلمؒ دا پورا ناں ابوالحسین مسلم بن الحجاج بن مسلم القشیری بن دردینؒ ہئی۔ ابولحسین آپؒ دی کنیت ہئی تے عساکر الدین لقب ہئی۔ قبیلہ بنو قشیر نال آپؒ تعلق رکھدے ہن جیہڑا عرب دا ہک مشہور خاندان ہئی تے خراسان دا مشہور شہر نیشاپور آپؒ دا وطن ہئی۔ حضرت امام مسلمؒ 203ھ یا 206ھ وچ باختلاف اقوال آپ ؒپیدا تھئے لیکن اکثر علما تے مؤرخین دی تحقیق ایہ ہے کہ آپؒ دا سنہ ولادت 206ھ زیادہ معتبر ہے۔ حضرت امام نوویؒؒ، شارح صحیح مسلم لکھدے ہن کہ حضرت امام مسلمؒؒ، 206ھ وچ پیدا تھئے، 55 سال دی عمر پاتی تے 24 رجب 261ھ کوں اتوار دے ݙینہ شام دے وقت وفات پاتی تے نیشاپور وچ دفن تھئے۔