مرقس دی انجیل

مرقس دا پورا ناں یوحنا مرقس ہئی۔ اوہ پولس دا ساتھی ہئی۔ اُوں نے اپݨی عمر دا آخری حصہ روم وچ گزارا تے اتھئیں اُوں نے پطرس دیاں اُنہاں ڳالہیں کوں جیہڑے اُونکوں یاد ہن، تحریر کیتا۔ ایہ 60 تا 65 عیسوی دے درمیان تحریر کیتی ڳئی۔

تفصیل

ایں انجیل دے مطالعے نال ساکوں ایویں محسوس تھیندے جیویں کوئی چشم دید گواہ اپݨا مشاہدہ بیان کریندا ہووے ۔ ایں انجیل دا آخری حصہ حضرت عیسیٰ علیہ السلام دی زندگی دے آخری ہفتے دے واقعات تے مبنی مواد تے مشتمل ہے۔ ایہ انجیل حضرت عیسیٰ علیہ السلام دی عوامی خدمت دے واقعات تے خدا دی بادشاہی دی خوشخبری دی منادی توں شروع تھیندی ہے۔ ایں کتاب وچ حضرت عیسیٰ علیہ السلام دی وفات دے پیشن گوئیاں درج کیتے ڳئے ہن تے حضرت عیسیٰ علیہ السلام دے دنیا دے گناہواں دی خاطر مصلوب تھیوݨ دا ذکر وی ہے۔ مرقس ایں کتاب وچ حضرت عیسیٰ علیہ اسلام کوں خدا دے اینجھے خادم دے طور تے پیش کریندے جیہڑا خدا دی مرضی کوں پورا کرݨ آیا ہئی۔ آپ دے بیماراں کوں شفاء ݙیوݨ، بدروحاں تے فتح پاوݨ تے مردیاں کوں زندہ کرݨ کوں ہی مسیحی آپ دے ابن اللہ دے ثبوت دے طور تے ڳݨدن ۔ مرقس دی ایں انجیل توں ایہ مقصد وی ہئی کہ رومی مسیحی جنہاں تے رومی بادشاہ ظلم وستم دے پہاڑ تڑیندے ہوندے ہن، دی ہمت ایذارسانی دے انہاں ݙینہاں اچ ٻدھی رہوے۔