مرتضیٰ ناظر

مرتضیٰ ناظر سرائیکی زبان دا شاعر ہے۔

ڄم پل

1967

کتاباں

1.جھال 2.یکتا

نمونہ کلام

نظم

تیڈی فکر اندر کردار اندر

میڈے ہوونڑ دے چھنکارے ھِن

تیڈی مستی موج سمندر دی

تیڈی صورت مورت مندر دی

تیڈے قرب دے جادو جاگدے وچ

میں کئی سالیں توں جاگدا ہاں

تیڈے بول رسیلے سُنڑ سُنڑ کے

میڈے لہجے وچ ھے رَس آ گئی

ہتھ قلم دوات ھے مس آ گئی

میکوں نظم لکھیندیں چس آ گئی

میں نظم اندر جو گال لکھی

تیڈی چاہت وچ ھےڈھال لکھی

میڈی ہر شئے پیار اچ ڈھل گئی اے

میڈی فکر اسمان کوں رَل گئی اے

میڈی ہوند وجود اچ آندی نئیں

میکوں رمز رحیم دے راہ مل گئے

تھئے کرم کریم دے راہ مل گئے

تن دھوتا گئے من دھوتا گئے

میڈا سُوئی وچ دھاکہ پوتا گئے

میکوں جیونڑ دے ڈھنگ آ گئے ھِن

تیڈے مہندی ہانڑیں ہتھیں وچ

میڈی زندگی دے رنگ آ گے ھِن

مرتضٰی ناظر

ݙوہڑہ

راہ راہ لینــــدے راہ رول ݙیندے راہ نال مقابلے نہ کر

داہ مـــار نہ توں متاں داہ ماری داہ نال مقابلے نہ کر

آہ کݙھ نہ توں کوئی آہ سُݨ گھن آہ نال مقابلے نہ کر

اُچ نــال مقــــابلے کـــر ناؔظــــر لاہ نال مقـــابلے نہ کر

کافی

ہک پاگل ہک پیار تے نچدے

ہک پاگل ہک تار تے نچدے

اے پاگل ہے وکھرا پاگل

جیت تے نچدے ہار تے نچدے

ہک نچویندے ہک ہے نچدا

ہک ایں بچدے ہک اوں بچدا

ہک نچدے کوں ڈیکھنڑ والا

ہک من آپنڑاں مار تے نچدے

ہک پاگل دے ہتھ ہن چھلے

ہک پاگل دے کجھ نئیں پلے

ہک دل ہاسی پلے آپنڑیں

او وی یار توں وار تے نچدے

ہک پاگل ہے جانڑنڑ والا

ہک پاگل ہے بھولا بھالا

ہک پاگل ہے رو رو نچدا

ہک پاگل مسکار تے نچدے

پاگل تھیونڑاں پاگل کرنڑاں

سوکھا کم نئیں جیونڑاں مرنڑاں

ہک پاگل ہے ٹکریا میکوں

ہار تے جیت وسار تے نچدے

اکھیاں دے وچ طور تجلہ

لب تیں جاری اللہ اللہ

تس نئیں رکھدا سینے ناظر

تن من آپنڑاں ٹھار تے نچدے

مرتضٰی ناظر

غزل

اساں اندھارے دے پرلے پاسوں نظر نظارے دے پرلے پاسوں

نئیں کوئی ڈسیندا پتہ نئیں کیا ہے ایں چندر تارے دے پرلے پاسوں

ہکے سمندر دا مٹھڑا پانڑی ہے پانڑی کھارے دے پرلے پاسوں

خبر ہے میکوں ہے نندر میڈی میڈے جگارے دے پرلے پاسوں

کوئی چاوے کیویں او لاتھا سونا جو ہے سونارے دے پرلے پاسوں

اساں ہیں اے بے کنارے ایڈو توں اوں کنارے دے پرلے پاسوں

تیں کیتا ناظر ہے سینہ بارے توں ڈیکھ بارے دے پرلے پاسوں

مرتضیٰ ناظر