ماڑی انڈس

ماڑی انڈس (انگریزی, Mari Indus) پاکستان دا ہک آباد مقام اے جیہڑا سرائیکی وسیب دے ضلع میانوالی وچ واقع ہے۔

جغرافیہ

ماڑی شہر یا پراݨی ماڑی دریا دے کنارے پہاڑ دی ݙو شاخاں دے درمیان ہک وادی وچ ہے۔۔ ایہ شہر سڑک توں نظر نی آندا۔البتہ کالاباغ دے دریا دے کنارے توں ایں شہر دے کجھ آثار نظردن- سڑک دے رستے ونڄوں تاں ماڑی انڈس دے قریب ہک وݙا موڑ آندے، اوں موڑ توں مشرق وچ پہاڑ دے ݙو حصیاں دے درمیان ہک تنگ درہ ہے۔ درے وچوں گذروں تاں سامݨے ماڑی شہر ہے۔ ایویں لڳدے جیویں ایہ شہر ہک پیالے دے اندر ہے۔۔

تریخ

ماڑی شہر ضلع میانوالی دی سب توں قدیم وستی ہے۔ کھٻے پاسے پہاڑی دی چوٹی تے ݙو بہت قدیم مندر بݨے ہوئے ہن۔ انہاں مندراں دے بارے بہت کم لوگ معلومات رکھدن۔ انہاں مندراں دا ذکر ہندواں دے مذہبی کتاباں بھڳوت گیتا تے مہابھارت وچ وی ملدے۔ انگریز محقق گریئرسن دے مطابق  مہابھارت دے مرکزی کردار پانڈؤاں نے اپݨے جلاوطنی دے دور وچ اے مندر تعمیر کرائے۔ جݙݨ پانڈؤاں نے اپݨے بھراواں کورؤاں توں جوئے وچ اپݨی سلطنت تے ذال ہر گھدی تاں اتھاں آکے پناہ گھدی۔ بہت ساری روایات وچ ہے کہ ایہ مندر اڄ توں ہزاراں سال پہلے ھندؤاں دے ݙو شاھی خانداناں، کورؤاں تے پانڈؤاں دے درمیان تھیوݨ والی جنگ مہابھارت دے دور دے ہن۔

عمارتاں دی تعمیر وچ کنجور پتھر استمعال کیتا ڳیا ہے جیہڑا خوشحال ڳڑھ توں کشتیاں دے ذریعے گھنایا ڳیا۔ اونہی دور وچ تعمیر تھیوݨ والے عمارتاں، قلعہ کٹاس راج تے قلعہ کافرکوٹ وچ وی ایہے پتھر استمعال کیتے ڳئے ہن۔ ہندو راج دا دار الحکومت دریائے سندھ دے کنارے آباد صوابی شہر ہئی۔ پاکستان بݨݨ توں پہلے ویساکھی دے ݙینہاں وچ ہر سال ماڑی وچ میلا لڳدا جیندے وچ ہندوستان بھر توں ہندو زائرین شریک تھیندے۔ ایہ جگہ میانوالی شہر توں کوئی لڳ بھڳ 45 کلومیٹر دور ہے۔