لُــک چھـپ
لُک چھپ اے سرائیکی خطے دی جڳ مشہور کھیݙ ہے. ایں کھیݙ کوں ٻال وݙے شوق نال کھیݙدن . ایں کھیݙ وچ کھیݙݨ آلیں دی کئی پابندی کائنی جو کتلے کھݙکار کھیݙسن. ایں کھیݙ کوں، لُک چھپ توں علاوہ، لُک چھپک، لُک چھپاک اتے نوٹنڑیں وی آکھدن. ایں کھیݙ وچ پُکھے پاتے ویندن یا پُڳیا ویندے. جیندے اتے واری امدی ہے او ہک مقررہ (ٻَدّھی) ڄاہ جیویں جو ہک مونارہ، یا کندھی ہے اوندے اُتے اکھیں بند کر تے منہ لُکا تے کھڑ ویسی تے کوکڑی (خاص آواز یا سݙ) دا انتظار کریسی یا اے وی طے ہوندے جو اتنی گِݨتری کریسی. ایں گِݨتری یا کوکڑی دے کنوں پہلے سارے کھیݙݨ آلے لُک ویسن ول کوکڑی توں بعد واری ݙیوݨ آلا لکیے ہوئے کھݙکاریں کوں لھبیندے. تے کہیں ہک کوں ہتھ لیندے. اڄ کلھ تاں بئیمانی توں بچݨ سانگے طے کیتا ویندے جو صرف سِر تے ہتھ کار ہوسی. واری ݙیوݨ آلا کہیں کوں ہتھ لا گیا تاں ٹھیک ناں تاں او ول واری ݙیندے. جݙاں جو لُکیے ہوئے کھݙکار کوشت کریندن جو پیڑھی، کوں ہتھ لا گھنن.