لفظاں دے وٹارے
لفظاں دے وٹارے
شہزاد عرفان
مینر تے واٹر دے لفظ سرائیکی وچ انگریزاں دے آوݨ دے بعد آئے ہن ۔ اے الفاظ برٹش انڈیا دے آوݨ دے بعد لوکاں دی زبان دا حصہ بݨن خاص طور تے جݙݨ انگریز نے نہراں دا اری گیشن سسٹم ہندوستان ءچ شروع کیتا جیندے نہراں کھٹݨ آلے مقامی لوک ہوندے ہن ۔ایندے توں پہلے یعنی نہری نظام توں پہلے دریاواں دے نال نال منڈھ قدیم توں مقامی لوک نالے، واہلے تے کھالے دا لفظ استعمال کریندے ہن ۔۔۔۔۔ نالے تے واہلے وݙی اُچی کندھاں دی موکلی بھر نال بݨدے ہن دریا توں پاݨی لوڑھ تے ہک علاقے توں ٻئے علاقے گھن ونجݨ کیتے۔ جیڑھی سیلاب دے زمانے واہندے ہن ۔۔۔۔ ول اتھوں وݙے بند بݨا تے کٹھی وݙی زمین دے ٹوٹے یا کھتان کوں پِلاوݨ کیتے کھال کھالے تے کھالیاں تے اتھوں چھوٹے پیچ تے تھوڑے کیارے کوں پِلاوݨ کیتے ہوندے ہن ۔ واہلے تے ناہلے انگریز دے نہری نظام نال نہری نظام ءچ مُک ڳئن پر کھال تے کھالے اڄݨ تئیں مستعمل ہن ۔ تہوں آکھے جو کجھ لفظ نویں ٹکنالوجی آوݨ دے بعد پراݨی الفاظ دا متباد بݨدن یا اصلوں وٹیج تے نواں لفظ بݨدن ۔۔۔اینویں اڄ سندھ ءچ کلاک تے اساݙے پاسے ٹائم دا لفظ استعمال تھیندے ۔ شہزاد عرفان