قرارداد مقاصد تے پاکستان

قراردادمقاصدآلے پاکستان کوں کیویں قبول کروں اساں؟. سوال دھرتی تے ریاست دا اے، (جاہلیں کنوں معذرت نال)، دھرتی ما ہوندی اے جتھ پیداتھیونڑآلے انسان، ڈھانڈھے، پکھڑوں دھرتی دا ڈتا ہویا کھاندن تے دھرتی دی خیرمنگدِن، دھرتی نال دروہ کرن کوں عام زبان اچ غداری آکھیاویندے۔ ول ریاست کیا ہے، کیاریاست دھرتی تے نئیں ہوندی؟ جی آ، ریاست دھرتی تے ہوندی اے پردھرتی ریاست نئیں، نہ ای ریاست دھرتی اے۔۔۔۔۔ریاست تاں دھرتی دے اُتے بنڑائی ونجن آلی عمارت تھی سگدی اے، ریاست ہِک جمات، تنظیم یاول ہِک ادارہ تھی سگدی اے جیڑھی ہمیش دھرتی واسیں کن پچھیں بِنا بنڑائی ویندی اے۔۔۔۔۔۔۔

ریاست کوں ڈاڈھے دے ظلہل دی نشانی وی آکھیاویندے تے ریاست ظلہل سانگے ہک ہتھیاردے طورتے وی استعمال تھیندی اے، پرڈاڈھا ہمیش اینکوں(state is entity) آکھ کے رب دی رضا اکھیندا آئے، کجھ لوکیں ریاست کوں ’سماجی معاہدے‘ دا نانواں وی ڈتے، بہرحال اکثریت دا ایہوخیال اے جوریاست ظلہل دا ہتھیار اے ہینڑے تے ظلہل دا (ہینڑا انسان ہووے، قوم یاول طبقہ یاجنس)، ریاست ہمیش ڈاڈھے دی طرفداری کریندی تے ڈاڈھے دے مفاد دا خیال رکھیندی اے۔ اتہاس دے کھنڈئیے پُنڈئیے پنے گواہ اِن جو ہینڑے لوکیں ہرفاتح/حملہ آور/قبضہ گیرکوں قبول کرگھدا، بھل جو اوں توں پہلاحاکم وی فاتح/حملہ آور/قبضہ گیرہا جیڑھا اوتلا ظالم تے جابرہا ،جے تلا نواں حاکم اے۔

آئوذرا ریاست دے ترکیبی عناصردا جائزہ گھندوں: ایتھنز(یونان)دی پرانی ریاست کن گھن کے امریکہ دی جدیدریاست تئیں ،ریاست دا تھولابہوں ہکونقشہ نظرآندے، ریاست دا ہِک حاکم(بادشاہ/صدر/وزیراعظم) ہوندے، ول بئے چھوٹے چھوٹے حاکم ہوندن (جیڑھے صوبیں، ریاستیں، ضلعیں دے حاکم ہوندن) تے بادشاہ/صدر/وزیراعظم کوں جوابدارتھیدن، بادشاہ/صدر/وزیراعظم کن تلے ہک شوریٰ/کابینہ/اسمبلی تے ہِک فوج ہوندی اے، اوندے تلے ریاست دے ہرکارے ہوندن جنہاں دے ذمہ انج وانج کم ہوندن، ریاست دی ہک ٹکسالی وی ہوندی اے، تے انہاں سب دی حاکمیت سانگے قانون/دستور/آئین بنڑایاویندے، جیڑھا عوام/رعایا سانگے ایں گالھ دی قسم سمجھی ویندی اے جوتساں ایں قانون/دستور/آئین دی پاسداری کرو تے بادشاہ/صدر/وزیراعظم وی قانون/دستور/آئین دی پاسداری کریسی!!

پرحقیقت ایہا اے، جیکرباداشاہ/صدر/وزیراعظم ایں قانون/دستور/آئین دی پاسداری نہ کرے تاں اوں کن پچھن آلا کئی نئیں ہوندا، ڈوجھے پاسوں عوام/رعایا ایں قانون/دستور/آئین دی پاسداری نہ کرے تاں اونکوں انصاف دے ناں تے سزاڈتی ویندی اے۔ جیکرکئی ایں قانون/دستور/آئین توں بغاوت کرے تاں ریاست دے مسلح جتھے اونکوں غدار آکھ کے مارڈیندن۔ کھباڑی دانشورفریڈرک اینگلزاہدے جو ریاست دراصل مسلح جتھے دا ناں اے کیوں جوباداشاہ/صدر/وزیراعظم دا زور ظلہل وی انہاں دے پاروں چلدے، ایں پاروں ریاست تے فوج دی مرضی چلدی اے۔ پرجوں جوں ویلھا لنگھدا گئے، عوام/رعایا ریاست کن اک گیئن، جیئں پاروں ریاست کوآپڑیں کجھ در دروازے لوکیں سانگے کھولڑیں پئے، ایں سانگے قانون/دستور/آئین کوں کاغذتے لکھن دا رواج ڈتا گیا، انج عدالت بنڑائی گئی، بادشاہ/صدر/وزیراعظم دی میعاد مقرر کیتی گئی، پارلیمنٹ بنڑائی گئی، جیندے سانگے لوکاں کوں ووٹ دا حق تاں ڈتاگیا، پرکجھ ریاستاں اندراے ظلہل وی کرڈتاگیا جوریاست اذنِ ربی اے، پارلیمنٹ وی ایندے نال چھیڑچھاڑنئیں کرسگدی، پارلیمنٹ صرف اذنِ ربی تے عمل کرن سانگے قانون بنڑیسی تے ریاست دے محکمے اوندے تے عملدرآمدکرویسن، ایں کن ودھ پارلیمنٹ دا کئی اختیارنہ ہوسی!!

دنیاوچ اینجھاں ریاستاں وچ پاکستان تے اسرائیل نشابراِن جتھاں ریاست کو ’اذنِ ربی‘ آکھ کے عوام دا حق کھس گھدا گئے، اتھاں ہک پاسوں آکھیاویندے جو23مارچ 1940کوں لہوراِچ ہک لکھ لوکاں ’قراردادپاکستان‘ منظورکیتی، جیندے اُتے ریاست پاکستان دا ایرا رکھیاگئے، پرنال ای چالاکی کرکے ’قراردادمقاصد‘ وی نازل کرڈتی گئی، جیڑھی عوام تے ظلہل دی نشانی اے، اج وی آئین پاکستان اچ قراردادمقاصد موجوداے تے پارلیمنٹ ایندے مطابق قانون سازی کرسگدی اے۔ مونڈھی سوال ایہواے، کیاریاست دا کئی مذہب ہوندے؟ سجی دنیا دیاں ریاستاں/ملک سیکولر اِن تے اُتھاں ریاست دا کئی مذہب کائنی ،پرپاکستان جتھاں وزیراعظم، صدرصرف مسلمان بنڑسگدے،تمام قوانین اسلام دی حدود اچ بنڑسگدن، کیاسرائیکیں کوں اینجھی ریاست وارے آندی اے؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟