قائد اعظم ریزیڈنسی زیارت دا واقعہ

15 جون 2013 کوں زیارت وچ قائد اعظمؒ ریزیڈنسی، زیارت کوں بم دھماکیاں نال تباہ کر ݙتا گیا۔ اِس حملے وچ ہک پولیس اہلکار جاں بحق تھی گیا تے حملے دے خلاف زیارت دے شہری سراپا احتجاج بݨ گئے۔ امدادی ٹیماں دے پہنچݨ تک قائداعظم ریزیڈنسی تباہ تھی چکی ہئی۔ ہک توں ݙو منٹ دے وقفے دے نال چار بم دھماکے کیتے گئے جس نال عمارت کوں بھاہ لگ گئی، حملہ آور چار توں پانچ ہن جیہڑے کارروائی دے بعد فرار تھیوݨ وچ کامیاب تھی گئے ٓ۔ حملے دے وقت بجلی کوئناں ہئی۔

وفاقی وزیر داخلہ چودھری نثار علی خاں نے قائد اعظم ریزیڈنسی کوں قومی ورثہ قرار ݙتا تے اینکوں دوبارہ 3 توں 4 مہینے وچ تعمیر کرݨ دا اعلان کیتا۔

اندرون ملک رد عمل

واقعے دے بعد پارلیمنٹ دے ݙوہیں ایواناں وچ بلوچستان وچ دہشت گردی دے خلاف قرارداداں متفقہ طور تے منظور کیتیاں گئیاں۔ سینیٹ وچ سانحہ کوئٹہ دے خلاف قرارداد مسلم لیگ ن دی سینیٹر نزہت صادق دی طرفوں پیش کیتی گئی۔ قومی اسمبلی وچ وی کوئٹہ دھماکیاں تے زیارت وچ قائد اعظم دی رہائش گاہ تے حملیاں دے خلاف قراردادِ مذمت متفقہ طور تے منظور کیتی گئی۔