علی امین گنڈاپور

علی امین گنڈاپور
مناصب
وفاقی وزیر برائے امور کشمیر و گلگت بلتستان
برسر عہدہ 5 اکتوبر 2018  – 10 اپریل 2022
رکن پندرہویں قومی اسمبلی پاکستان
رکن از 17 جنوری 2023
حلقہ انتخاب	این اے-38 (ڈیرہ اسماعیل خان-1)
پارلیمانی مدت	پندرہویں قومی اسمبلی
معلومات شخصیت
مقام پیدائش	کلاچی
شہریت	پاکستان
جماعت	پاکستان تحریک انصاف
عملی زندگی
کم	سیاست دان
ماء ٻولی	پشتو
پیشہ ورانہ زبان	پشتو ،  اردو

سردار علی امین خان گنڈا پور ہک پاکستانی سیاست دان ہن جیہڑے ایں ویلے خیبر پختونخوا دے وزیر اعلیٰ دے طور تے خدمات انجام ݙیندے پئے ہن۔ یکم مارچ 2024ء کوں پاکستان تحریک انصاف توں علی امین گنڈا پور 90 ووٹ حاصل کر تے وزیر اعلیٰ خیبر پختونخوا منتخب تھی ڳئے۔ انہاں دے مقابلے وچ اپوزیشن دے مشترکہ امیدوار مسلم لیگ ن دے ایم پی اے ڈاکٹر عباداللہ خان نے 16 ووٹ حاصل کیتے۔ پاکستان تحریک انصاف دے بانی عمران خان نے ڈیرہ اسماعیل خان توں منتخب تھیوݨ آلے امیدوار علی امین گنڈا پور کوں صوبہ خیبر پختونخوا دے وزیراعلٰی کیتے نامزد کیتا ہئی۔

8 فروری کوں تھیوݨ آلے عام انتخابات وچ پاکستان تحریک انصاف (پی ٹی آئی) دے حمایت یافتہ آزاد امیدوار علی امین گنڈا پور نے این اے 44 ڈی آئی خان توں 93,443 ووٹ حاصل کر تے جمعیت علما اسلام ف دے سربراہ مولانا فضل الرحمان کوں ہرایا ہئی۔ علی امین گنڈا پور دا تعلق صوبہ خیبرپختونخوا دے ضلع ڈیرہ اسماعیل خان نال ہے انہاں دا آبائی شہر کلاچی ہے اتے انہاں دے پیو ریٹائرڈ میجر امین اللہ گنڈہ پور معروف شخصیت ہن جیہڑے سابق صدر پرویز مشرف دے دور وچ نگراں کابینہ دا حصہ رہ چکے ہن۔ علی امین گنڈا پور دے چھوٹے بھرا فیصل امین گنڈا پور 2018 دے الیکشن وچ کامیاب تھی تے خیبر پختونخوا دے وزیر بلدیات بݨے ہن جݙاں جو ݙوجھے بھرا عمر امین گنڈا پور ڈی آئی خان شہر دے میئر ہن۔

علی امین گنڈا پور دا سیاسی کیریئر علی امین گنڈاپور 2013 وچ پہلی واری پی ٹی آئی دے ٹکٹ تے پی کے 64 ڈی آئی خان توں کامیاب تھی تے صوبائی کابینہ وچ شامل تھئے ہن۔ انہاں سابق وزیر اعلٰی پرویز خٹک دی حکومت وچ بطور صوبائی وزیر مال دے طور تے عہدہ سنبھالیا۔ سنہ 2018 دے انتخابات وچ قومی اسمبلی دا الیکشن لڑے اتے این اے 38 ڈی آئی خان توں جیت ڳئے۔ علی امین گنڈا پور کوں 5 اکتوبر 2018 کوں امورِ کشمیر و گلگت بلتستان دے وفاقی وزیر دا قلمدان ݙتا ڳیا ہئی۔ علی امین گنڈا پور تحریک انصاف خیبرپختونخوا دے صوبائی صدر وی رہ چکے ہن۔ سابق وفاقی وزیر اپݨی شعلہ بیانی اتے جذباتی انداز دی وجہ توں مشہور ہن۔ اسلام آباد آزادی مارچ ہووے یا لاہور زمان پارک تے پولیس دی چڑھائی، علی امین گنڈا پور اپݨے کارکناں دے ہمراہ سیسہ پلائی دیوار بݨ تے عمران خان دے نال کھڑے رہے۔ انہاں اپݨے قائد عمران خان دی حفاظت کیتے ہمیشہ اہم کردار ادا کیتا۔ ایں کیتے اوہ عمران خان دے بااعتماد ورکرز وچ شمار تھیندے ہن۔ علی امین گنڈا پور دے خلاف ٻہوں سارے مقدمات درج ہن۔ سابق وفاقی وزیر علی امین گنڈا پور کوں 6 اپریل 2023 کوں پشاور ہائی کورٹ دے ڈیرہ اسماعیل خان بینچ دے احاطے توں گرفتار کیتا ڳیا ہئی۔ انہاں کوں پہلے اسلام آباد پولیس اتے بعد ازاں بھکر پولیس دی تحویل وچ ݙے ݙتا ڳیا ہئی۔ پی ٹی آئی رہنما دے خلاف گولڑہ پولیس وچ حکومتی اتحاد دے خلاف توہین آمیز زبان استعمال کرݨ، سرکاری اہلکاراں کوں دہمکیاں ݙیوݨ اتے عوام کوں حکومت دے خلاف اُکسانوݨ دے الزامات ہن۔ ضلع ڈی آئی خان دے ݙو مقدمیاں وچ انہاں کوں بری کر ݙتا ڳیا ہئی، تاہم انہاں کوں اسلام آباد اتے پنجاب وچ دائر مختلف مقدمیاں وچ 6 روزہ ریمانڈ تے جیل بھیڄ ݙتا ڳیا۔ علی امین گنڈا پور کوں 13 اپریل 2023 کوں پنجاب پولیس نے پنجاب آرمز آرڈیننس 2015 دیاں دفعات دے تحت بھکر وچ درج ہک مقدمے وچ گرفتار کر تے 14 روزہ جوڈیشل ریمانڈ تے اڈیالہ جیل بھیڄ ݙتا ڳیا ہئی۔ بعد ازاں انہاں کوں 4 مئی کوں سکھر جیل توں رہا کیتا ڳیا تاہم 9 مئی دے واقعات دے بعد علی امین گنڈا پور ول روپوش تھی ڳئے ہن۔ انسداد دہشت گردی عدالت گوجرانولہ نے 9 مئی کوں کینٹ تے حملے اتے جلاؤ گھیراؤ دے مقدمے وچ پولیس دی استدعا تے مراد سعید، حماد اظہر اتے علی امین گنڈا پور سمیت 51 رہنماواں دے ناقابل ضمانت وارنٹ جاری کیتے ہن۔ سابق وفاقی وزیر اتے موجودہ وزیر اعلیٰٰ علی امین مختلف مقدمیاں وچ مطلوب ہووݨ دی وجہ توں انتخابی مہم دے دوران وی روپوش رہے پر ویڈیو پیغامات دے ذریعے انتخابی جلسیاں وچ شریک تھیندے رہے۔ اوہ 5 اکتوبر 2018 ء توں 10 اپریل 2022 ء تائیں امور کشمیر اتے گلگت بلتستان دے سابق وفاقی وزیر رہے۔ اوہ اگست 2018 ء توں جنوری 2023ء تائیں پاکستان دی قومی اسمبلی دے رکن رہے۔

ایندے توں پہلے اوہ 2013ء توں 2018ء تائیں خیبرپختونخوا دی صوبائی اسمبلی دے رکن رہے اتے ایں عرصے تائیں خیبرپختونخوا دے صوبائی وزیر برائے ریونیو دے طور تے خدمات انجام ݙتیاں۔ انہاں اپݨا پہلا الیکشن 2013ء وچ لڑیا، پی کے-94 ڈیرہ اسماعیل خان توں جیت ڳئے، اوہ 2018 ء وچ ول جت ڳئے۔ انہاں 2 نشستاں تے مقابلہ کیتا، پی کے-97 ڈیرہ اسماعیل خان سٹی 1 اتے این اے-38، ݙونہاں نشستاں تے کامیابی حاصل کیتی۔

ابتدائی زندگی

علی دا تعلق ڈیرہ اسماعیل خان نال تعلق رکھݨ آلے پشتوناں دے سیاسی طور تے سرگرم گنڈا پور قبیلے نال ہے، انہاں دے مرحوم والد میجر (ر) امین اللہ گنڈا پور پرویز مشرف دے دور وچ نگراں کابینہ دے رکن دے طور تے خدمات انجام ݙے چکے ہن۔ امین اللہ دا انتقال 2024ء وچ تھیا۔ انہاں دے بھرا سردار فیصل امین خان گنڈا پور وی سیاست دان ہن

۔ انہاں اپݨی ابتدائی تعلیم سینٹ ہیلنس ہائی اسکول، ڈیرہ اسماعیل خان توں مکمل کیتی۔ کھیݙاں وچ ڳوڑی دلچسپی دی وجہ توں، چونکہ اوہ سکواش دے کھݙاڑی ہن، اوہ پشاور شفٹ تھی ڳئے اتے پولیس ماڈل اسکول توں میٹرک کیتی۔ بعد وچ انہاں ڈیرہ اسماعیل خان دی گومل یونیورسٹی توں بی اے (آنر) کیتا۔

سیاسی کیریئر

اوہ 2013ء دے خیبرپختونخوا دے صوبائی انتخابات وچ پی کے-64 (ڈیرہ اسماعیل خان-I) توں پاکستان تحریک انصاف (پی ٹی آئی) دے امیدوار دے طور تے خیبر پختونخوا دی صوبائی اسمبلی کیتے منتخب تھئے۔ انہاں 14,047 ووٹ حاصل کیتے اتے آزاد امیدوار قیوم نواز کوں ہرایا۔

انہاں دے کامیاب انتخاب دے بعد، انہاں وزیر اعلیٰٰ پرویز خٹک دی صوبائی کابینہ وچ شامل کیتا ڳیا اتے انہاں کوں خیبرپختونخوا دا صوبائی وزیر برائے ریونیو اتے اسٹیٹ بݨایا ڳیا۔

اوہ 2018ء دے پاکستانی عام انتخابات وچ حلقہ این اے-38 (ڈیرہ اسماعیل خان-I) توں پی ٹی آئی دے امیدوار دے طور تے پاکستان دی قومی اسمبلی کیتے منتخب تھئے۔ 5 اکتوبر 2018ء کوں، انہاں وزیر اعظم عمران خان دی وفاقی کابینہ وچ شامل کیتا ڳیا اتے انہاں کوں وفاقی وزیر برائے امور کشمیر اتے گلگت بلتستان مقرر کیتا ڳیا۔